1 Bagiko', anilah barabeh ya' nulis kaimu' tantang palayanan ka ayo sok kudus diah. 2 Sabab, iko' pane karelaanmu', da iko' bangga-bangga'a' manganai kupm ka ayo sok Makedonia, dakoh ta, bahwa Akhaya ngasiap umpat'n taun idu ge' samangatmu ta da manggarak nyabagi ayho umpat'n ayo'a'. 3 Tapi ao'a', iko' ngutus ayo age diah ya' kabanggaan kai tantang imu' kati' gat'n ngajadi sia-sia sadat'n hal diah. Nige ladiah, imu' siap sadia samu da laka iko' muji. 4 Sabab, sak nyamani ungan sok Makedonia utuk'ng samu-samu nige' iko' ge' ayo'a' amput imu tinga siap, kai ( kati' palalu agi muji' ka imu) ao' gat'n manyangun karna kayakinan diah. 5 Karna dakoh, iko' bapikir palalu ya' ngalabak ayo age diah anu labih uru kaimu' ge' nyiap pamangkat'n da laka imu' ngajanji idu'. Nige ladakoh, pamangkat'n dakoh siap ya' jadi pamangka'n sukarela, ge inya karna paksaan. 6 Iko' nyansana hal diah; asi da manabur iget ao' ngutupm iget uga, ge asi da manabur karah ao' ngutupm karah uga. 7 Satiap sok harus mangkat'n samu ge' da ini' mutus sadat'n ate'a', inya nige' dukacita ato gat'n makse karna Jabata nyayang sok da mangkat'n nige' sukacita. 8 Ge' Jabata aba' ngalimpah samaan anugrah'a' ka imu' supaya imu' mar umpu samaan kacukupan sadat'n sagala hal ge' bakalimpahan sadat'n satiap pakaraje da bait. 9 Samu ge' da tatulis; " Ini' laka magi-magi'a', Ini' laka mangkat'n ka sok papa, kabanaran-A ao- tatap ya' salama'a'." 10 Mati', Ini' da nyadia bani ka panabur ge' roti sabage pangkuman,ao' nyadia ge' ngalipatganda ta banimu' ya' gat'n nabur ge' ao' ngangkarah asel-asel kabanaranmu'. 11 Imu' ao' gat'n ngangkaya sadat'n samaan kamurahan atemu', da nabo kai ngabangkit ucapan syukur ka Jabata. 12 Sabab, bantuan palayanan diah inya hanya ngancukup kapalaluan-kapalaluan ayo sok kudus, tatapi uga ya' ngalimpah ucapan syukur ka Jabata nabo sok da karah. 13 Nabo bukti palayanan diah, ayo'a' ao' mamulia Jabata karna kataatanmu' ka pangakomu' ka Injil Kristus, ge' ya' samaan kamurahan atemu' sadat'n babagi ka ayo'a' ge' samaan sok. 14 Ge', sadat'n doa-doa ayo'a' ya' imu', ayo'a' ngabungumu' karna kasih karunia Jabata da malimpah ka samomu'. 15 Syukur ka Jabata samo Pamangkat'n-A da kati' aba' gat'n muji!