¹ Paulus natap Sanhedrin ge' muji', "Ayo-ageko', iko' laka manjalan idupko' nige saganap ate nurani da bait wak tura Jabata sampe ano diah." ² Lalu, Imam da Aihyo Ananias marintah ayo-sok da agut'n wak riket Paulus ya' nampar baba Paulus. ³ Laka dakoh, Paulus muji' ka ini', "Jabata aok namparmu', hei imu' paga da gat'n ngacat ranakng! Jai'ta imu' unyung ya manghakimi iko' manurut Hukum Taurat, tapi malanggar hukum dakoh nige ngadu biar iko' gat'n nampar?" ⁴ Ayo-sok da agut'n wak riket'a muji', "Jai'ta imu' nyamanya Imam da Aihyo Jabata?" ⁵ Laka dakoh, Paulus muji', "Iko' kati pane, Ayo-age, bahwa ini' diu'ta Imam da Aihyo. Barang, tatulis, 'Iya'lah imu' nyansana da jahe tentang sook pamimpin bangsamu'.'" ⁶ Tapi aok'a sa' Paulus pane bahwa sabagian ani'ta ayo-sok Saduki ge' da lait'n'a ani'ta sook Farisi, Paulus ngampak ka sadat'n Sanhedrin, ayo-age, iko' ani'ta sok Farisi, kangot sok Farisi. Iko' agi gat'n uleh karna pangharapan ge' mangkidup sok da kabis!" ⁷ Ano Paulus nyansana hal diah, timbul salisih paham ka antara sook Farisi ge' sook Saduki, ge' bakumpur sook ka dakoh tabagi. ⁸ Sa' sok Saduki nyansana sa' kati ani pangidup , kati ani Malaikat, ge' uga kati ani Roh, tapi sook Farisi ngako dakoh samaan. ⁹ Maka, tarjadilah kaributan da aihyo ge' mani ungan ahli Taurat umpat'n kalompok Farisi agut'n ge' ngarato nige karas, "Kai kati amput tarut'n da sara' nige sok diah. Langkina sa' roh ato malaikat laka nyansana ka ini'?" ¹⁰ Lalu, sa salisih samangkin bakambang, kapala pasukan buut Paulus aok gat'n ngarantak-antak uleh sok da karah dakoh, lalu marintah prajurit-prajurit ya' disah ge' naap Paulus umpat'n tuda-tuda ayo'a nige makse, gae' minsakng'a ka markas. ¹¹ Pas ngarum barikut'a, Tuhan agut'n wak suut Paulus ge' nyansana, "Kuatkan atemu' barang imu' ngalaka basaksi nige sungguh-sungguh tentang Iko' wak Yerusalem, nige laka dakoh imu' uga harus basaksi wak Roma." Rancana ya' ngamis Paulus ¹² Pas ano tano, ayo-sok Yahudi bulah basakongkol ge' ningo adup ayo'a sadi nige nyumpah ya' kati uman ato nyucur jai pun sampe ayo'a ngamis Paulus. ¹³ Ani labih umpat'n ampat puluh sok da umas sakongkol diah. ¹⁴ Ayo'a utukng ka imam-imam kapala ge' pangama-pangama, lalu nyansana, "Kai' laka ningo adup kai' sadi nige nyumpah ya' kati nyacap jai pun sampe kai' ngamis Paulus. ¹⁵ Mati, uleh karna dakoh, akup'm samahu nige Sanhedrin, muji' kapala pasukan ya' minsakng'a disah ka imu', saolah-olah akup'm aok ngutus parkara'a nige labih taliti agi ge' kai' siap ya' ngamis'a sabalum ini' bariket ka tampat diah." ¹⁶ Tapi aok'a, anak are umpat'n age da mahu Paulus dangah tentang nyargap dakoh, lalu ini' anu ge' maruh ka markas, gae muji' ka Paulus. ¹⁷ Paulus maba sara' nyiteng