¹ Diu ta kai' mule muji adup kai' sadi agi? ato, ulah mani sok, diu ta kai' perlu surat pujian ya'mu' ato umpat'n imu'? ² Imuta surat kai', da gat'n nulis ka sadat'n ate kai', da gat'n pane, ge da gat'n maca ka samaan sok. ³ Imu' muji' adupmu' ta surat Kristus da gat'n layan ayo kai', da gat'n nulis inya nige tinta, malainkan nige Roh Jabata da idup, inya ka samo loh-loh batu, malainkan ka loh-loh ate talino. ⁴ Yakin samu ge' da kai' umpu tradap Jabata malalui Kristus. ⁵ Inya barati kai', nige adup kai' sadi tapi kamampuan kai' brasal umpat'n Jabata, ⁶ da ngalaka umas imu' mampu jadi palayan-palayan pajanjian da bahu, inya nganang uruf, tapi umpat'n Roh. Barang, uruf dakoh kabis, tapi Roh da idup. Kamuliaan aihyo umpat'n palayan Roh ⁷ Kalo sa', papaya an da minsakng da kabis, da nige uruf-uruf gat'n nulis ka loh batu dakoh utunkng nige kamuliaan, sampe-sampe bangsa Israel kati bisa manatap bahas Musa karna kamuliaan'a dakoh, padahal waktu dakoh ngalaka pudar, ⁸ Inya ta palayanan Roh da gat'n umpu kamuliaan da bahkan labih aihyo agi? ⁹ Barang, kalo sa' palayanan da minsakng hukumanda gat'n umpu kamuliaan, talabih agi palayanan da taman dakoh marabeh ka sadat'n kamuliaan. ¹⁰ Sesungguh'a, jai da uru gat'n nganggap mulia, ka sadat'n hal diah kati agi gat'n mulia karna kamuliaan da malimpah dakoh. ¹¹ Barang, kalo da pudar dakoh utukng nige kamuliaan, talabih agi da kekal dakoh ka sadat'n kamuliaan. ¹² Karna da umpu pangharapan da ulah diah, kai' manggune kabranian da aihyo, ¹³ ge' kati ulah Musa, da mana salubukng ka bahas'a supaya anak-anak Israel kati kaat'n mile pangkabis'a umpat'n jai da pudar dakoh. ¹⁴ Barang, pikiran ayo'a ngalaka gat'n na' ngeras. Sampe ano diah, ka sadat'n pambacaan pajanjian da tuhi, salubukng da samu tatap kati gat'n majaka karna hanya ka sadat'n Kristus salubukng dakoh kaat'n gat'n majaka. ¹⁵ Bahkan sampe ano diah, sa' kitab Musa gat'n maca, nyabuah salubukng nutup ate ayo'a. ¹⁶ Barang, waktu ayo-sok malik ka Tuhan, salubukng dakoh aok gat'n majaka. ¹⁷ Tuhan diu ta Roh ge' ka tampat Roh Tuhan ani, ka teet'n ani kamerdekaan. ¹⁸ Ge', ite samaan, da nige bahas kati salubukngmancarmin kamuliaan Tuhan, sadakng gat'n ngubah ka gambar da samu umpat'n kamuliaan, samu ulah Tuhan, da diu ta Roh dakoh.