¹ Karna kai' pane bahwa sak dio, tampat pamadi' ite' ka bumi diah gat'n ngaruboh, ite' ani nyabuah bangunan umpat'n Jabata, nyabuah ramin da kati' gat'n umas nige' barek'ng, da kekal ka surga. ² Salama ite' ani ka sadat'n dio diah, ite' ngeluh karna te' bungu ya' ngiak tampat pamadi' surgawi ite'. ³ Sabab, sak ite' ngiak'a' ite' kati' agi gat'n kat'n talanjang. ⁴ Salama ite' madi ka sadat'n dio diah, ite' ngeluh ge' tabebani karna ite' kati' ngate talanjang tapi bapangiak singga da fana dakoh gat'n nalan wa' idup. ⁵ Mati', Ini' da nganyiap ite' ya' tujuan diah anilah Jabata, da mangkat'n roh ka ite' sebagai jaminan. ⁶ Karna dakoh, kai salalu tabah ge' nganyadari bahwa sa' kai ani ka ramin sadat'n ugan diah, kai ngani ka sato Tuhan. ⁷ Sabab, kai idup gat'n iman inya gat'n pamile'. ⁸ Ao' tatapi, kai tabah ge' labih suka madi' ka sato ungan diah lalu madi' basamu Tuhan. ⁹ Sak karna dakoh, kai barusaha supaya kai bakenan ka -Ini', antah kai madi' ka ramin diah ato madi' ka sato. ¹⁰ Sabab, ite' samaan arus gat'n ngadap ka depan pangkeng pangadilan Kristus, spaya satiap sok kat'n narima agi' hal-hal da gat'n umas sadat'n ugan'a', sasuei nige' jai da nga gat'n melaku, antah dakoh bait atopun jahe'. Palayanan ya' Ngadamai Umpat'n Jabata ¹¹ Karna kai pane arti'a' buut ao' Tuhan, maka kai ngayakin ayo sok. Sak, kai nga nyata ka Jabata ge' iko' baharap nyata uga wa' ate nuranimu'. ¹² Kai kati' barusaha agi' ngamuji-muji adup kai ka imu', tapi kai mangkat'n mu' kasempatan ya' bangga taradap kai. Nige' daladakoh, imu' ao' umpu' jawab'a' ya' ayo'a' da bangga gat'n ha-hal da lahiriah inya gat'n jai da ani sadat'n ate. ¹³ Sak kai kati' jadi umpu kai, hal dakoh anilah ya' da Jabata. Sak kai jadi adup kai, dakoh ya' kapentinganmu'. ¹⁴ Karna kasih Kristus da nguasai kai katika kai ngarati bahwa sak nyungan sok kabis ya' samaan, maka ayo'a' samaan kabis. ¹⁵ Ge', Ini' kabis ya' samaan supaya ayo'a' da idup kati' agi idup ya' adup'a' sadi' , tapi ya' Ini', da nga laka kabis ge' da ngabangkit demi ayo'a'. ¹⁶ Karna dakoh, sajak mati' kai kati' manganal nyungan pun manurut kaadaan lahiriah'a'. Biarpun kai suah nganal Kristus sacara lahiriah,tapi mati' kai kati' agi manilai-A samu dakoh. ¹⁷ Jadi, asi da ani kasadat'n Kristus, ini' anilah ciptaan da bahu. Hal-hal da idu nga balalu, mileklah, hal-hal da bahu ngalaka utuk'ng. ¹⁸ Smaan hal diah anilah umpat'n Jabata, da ngadamai ite' nige' adup'a' nabo Kristus ge' mangkat'n ite' palayanan ngadamai dakoh, ¹⁹ ladakoh sadat'n Kristus Jabata ngadamai dunia nige' Adup'a' sadi', nige' kati' ngangitong sara-sara ayo'a' ge' laka macaya barita pangadamai ka ite'. ²⁰ Jadi kai anilah wakel-wakel Kristus. Jabata Nganujo' pamaba'a' nabo kai. Kai nyansana ka imu' demi Kristus, mangkatlah adupmu' gat'n ngadamai nige' Jabata. ²¹ Ini' da kati'nganal duse laka gat'n umas jadi duse karna ite' supaya ite' gat'n jabata umas taman ka sadat'n Ini'.