¹ Rima ano ngalaka dakoh, Imam Ahyo Ananias disah samahu nige' mqni ungan pangama-pangama ge' nyungan pangacara da bagaatn Tertulus. Ayoa' ngusul tuntutan tarhadap Paulus ka gubernur. ² Ngalaka Paulus gatn maba', Tertulus mule nuduh'a nige' muji', " Sabab, nabo Tuan, kai salalu misa da damai ge' parubahan-parubahan tajadi ka bangsa diah karna kabijakan Tuan, ³ kai nyamut'a nige' bamacam cara ge' kasamaan tampat nige' panhu rasa syukur, Da Mulia Feliks. ⁴ Tapi ao'a, supaya kati' ngangkabas waktumu' agi', iko mahi pamase' atemu' ya' ngadangah kai sabantar jak. ⁵ Sabab, kai laka amput bahwa sok diah anilah nyungan pangaco, da nimbul kakacoan ka antara ayo sok Yahudi ka saluruh dunia. Ge', ini' anilah pamimpin sekte Nasrani. ⁶ Ini' malah barusaha ngator ramin Jabata singga kai nangkap'a. [kai ngate ngadili'a sasuei nige' hukum kai. ⁷ Tapi, Lisias, kapala pasukan dakoh, utukng lalu nyarantakan'a umpatn barekng kai nige kakarasan, ⁸ gae ngadu ayo sok da nuduh'a ya' utukng manghadap imu'] Nige' mamariksa adupta, imu' ao' kaatn pane umpatn ini' manganai samaan da kai nuduh ka ini'. ⁹ Ayo sok Yahudi uga basapakat ka sadatn tuduhan dakoh gae nagas'a bahwa samaan hal dakoh memang taman. Pambelaan Paulus ka Tura Feliks ¹⁰ Jangkah gubernur mangkatn kode ka Paulus ya' nyansana, Paulus naham, "Ngalaka iko' pane salama bataun-taun bahwa imu' ngajadi hakim ka bangsa diah, iko' nige' sanang ate mambela adup kitn. ¹¹ Imu' kaatn pane bahwa kati' labih umpatn dua balas ano diduviko' makka ka Yerusalem ya' sambayang. ¹² Ayoa' kati' suah amput iko' agi badabat nige' asipun ato manghasut sok da bakumpul, bait ka ramin Jabata, sinagoge-sinagoge, atopun ka sadatn kota. ¹³ Ayoa' uga kati' aba' mambuktia' ka imu' jai da ayoa' nuduh ka iko' mati'. ¹⁴ Namun, iko' ngako ka imu', bahwa sasuai nige' Gala' dakoh, da ayoa' muji' nyabuah sekte, iko' sambayang ka Jabata nenek moyang ite', nige' pacaya ka jsi pun da sasuai nige' Hukum ge' da tatulis ka sadatn kitab ayo nabi, ¹⁵ gae mana' pangharapan ka sadatn Jabata, da ayoa ngantia' uga, bahwa ao' ani kabangkitan, bait ya' sok da taman atopun da kati' taman. ¹⁶ Sadatn hal diah, iko' barusaha ya' ngajaga ate nurani da murni, bait ka hadapan Jabata atopun talino. ¹⁷ Mati', ngalaka nyamani taun, iko' utukng ya' minsakng sadakah ka bangsako' ge' ya' mangkatn parsambahan-parsambahan. ¹⁸ Samantara iko' agi' umasa', ayoa' amput iko', ngalaka iko' gatn nyuci karamin Jabata, tampa kumpulan sok ato karusuhan. Namun, ka teetn ani maniungan sok Yahudi umpatn Asia. ¹⁹ Saharusa', ayoa' ta da ani kahadapanmu' ge' da ngaju tuduhan, sak memang ayoa' ani umpu tarutn ya' ngalawan iko'. ²⁰ Ato, tea' ta ayo sok dakoh sadi' da muji' palanggaran jai da ayoa' amput jangkah iko' agutn ka hadapan Sanhedrin, ²¹ kacuali nyiteng parnyataan da gatn ko' ngampak jangkah iko' agutn ka antara ayoa', 'Karna kabangkitan sok kabis, iko' gatn ngakim ka hadapanmu' ano diah," ²² Ao'a ta Feliks, da umpu pangatuan da labih tapat manganai Gala dakoh, nganunda kasus dakoh nige' muji', "Jangkah Lisias, kapala pasukan dakoh, disah, iko' ao' mamutus kasusmu'." ²³ Lakadakoh, Feliks ngadu perwira dakoh sa' Paulus tatap gatn nahan, tapi nige' karinganan ge' kati' mingat kawan-kawana' ya' malayan ini'. Paulus Muji' manganai Iman'a Sadatn Kristus ²⁴ Ngalaka nyamani ano, Feliks utukng samahu sautna, Drusila, da anilah sok Yahudi ge' dangadu Paulus utukng ge' ngadangah Paulus nyansana manganai iman'a ka sadatn Yesus Kristus. ²⁵ Lalu, samantara Paulus agi' batukar pikiran manganai kabanaran, kina ngandali adup, ge' panghakiman da ao'utukng, lalu Feliks jadi buut ge' muji', " Anuta mati'. Jangkah iko' kaatn kasempatan, iko' ao' maba'mu'." ²⁶ Ka waktu da samu, Feliks barharap bahwa Paulus ao' mangkatna uang. Karna dakoh, Feliks sering ngadu Paulus utukng ge' nyansana nige' ini'. ²⁷ Tapi ao'a, ngalaka lewat dua taun, Perkius Festus makka ganti Feliks. Ge', saking ngate mangkauhatn ayo sok Yahudi, Feliks mansawatn Paulus ka sadatn panjara.