¹ Uleh karna dakoh, sejak kai' kaat'n palayanan diah, sabageume kai' narima pamase Jabata, kai' kati bainek ate. ² Barang, kai' nolak hal-hal da basukat'n da manyangun, kati bajalat'n ka sadat'n da licik, ato mamalsukan firman Jabata, malait'nkan nige panyataan da taman, kai' nujo adup kai' sadi ka ate nurani satiap sok ka tura Jabata. ³ Bahkan, kalo Injil kai' masih tatutup uga, Injil dakoh tatutup ya' ayo'a, da aok uhas, ⁴ da ka antara'a, ilah dunia diah ngalaka ngabuta'a pikiran ayo'a da kati pacaya sahingga ayo'a kati kaat'n mile tarakng kamuliaan Injil Kristus, da anilah gambaran Jabata. ⁵ Sa', kai' kati nyarita tentang adup kai' sadi, malait'nkan Kristus Yesus sabage Tuhan ge' adup kai' sadi sabage palayan-palayanmu karna Yesus. ⁶ Karna Jabata, da bafirman, "Kate'a tarakng babalo umpat'n da patakng," ngalaka babalo ka sadat'n ate ite ya' mangkat'n tarakng pangetahuan tentang kamuliaan Jabata da ani ka bahas Kristus Yesus. ⁷ Barang, harta diah kai' umpu ka sadat'n bajana tana' liat supaya kalimpahan kuasa dakoh brasal umpat'n Jabata ge' inya umpat'n adup kai' sadi. ⁸ Kai' gat'n nindas umpat'n sagala sisi, tapi kati tapipet. Kai' bingung, tapi kati putus asa. ⁹ Kai' gat'n nganiaya, tapi kati gat'n ngagat'n. Kai' gat'n nyampak, tapi kati gat'n ngangkuhas. ¹⁰ Kai' slalu minsakng da kabis ka sadat'n Yesus ka sadat'n ungan kai' supaya da Yesus da idup uiga nyata ka sadat'n ungan kai'. ¹¹ Karna kai', da idup diah, slalu gat'n nyerah ka da kabis karna Yesus supaya Yesus da idup uga gat'n nyata ka sadat'n ungan kai' da fana diah. ¹² Ladakohlah da kabis karaje ka sadat'n kai', tapi da idup karaje ka sadat'nmu. ¹³ Tapi aok'a, nige da umpu roh iman da samu, sasuai da ngalaka gat'n nulis, "Iko pacaya, karna dakoh iko nyansana," kai' uga pacaya karna dakoh, kai' uga nyansana. ¹⁴ Sa', kai' pane kalo Ini', da ngalaka gat'n ngangkidup Tuhan Yesus, aok ngangkidup kai' uga bariuh nige Yesus ge' aok minsakng kai bariuh ge imu' ka tura-A. ¹⁵ Sa', samaan hal diah tajadi ya' kapentinganmu' supaya anugerah, da samangkin manjangkau karah sok, kaat'n malimpah ucapan syukur bagi kamuliaan Jabata. Idup uleh Iman ¹⁶ dakohlah sabab'a, kai' kati parnah inek ate. Walopun ungan lahiriah kai' mangkin marosot kaadaan'a, tapi talino batiniah kai' slalu gat'n ngangkabahu ano demi ano. ¹⁷ Sa', panderitaan da nyaan mati' diah, ngaraje bagi kai' nyabuah kalimpahan kekal kamuliaan da marabeh sagala-gala'a. ¹⁸ Kai' kati mamprati'a hal-hal da tile, malait'nkan hal-hal da kati tile. Sa', hal-hal da tile diu ta samantara sadakngkan hal-hal diah kati tile diu ta kekal.