¹ Ngalaka karusuhan dakoh barakhir, Paulus ngundang ayo murid, ge' ngalaka nguat ate ayoa', ini' bapamit nige' ayoa' ge' anu nuju ka Makedonia. ² Ngalaka ini' ngalusur rappo-rappo ka teetn ge' mangkatn karah patuah ka ayoa', ini' sampe ka Yunani. ³ Ge', kateetn Paulus madi salama taru buratn. Karna ayo sok Yahudi ngumas pasakongkolan ya' malawana jangkah ini' ngate balayar ka Siria,ini' ngamutus ya' malik nabo Makedonia. ⁴ Paulus gatn namahi gat Sopater umpatn Berea, anak Pirus, ge' Aristarkus ge' Sekundus, umpatn Tesalonika, ge' Gayus umpatn Derbe, ge' Timotius, ge' uga Tikhikus ge' Trofimus umpatn Asia. ⁵ Ayoa' barangkat labih uru ge' sadang nganti kai ka Troas, ⁶ tapi kai balayar umpatn Filipi ngalaka Hari Raya Roti Kati' Baragi, ge' utukng ka ayoa' ka Troas sadatn 5 ano, ka teetn kai madi' salama 7 ano. Kunjungan Paulus da Tarakhir ka Kota Troas ⁷ Pas ano partama minggu dakoh, jangkah kai agi bakumpur samahu ya' mucuh roti, paulus nyansana ka ayoa' karna maksud ya' barangkat ka ano da ao'a, ge' ini', mangkangho pusutna sampe tuda ngarum. ⁸ Ani karah lampu ka ruang samo, tampat kai bakumpur. ⁹ Ge', ka teetn ani bujakng da bagaatn Eutikhus agi unyung ka jandela ge' tangulup sadatn buus da balapm. Lalu, samantara Paulus tarus nyansana sadatn waktu da tuhi, ini' samangkin tangulupm sadatn buus ge' jantu ka umpatn bitak kataru ge' gatn ngangkat sadatn kaadaan ngakabis. ¹⁰ Namun, Paulus disah lalu ngangkujor adup'a ka samoa', ge' nangkulok'a, ge' nyansana, "iya' bagauh karna nyawaa maseh ani kasadatna". ¹¹ Jangkah Paulus malik maka, lalu mucuh-mucuh roti ge' uman, ini' nyansana ka ayoa' sadatn waktu da tuhi', sampe subuh. Ngalaka dakoh ini' barangkat. ¹² Ayoa' minsak bujakng dakoh ure sadatn kaadaan idup ge' misa' aru tarhibur. Parjalanan umpatn Kota Troas ka Kota Miletus ¹³ Namun, ngalaka anu labih uru ka kapal, kai balayar ka Asos nige' maksud amput Paulus ka teetn karna ini' ngalaka umas rencana ladakoh, ini' sadi' bamaksud anu ka teetn nige' bajalatn kaja'. ¹⁴ Ge', jangkah ini' badaput nige' kai ka Asos, kai amput'a, lalu anu ka Metilene. ¹⁵ Ngalaka balayar umpatn teetn, kai nyampe ka jakkap aria ka Khios. Ano barikut'a, kai ngariket Samos, ge' nyanoa agi' kai sampe ka Miletus. ¹⁶ Sabab, Paulus ngalaka mamutusa' ya' balayar nabo Efesus supaya ini' kati' ngangkabas waktu ka Asia karna ini' galabak sampe ka Yerusalem, sak ani kamungkinan, ka ano Pentakosta. Paulus Nyansana ka Panatua Efesus ¹⁷ Umpatn Miletus, Paulus ngutus sok ka Efesus ge' ngadu ayo panatua jemaat utukng ka ini'. ¹⁸ Ge', jangkah ayoa' utukng ka ini', ini' nyansana ka ayoa', "Imu' sadik pane, langkina iko idup ka antaramu sapanjang waktu, mulei ano da partama iko' nginyak kaja'ko