IMAN ENG KUMALALA ENG KAOTAN ¹ Susur tou si ma’eman, kaa si Yesus nyi’a mouw si Kristus, minatoumi waki si Empung; wo susur tou si meupusla Nisia si minapatoumi, si meupusla kangkasi nisia si timoumi waki-Nisia. ² Nyi’i mouw eng kowa’na, kaa nikita kita meupusla se oki-oki’ ni Empung, nyi’a i ti’i sa kita meupusla si Empung ampit matuanala em perenta-perenta-Na. ³ Karengan nyi’i mouw e nupus i wee si Empung, nyi’a i ti’i, kaa nikita kita maki’itla em perenta-perenta-Na. Em perenta-perenta-Na i ti’i e reiy’ wuter, ⁴ karengan em baya se minatoumi waki si Empung, se kimalala eng kaoatan. Wo nyi’i mouw eng kamenangan kimalala eng kaoatan: e iman ta. ⁵ Seiy ku’a re’en si kimalala eng kaoatan, ta’an i te nisia si ma’eman, kaa si Yesus nyi’a mouw si Oki’ni Empung? ⁶ I yi’i mouw Sia si mineiy mouw ampit e rano wo e raa’, nyi’a i ti’i si Yesus Kristus, reiy’kan i te ampit e rano, ta’an ampit e rano wo ampit e raa’. Wo e Rohouw e minee kasairian, karengan e Roh nyi’a mouw eng kaulitan. ⁷ Karengan wawean telu se minee kasairian [witu en sorga: si Ama’, e nuwu’, wo e Roh Kudus; wo en telu nyi’a e nyi’a mouw e nesa. ⁸ Wo wawean telu se minee kasairian wia em bumi]: E Roh wo e rano wo e raa’ wo en telu nyi’a e nyia mouw e nesa. ⁹ Nikita kita simungkul eng kasairian ni tou, ta’an eng kasairian ni Empung e lebe ente’. Karengan en tuana mouw eng kasairian neiy i weela ni Empung tanume si Oki’-Na. ¹⁰ Seiy i te si ma’eman wia si Oki’ ni Empung, nisia si makapunya eng kasairian i ti’i witu en touna; seiy i te si reiy’ ma’eman wia si Empung, nisia si masiwo Nisia mamuali tumetowo, karengan nisia si reiy’ ma’emanla eng kasairian neiy i weela ni Empung en tanume si Oki’-Na. ¹¹ Wo e nyi’i mouw eng kasairian i ti’i: Empung si kimarunia mola em patou-touan kekal wia nikita wo em patou-touan i ti’i e witu eng gorem ni Oki’-Na. ¹² Seiy i te si makapunya si Oki’, nisia si makapunya em petou-touan; seiy i te si reiy’ makapunya si Oki’, nisia si reiy’ makapunya em patou-touan. ¹³ Em baya nyi’a i ti’i ni’i patikkula wia nikouw, rio kouw si ma’eman witu e ngaran ni Oki’ ni Empung, mete’u, kaa nikouw kouw makapunyala em patou-touan kekal. ¹⁴ Wo nyi’i mouw eng kaberanian ma’eman ta wia-Nisia, nyi’a i ti’i kaa Nisia si lume’ele’la en sesombayangen ta, sa kita makiwee wo’o sapa wia-Nisia i ki’it eng kepa’aran-Na. ¹⁵ Wo sa kita mete’u, kaa Nisia si lume’ele’la sapa i te em pengiween ta, takar nikita kangkasi kita mete’u, kaa nikita kita minaka’ato mola e reiy’ sa mina’asa wo’o sapa eng kiniwee ta mola wia-Nisia. ¹⁶ Sa wawean siesa tou limoo’ si patuarina masiwo en dosa, nyi’a i ti’i en dosa reiy’ mapa eiy e maut, satorona nisia si sumombayang wia si Empung wo Nisia si laa meela em patou-touan wia nisia, nyi’a i ti’i nisea, se masiwo en dosa reiy’ mapa’eiy e maut. Wawean en dosa mapa’eiy e maut: tanume e ni’itu e reiy’ i lila’kula, kaa nisia si lewo’ sa reiy’ sumombayang. ¹⁷ Em baya eng kalewo’an nyi’a mouw en dosa, ta’an wawean en dosa reiy’ mapa’eiy e maut. ¹⁸ Nikita kita mete’u, kaa susur tou si neiy i patoumi waki si Empung, si reiy’ masiwo en dosa; ta’an Nisia si neiy i patoumi waki si Empung si kumedirla nisia, wo si lewo’ si reiy’ mete’u lumeler nisia. ¹⁹ Nikita kita mete’u, kaa nikita ta asal waki si Empung wo e minapekasa eng kaoatan witu e wawa’ eng kuasa ni lewo’. ²⁰ Ta’an laa nikita kita mete’u, kaa si Oki’ ni Empung si mineiy mouw wo kimarunia mola em pangartian wia nikita, rio kita sumine’u Si Ulit; wo nikita ta witu Si Ulit, witu si Oki’-Na Yesus Kristus. Nisia nyi’a mouw si Empung si ulit wo si patou-touan kekal. ²¹ Oki-oki’ku, tumegha-teghamouw witu e reiy’ sa mina’asa berhala.