¹ Hal diah tarjadi, samantara Apolos madi wak Korintus, Paulus nabo daerah padalaman ge' sampe wak Efesus. Wak teet, ini' amput mani ungan murid. ² Paulus muji' ka ayo'a, "Jai'ta imu' narima Roh Kudus pas imu' laka jadi pacaya?" Ayo'a naham, Kati, bahkan kai' ti'nga parnah dangah kalo ani Roh Kudus." ³ Lalu, Paulus muji', "Wak sadat'n jai, laka dakoh, imu' gat'n baptis?" Naham ayo'a baptisan Yohanes." ⁴ Paulus muji' "Yohanes mambaptis nige baptisan partobatan, sambil muji' ayo-sok ya' pacaya ka Sook da aok utukng ngalaka ini', diu'ta ka Yesus." ⁵ Ngalaka ayo'a dangah hal diah, ayo'a gat'n baptis wak sadat'n gaat'n Tuhan Yesus. ⁶ Laka dakoh, pas Paulus laka numpang barekng'a ka samo ayo'a, Roh Kudus utukng ka samo ayo'a, lalu ayo'a mule nyansana ka sadat'n barbage bahasa ge' banubuat. ⁷ Ayo'a samaan bajumlah kira-kira dua balas ayo-sok are. ⁸ Maka, Paulus maruh ka sinagoge ge' nyansana nige pagat'n salama taru burat'n, sambil batukar pikiran ge' mayakinkan ayo'a tentang Krajaan Jabata. ⁹ Tapi aok'a, pas mani ungan sok da ngaras ate ge' nolak pacaya, sambil muji' hal-hal da jahe tentang pagala dakoh wak tura sok da karah, Paulus ngagat'n ayo'a ge' minsakng ayo murid anu, sambil batukar pikiran satiap ano wak sakolah Tiranus. ¹⁰ Hal diah balangsung salama dua taun sahingga samaan sok da madi wak Asia dangah Firman Tuhan, bait ayo-sok Yahudi maupun ayo-sok Yunani. Anak-anak Skewa ¹¹ Jabata umas karah mukjizat da luar biasa nabo barekng Paulus, ¹² Sahingga sapu barekng ato celemek da parnah marap barekng Paulus gat'n minsakng ka ayo-sok anap'm, maka panyakit ayo'a ilang ge' roh-roh da jahe kaluar umpat'n ayo'a. ¹³ Barang, mani ungan pangusir setan Yahudi da bajalat'n kalilikng barusaha nyebut gaat'n Tuhan Yesus atas ayo-sok nda karasukan roh-roh jahe sambil muji, "Iko' nyumpah Paulus nyarita'ta!" ¹⁴ Ijo ungan anak are Skewa, sara' nyungan imam da aihyo Yahudi, da bulah'a. ¹⁵ Tapi aok'a, roh jahe dakoh naham ge' muji' ka ayo'a, "Iko' kanal Yesus ge' iko' pane tentang Paulus, tapi asi imu'??" ¹⁶ Lalu, sok da karasukan roh jahe dakoh malompatka arah ayo'a, ge' bakuasa ka samo ayo'a, gae ngalah ayo'a samaan sahingga ayo'a boho adup'a wak ramin dakoh ka sadat'n kaadaan ugakng ge' talih. ¹⁷ Hal diah gat'n pane uleh samaan warga Efesus, bait ayo-sok Yahudi maupun ayo-sok Yunani. Ge', ayo'a samaan jadi buut ge' gaat'n Tuhan Yesus samangkin gat'n muliakan. ¹⁸ Karah umpat'n antara ayo'a da laka manjadi pacaya tatap utukng, sambil ngako ge' nyarita parbuatan-parbuatan ayo'a. ¹⁹ Lalu, karah umpat'n ayo'a da parnah bulah sihir, ngumpul buku-buku ayo'a ge' nyahu'a wak depan samaan sok. Ge', ayo'a ngitong nilai buku-buku dakoh ge' amput nilai'a mancapai 50.000 kapikng parak. ²⁰ Jadi, firman Tuhan tarus batumbuh ge' bakuasa. Paulus Marancanakan pagala'a ²¹ Ngalaka hal-hal dakoh salasai, ka sadat'n Roh, Paulus bamaksud anu ka Yerusalem ngalaka ini' nabo Makedonia ge' Akhaya, nige muji', "Ngalaka iko' madi wak teet'n, iko' uga harus mile Roma." ²² Ge', ngalaka mangutus dua ungan da malayani'a ka Makedonia, diu'ta