¹ Mati', Ayo-age, kai' ngate imu' pane tentang anugerah Jabata da ngalaka gant'n mangkat'n jamaat-jamaat ka Makedonia, ² barang ka sadat'n karah ujian panderitaan, balimpah sukacita ge' aso'a kamiskinan ayo'a ngalaka balimpah sadat'n da kaya katulusan ate ayo'a. ³ Iko' basaksi kalo ayo'a mangkat'n sasuai nige kamampuan ayo'a,bahkan marabeh kamampuan'a ka samo karelaan ayo'a sandiri. ⁴ Ayo'a bamohon nige ka kai' aok anugerah ya' turut naap bagian ka sadat'n palayanan ayo-sok da kudus. ⁵ Ge', diahta da ayo'a bulah inya ulah da kai' harap'a, pamule, ayo'a sandiri ka Jabata, lakadakoh kai' ka kahendak Jabata. ⁶ Sa', kai' mandesak Titus, langkina ini' ngalaka mule'a, lakadakoh pulm ini' uga aok ngangkabas karaje anugerah diah ka antara imu'. ⁷ Sa', samu ulah imu' balimpah sadat'n sagala hal, sadat'n iman, nyansana pangetahuan, sagala usaha, ge' sadat'n masemu' tarhadap kai, hendak'a imu' uga balimpah sadat'n anugerah diah. ⁸ Iko' kati muji' hal diah sabage parintah, tapi ya' manguji malalui kasungguhan sok lait'n tentang kaiklasan masemu'. ⁹ Barang, imu' pane anugerah Tuhan ite Yesus Kristus, sa' walopun Ini' kaya, Ini' rela jadi miskindemi imu' supaya malalui kamiskinan-A, imu' jadi kaya. ¹⁰ Ge', sadat'n hal diah iko' mangkat'n pandapatko', hal diah diu'ta' ya' kauntonganmu', da waktu taun angkah'a koh, imu' inya hanya umas, tapi uga bakeinginan ya' umas'a. ¹¹ Sa', mati', nyaklesai uga karaje dakoh supaya sapadan nige karelaanmu' ya' nyalesai jai da ani ka imu'. ¹² Barang, sa' ani kasiapan mangkat'n, pamangkat'n dakoh aok gat'n narima, badasarkan jai da gat'n ayo-sok umpu, ge' inya kati gat'n umpu'a. ¹³ Hal diah inya ya' maringan sok lait'n da mambebani imu, tapi supaya ani kaseimbangan. ¹⁴ Kate'a kalebihanmu' mati' mancukup'a kakurangan ayo'a da kalebihan ayo'a lakadakoh mancukup'a kakurangan imu. Nige lakohta ani kaseimbangan. ¹⁵ Ulah da gat'n nulis ka sadat';n kitab suci, sok da karah ngubu, kati marabeh ge' sok da ngubu iget, kati kakurangan. Pangutusan Titus ¹⁶ Sa' syukur mangkat'n Jabata da mana' sadat'n ate Titus kasungguhan da samu nige da iko' umpu ya'mu'. ¹⁷ Barang, Ini' kati hanya narima anjuran kai', tapi nige kasungguhan'a da aihyo, ini' utukng ka imu' ka samo kahendak'a sadi. ¹⁸ Bariuh ge Titus, kai' ngutus age'a da gat'n puji-puji ka antara samaan jamaat sadat'n hal pamberitaan Injil. ¹⁹ Inya dakoh sadi, ini' uga gat'n nunjuk ayo jamaat ya' anu bariuh kai sadat'n palayanan anugerah diah, da kai' umas ya' minsak kamuliaan mangkat'n Tuhan ge' ya' nunjuk karelaan kai'. ²⁰ Kai' sangat bahati-hati supaya kati ani sok da aok mancela kai' sadat'n hal da sadat'n pamangkat'n aihyo da gat'n ngator kai' diah. ²¹ Kai' barusaha bulah jai da taman, kati hanya sadat'n pandangan talino. ²² Kai', bariuh ge' ayo'a, kai mangutus age kai' da ngalaka sering kai' uji ge' tabukti rajin sadat'n karah hal, talebih agi mati' ini' mangkin rajin karna ini' umpu kayakinan da aihyo tarhadapmu'. ²³ Mati' tentang Titus, ini' diu'ta pasangan ge' kawan karajeko' da aok bamanfaat ya'mu'. sadakng tentang ayo-age ite da lait'n, ayo'a utusan jamaat-jamaat, suatu kamuliaan mangkat'n Kristus. ²⁴ Sa', nujo ka ayo'a, ka tura jamaat-jamaat, bukti kasihmu' ge' kabangaan kai' ka samo imu'.