E ROH NI EMPUNG WO E ROH ANTIKRISTUS ¹ Patuariku waya i koupus, te’a mouw pa’emanela susur e roh, ta’an ujinouw e roh-roh i ti’i, sapa ku’a re’en nisea se asal waki si Empung; karengan kelaker se nabi-nabi palsu se limentutomi wo minea waki minapekasa eng kaoatan. ² Tuana mouw kita sumine’u e Roh ni Empung: susur e roh si maaku, kaa si Yesus Kristus si mineiy mouw tanume sitou, siasal waki si Empung, ³ wo susur e roh, reiy’ maaku si Yesus, reiy’ asal waki si Empung. E Roh i ti’i nyi’a mouw e roh antikristus wo en tanume nisia e lininga miouw mola, kaa nisia si laa meiy wo en teakan i yi’i nisia si wia mouw eng kaoatan. ⁴ Nikouw kouw asal waki si Empung, oki-oki’ku, wo nikouw kouw kimala mola se nabi-nabi palsu i ti’i; karengan e Roh witu nikouw, e lumantouwla eng kewangko’ ta’an e roh wia eng kaoatan. ⁵ Nisea se asal waki kaoatan; kaa ni’itu nisea se mesesusuiy tanume eng kapualitan-kapualitan eng kaoatan wo eng kaoatan e malingala nisea. ⁶ Nikeiy keiy asal waki si Empung: seiy i te si sumine’u si Empung, nisia si malingala nikeiy; seiy i te si reiy’ asal waki si Empung, nisia si reiy’ malingala nikeiy’. Ni’itu mouw eng kowa’na e Roh eng kaulitan wo e roh makaseipen. ⁷ Patuariku waya i koupus, meiy mouw kita me’upusan, karengan e nupus i ti’i e nasal waki si Empung; wo susur tou si meupusla, si timoumi waki si Empung wo sumine’u si Empung. ⁸ Seiy i te si reiy’ meupusla, nisia si reiy’ makasine’u si Empung, karengan si Empung nyi’a mouw si upus. ⁹ Witu eng kapualitan i yi’i mouw e nupus ni Empung neiy i papaloo’o-loo’ola witu eng keuneran ta, nyi’a i ti’i kaa si Empung si timoke mouw si Oki-Na pengesan wia eng kaoatan, rio kita matou-tou kaa-Nisia. ¹⁰ Nyi’i mouw e nupus i ti’i: Reiy’ nikita si mineupusola si Empung, ta’an si Empung si mineupusola nikita wo si timoke mouw si Oki’-Na tanume em pedamean witu en dosa-dosa ta. ¹¹ Patuariku waya i koupus, sa wona’ si Empung si kasa tuana meupusla nikita, takar e lewo’ sa reiy’ mouw nikita kangkasi me’upusala. ¹² Reiy’la siesa tou tu’u si mekasa mouw lumoo’ si Empung. Sa kita me’upusala, si Empung si minena-ena’ witu nikita, wo e nupus-Na e reiy’ siperoan witu nikita. ¹³ Tuana mouw nikita nu mete’ula, kaa nikita ta minena-ena’ witu si Empung wo Nisia si witu nikita: Nisia si kimarunia mola nikita nu minaka’ato weteng witu e Roh-Na. ¹⁴ Wo nikeiy keiy limoo’ mouw wo sumairi, kaa si Ama’ si timoke mouw si Oki’-Na minamuali Lumelawir eng kaoatan. ¹⁵ Seiy i te si maaku, kaa si Yesus nyi’a mouw si Oki’ ni Empung, Empung si minena-ena’ witu nisia wo nisia si witu si Empung. ¹⁶ Nikita ta simine’u mola wo minemanola e nupus ni Empung wia nikita. Empung nyi’a mouw si upus, wo seiy i te si minena-ena’ witu e nupus, nisia si minena-ena’ witu si Empung wo si Empung si witu nisia. ¹⁷ Witu eng kapualitan i yi’i mouw e nupus ni Empung e reiy’ siperoan witu nikita, nyi’a i ti’i sa wona’ kita makapunyala kaberanian ma’eman witu e nendo paakiman, karengan masuat tanu Nisia, nikita kangkasi kita wia eng kaoatan i yi’i. ¹⁸ Witu e nupus reiy’la si kineide’an: nupus reiy’ siperoan e rume’ila eng kineide’an; karengan eng kineide’an e maali-ali ukuman, wo seiy i te si meide’, nisia si reiy’ lekep witu e nupus. ¹⁹ Nikita ta meupusla, karengan si Empung si kimetare mouw mineupusla nikita. ²⁰ Sa wona’ siesa tou si lumila’: “Niaku ku meupusla si Empung,” wo nisia si mari’iris si patuarina, takar nisia nyi’a mouw si tumetowo, karengan seiy i te si reiy’ meupusla si patuarina linoo’ona, si reiy’ wona’ meupusla si Empung, reiy’ linoo’na. ²¹ Wo em perenta i yi’i eng kina’atoan ta waki Nisia: seiy i te si meupusla si Empung, nisia si lewo’ sa reiy’ kangkasi meupusla si patuarina.