ka Asia, ¹⁹ gae malayan Tuhan nige' sagala karendahan ate, ge' nige' paitn matu, ge' nige' pancobaan-pancobaan da nimpako' nabo pasekongkolan ayo sok Yahudi, ²⁰ langkina iko' kati' nahan adup ya' mamberitaa' ka imu' sagala tarutn da bagune ge' dangajar imu' ka tura umum ge' umpatn ramin ka ramin, ²¹ Batol-batol ta mangkatn kasaksian, bait ka ayo sok Yahudi atopun ayo sok Yunani, manganai partobatan ka Jabata ge' bariman ka Tuhan ite', Yesus Kristus. ²² Ge' mati', ilek ta, nige' gatn ningo' katn Roh, iko' agi sadatn parjalanko' ka Yerusalem, tampa pane jai da ao' tajadi wa' iko' ka teetn, ²³ kacuali sak Roh Kudus basaksi nige' batol-batol ka satiap kota kaiko' bahwa panjara ge' siksaan laka nganti iko'. ²⁴ Tapi, iko' kati' nganggap idupko' bararga ka adupko' sadi' singga iko' kaatn nyalesai tugasko' ge' palayanan da iko' nyamut umpatn Tuhan Yesus, dakoh ta ya' basaksi nige' batol-batol manganai Injil batol-batol manganai Injil anugerah Jabata. ²⁵ Ge' mati', mile' ta, iko' pane bahwa kati' ani ka antaramu, da ka imu' iko bakaliling ngabar Karajaan , ao' mile' bahasko' agi'. ²⁶ Karna dakoh, iko' basaksi ka imu' ano diah bahwa iko' kati' basara tarhadap daya'mu' samaan. ²⁷ Sabab, iko' kati' nahan adup ya' ngabar ka imu' samaan rancana Jabata. ²⁸ Ngajaga ta adupmu sadi' ge' samaan kawanan, da wa' samoa Roh Kudus laka umasmu' ya' jadi pangawas ya' manggembala jemaat Jabata, da laka Ini' kaatn nige' daya Adup-A. ²⁹ Iko' pane bahwa ngalaka kabarangkatanko' diah, sarigala-sarigala da buas ao' utukng ka antara imu', kati' mase' ka kawanan dakoh. ³⁰ Ge', umpatn antara imu' sadi' ao' bangkit ayo sok da nyansana manganai hal-hal da nyasat ya' manarik murid-murid umpatn ayoa'. ³¹ Ya' karna dakoh, bajaga-jaga ta, gae ngingat bahwa tano ge' ngarum, salama 3 taun, iko' kati' baranti ngingatmu' masing-masing nige' paitn matu. ³² Ge' mati', iko' nyarah imu' ka Tuhan ge' ka firman anugerah-A da aba' mambangunmu' ge' mangkatnmu' warisan ka antara samaan sok da gatn ngudus. ³³ Iko' kati' ngate perak, ato barawatn, ato pangiak asi pun. ³⁴ Imu' sadi pane bahwa barekng diah malayan kapalaluanko' ge' ayoa' samahu-mahu nige' iko'. ³⁵ Sadatn hal jai, iko' laka nujo' ka imu' bahwa nige' bakaraje karas samu ge' cara diah, ite' harus nulong da lamah ge' nyanuut saratn Tuhan Yesus, bahwa Adup Ini' ta da muji', 'Labih auhatn ate mangkatn daripada narima." ³⁶ Ge', jangkah ini' ngalaka muji' hal-hal diah, ini' balutut ge' badoa samahu ayoa' samaan. ³⁷ Lalu, ani karah da munse' ka antara ayoa' ge' ayoa' nakulok jangok Paulus, gae nyiuma', ³⁸ aru ta ayoa' basedih, tarutama karna saratn-saratn da ini' muji' bahwa ayoa' kati' ao' mile' bahas'a agi'. Lalu, ayoa' namahi Paulus ka kapal.