perwira ge' nyansana, "Minsakngnih anak muda diah ka kapala pasukan barang ini' umpu tarut'n ya' gat'n ngalapor ka ini'." ¹⁸ Maka, perwira dakoh minsakng'a ka kapala pasukan ge' nyansana, "Paulus, tahanan dakoh, mabako' mahiko' ya' minsakng anak muda diah ka imu' barang ini' umpu tarut'n ya' gat'n muji' ka imu'." ¹⁹ Kapala pasukan nyinte barekng anak muda dakoh, narik'a ka suut'n, ge' mule mansikat'n anak muda dakoh sacara pribadi, "Jai da harus imu' laporkan ka iko'?" ²⁰ Lalu, ini' naham, "Ayo-sok Yahudi nga sapakat mahimu' ya' minsakng Paulus disah ka Sahendrin jakap, saolah-olah ayo'a aok mansikat'n tarut'n da rabeh taliti tentang ini'. ²¹ Jadi, iya' dangah ayo'a barang ani rabeh umpat'n ampat puluh sok umpat'n ayo'a sadakng manghadang Paulus, da basumpah ya' kati uman ato nyucur sampe ayo'a ngamis Paulus. Ge' mati' ayo'a nga siap ge' jangkah nganti parsatujuanmu'." ²² Maka, kapala pasukan ngadu anak muda dakoh anu, gae bapusut'n ka ini', "Iya muji' ka asi pun kalo imu' laka muji'ko' tentang hal-hal diah." Paulus Gat'n ngirim ka kota Kaisarea ²³ Laka dakoh, kapala pasukan dakoh maba dua ungan perwira ge' nyansana, " Nyiap ta nih dua ratus tantara, nige ijo puluh panunggang kuda ge' dua ratus prajurit basanjata, ya' barangkat ka Kaisarea, pas jam taru ngarum diah. ²⁴ Nyadia uga hewan ya' manunggangkan Paulus ge' minsakng ini' nige aman ka Feliks, gubernur dakoh." ²⁵ Lalu, ini' nulis nyabuah suart, da ulah diah: ²⁶ Umpat'n Klaudius Lisias. ²⁷ Sok diah gat'n nangkap uleh ayo-sok Yahudi ge' ampir gat'n ngamis uleh ayo'a waktu iko' utukng samahu nige prajurit-prajurit ge' nyalamat'a, laka pane kalo ini ani'ta sook warga negara Roma. ²⁸ Barang iko' ngate pane jai alasan ayo'a nuduh'a, iko' minsakng'a disah ka Sanhedrin ayo'a. ²⁹ Iko' amput kalo ini' gat'n nuduh ka samo parsoalan tentang Hukum Taurat ayo'a, tapi kati ani alasan jaipun pantas ya' ngukum kabis ato panjara. ³⁰ Sa' gat'n muji' ka iko' kalo aok ani nyabuah sakongkolan ya' malawan sok diah, iko' japat marintah'a para panuduh' ya' bulah tuntutan ayo'a tradap'a wak turamu'. ³¹ Maka, para prajurit, sasuai nige parintah ya' ayo'a, nangkap paulus ge' minsakng'a pas waktu ano ngarum ka antipatris. ³² Pas ano barikut'a, ayo'a mambiar para panunggang kuda dakoh anu samahu'a, lalu ayo'a kambali ka markas. ³³ Sa' ayo'a laka nyampe wak Kaisarea ge' nyampe surat dakoh ka gubernur, ayo'a uga nyantura Paulus ka ini'. ³⁴ Ngalaka gubernur maca surat dakoh, ini mansikat'n umpat'n wilayah ume Paulus brasal. Ge', sa' ini' pane kalo Paulus brasal umpat'n Kilikia, ³⁵ Ini', nyansana, " Iko' aok dangahmu' ngalaka para panuduhmu' uga utukng." Laka dakoh, ini' marintah supaya mangawal Paulus wak sadat'n markas da aihyo Herodes.