Timotius ge' Erastus, ini' sandiri madi mani ano wak Asia. Demetrius Timbul kakacauan wak Kota Efesus ²³ Sakitar waktu dakoh, wak teet'n tarjadei karusuhan da kati inekmanganai pagala dakoh. ²⁴ Barang, ani sok ba'gaat'n Demetrius, sok pangarajin perak, da umas kuil-kuil perak Dewi Artemis, mangkat'n panghasilan da kati iget bagi tukang-tukang'a. ²⁵ ayo tukang'a dakoh ini' ngumpul samahu nige pangaraje-pangaraje wak bidang sarupa ge' muji', "Ayo-age, imu' pane kalo kamakmuran ite brasal umpat'n parusahaan diah. ²⁶ Lalu, imu' mile ge' dangah kalo, inya hanya wak Efesus malait'nkan ampir wak saluruh Asia, Paulus laka mayakinkan ge' bulah karah sok malik nige muji' kalo Jabata da gat'n umas nige barekng talino inyalah Jabata. ²⁷ Hal diah bahaya inya hanya kalo usaha ite aok jantu ka sadat'n nyamanya, tapi uga kuil Dewi Artemis da agung dakoh kati aok iget pun gat'n ngitong, ge' ini', da gat'n nyembah wak saluruh Asia ge' dunia, aok ayap kaagungan'a." ²⁸ Pas ayo'a dangah hal diah, ayo'a jadi kuat baji ge' ngampak-ngampak, "Aihyolah Artemis, dewi sok Efesus!" ²⁹ Lalu, kota dakoh gat'n ngampahnu nige kakacauan ge' ayo'a bagalabak samahu-mahu ka gedung kasenian sambil ngarihit Gayus ge' Aristarkhus, sok Makedonia da diu'ta kawan bajalat'n Paulus. ³⁰ Sa', pas Paulus ngate anu maruh wak antara sok karah dakoh, ayo murid kati mambiar'a. ³¹ Bahkan, nyamani pangkhaihyo Asia da bakawan nige'a ngirim nyabuah pusut'n ka ini' ge' baulang kali mamohon ka ini' ya' kati nyarah adup'a ka gedung kasenian dakoh. ³² Maka, sabagian ngampak tarut'n ge' sabagian da lait'n'a, barang kumpulan dakoh ani ka sadat'n kakacauan ge' sabagian aihyo umpat'n ayo'a kati pane jai alasan ayo'a laka utukng bakumpul. ³³ Sabagian umpat'n sok karah dakoh nyimpul Aleksander barang ayo-sok Yahudi laka nyurong'a ka depan, ge' ngalaka Alexander mangkat'n isyarat nige barekng'a ini' bamaksud umas pambelaan wak tura sok karah. ³⁴ Sa', pas ayo'a nganal kalo Aleksander diu'ta sok Yahudi. salama kira-kira dua jam, ayo'a samaan ngampak nige nyiteng sarat'n, "Aihyolah Artemis, dewi sok Efesus!" ³⁵ Ngalaka panitera kota ngadu sok da karah dakoh tanang, ini' nyansana, "Hei ayo-sok Efesus, asi sok da kati pane kalo kota Efesus diu'ta panjaga kuil Dewi Artemis da agung ge' da disah umpat'n rangit? Jadi, barang hal-hal dakoh kati kaat'n gat'n ngabantah, imu' saharus'a tatap tanang ge' kati batindak garupoh. ³⁷ Sa', imu' laka minsakng ayo-sok diah ka diah, da kati marampok kuil ato manghujat dewi ite. ³⁸ Uleh karna dakoh, Demetrius ge' tukang-tukang da samahu-mahu nige'a umpu kaluhan tradap sook, pangadilan gat'n muka ge' ani prokonsul. Kate'a ayo'a mangajukan tuntutan nyiteng tradap da lait'n'a. ³⁹ Barang, sa' imu' manghendaki tarut'n hal da lait'n, hal dakoh kaat'n gat'n nyalesai ka sadat'n sidang rakyat manurut hukum. ⁴⁰ Sa', ite madi ka sadat'n bahaya ya' gat'n nuduh ka samo karusuhan ani diah barang kati ani alasan jai pun da kaat'n ite jalaskan tentang badaput da kacau diah." ⁴¹ Ngalaka ini' muji' hal-hal diah, ini mambubar kumpulan sok dakoh.