¹ Loo’onouw, kumura eng kaselana e nupus neiy i karuniala ni Ama’ wia nikita, i ka’ayo kita tinotor oki-oki’ ni Empung, wo memang nikita nyi’a mouw kita oki-oki’ ni Empung, Kaa ni’itu eng kaoatan e reiy’ sumine’u nikita, karengan eng kaoatan e reiy’ sumine’u Nisia. ² Patuariku waya i koupus, en teakan nikita kita oki-oki’ ni Empung, ta’an e reiy’pe’ pakaaloo’o-loo’ola sapa eng ka’ada’an ta ee sangali; ta’an nikita kita mete’u, kaa sakawisa si Kristus mapaloo’o-loo’ola en tou-Na, nikita kita laa mamuali masuat tanu Nisia, karengan nikita ta laa lumoo’ Nisia witu eng ka’ada’an-Na eng kauli-ulitna. ³ Susur tou si minee em paarapen i ti’i wia-Nisia, si sumucila en tou masuat tanu Nisia nyi’a mouw si suci. ⁴ Susur tou si masiwo en dosa, si limangkoiy kangkasi e nukum ni Empung, karengan en dosa nyi’a mouw e limangkoiyla e nukum ni Empung. ⁵ Wo eng kete’uan niouw, kaa Nisia si minapaloo’o-loo’o mola en tou-Na, rio Sia rume’i e reiy’ sa mina’asa dosa, wo witu Nisia reiy’la en dosa. ⁶ Kaa ni’itu susur tou si minena-ena’ witu Nisia, si reiy’ masiwo en dosa kasi; susur tou si minena-ena’ masiwo en dosa, si reiy’ limoo’ wo si reiy’ makasine’u Nisia. ⁷ Oki-oki’ku, te’a mouw mewewayala siesa tou tu’u si sumeipla nikouw. Seiy i te si masiwo eng kaulitan nyi’a mouw si ulit, masuat tanu si Kristus nyi’a mouw si ulit; ⁸ seiy i te si minena-ena’ masiwo en dosa, si asal waki si Iblis, karengan si Iblis si masiwo en dosa wakipe’ eng ketarena. I wee e nyi’i mouw si Oki’ ni Empung si minapaloo’o-loo’ola en tou-Na, nyi’a i ti’i rio Sia munengla em pasiwo-siwon – pasiwo-siwon ni Iblis i ti’i. ⁹ Susur tou si neiy i patoumi waki si Empung, si reiy’ mouw masiwo en dosa kasi; karengan em bibit ilahi e minena’ wawean witu nisia wo nisia si reiy’ mete’u sumiwo en dosa, karengan nisia si neiy i patoumi waki si Empung. ¹⁰ E nyi’i mouw eng kowa’na ne oki-oki’ ni Empung wo ne oki-oki’ ni Iblis: susur tou si reiy’ masiwo eng kaulitan, si reiy’ asal waki si Empung, tuanakan kangkasi seiy i te si reiy’ meupusla si patuarina. ¹¹ Karengan e nyi’i mouw e nabar lininga miouw mola wakipe’ eng ketarena, nyi’a i ti’i kaa nikita kita lewo’ sa reiy’ mengengupusala; ¹² reiy’ tanu si Kain, si asal waki si lewo’ wo si minunu’ si tuarina. Wo sapa ku’a re’en eng kinewalianna o sia munu’ nisia? Karengan e reiy’ sa mina’asa pasiwo-siwonna e lewo wo em pasiwo-siwon ni tuarina e nulit. ¹³ Te’a mouw kouw ma’erang, patuari waya, sakawisa eng kaoatan rumi’iris nikouw. ¹⁴ Nikita ta mete’u, kaa nikita kita simoro’ momi waki ghorem e maut kita mineiy witu eng gorem em patou-touan, nyi’a i ti’i karengan nikita ta meupusla si patuari ta. Seiy i te si reiy’ meupusla, nisia si minena-ena’ witu eng gorem e maut. ¹⁵ Susur tou si mari’irisla si patuarina, nyi’a mouw siesa tou mememunu’ tou. Wo kete’uan niouw, kaa reiy’la siesa tou mememunu’ si minena-ena’ makapunya em patou-touan kekal witu eng gorem en touna. ¹⁶ Tuana mouw nikita nu mete’ula e nupus ni Kristus, nyi’a i ti’i kaa Nisia si simarakanola e nyawa-Na i wee nikita; jadi nikita tu’u kita waar sumarakan e nyawa ta i wee se patuari-patuari ta. ¹⁷ Seiy i te si makapunya eng harta eng kaoatan wo maloo’ si patuarina peme’itan eng kakurangan ta’an si makusi’ em pepalen e natena wia si patuarina i ti’i, kumura mouw e nupus ni Empung o toro minena-ena’ witu en touna? ¹⁸ Oki-oki’ku, meiy mouw kita meupusla reiy’ ampit e lelila’an ka’apa ampit e lila’, ta’an ampit em pasiwo-siwon wo witu eng kaulitan. ¹⁹ Tuana mouw nikita nu mete’ula, kaa nikita kita asal waki kaulitan. Tuanakan kangkasi nikita kita toro mangimpenesla e nate ta witu en sinaru ni Empung, ²⁰ karengan sa kita i ture e nyi’a, si Empung nyi’a mouw si lumantouwla eng kewangko’ ta’an e nate ta ampit si mete’ula e reiy’ sa mina’asa wo’o sapa. ²¹ Patuariku waya i koupus, sa wona’ e nate ta e reiy’ mature nikita, takar nikita ta makapunyala kaberanian ma’eman kaa laa metetawila si Empung, ²² wo sapa i te eng kiween ta, nikita ta maka’atola nyi’a waki-Nisia, kaa nikita ta maki’i-ki’itla e reiy’ sa mina’asa em perenta-Na wo masiwo sapa e mekepa’aren wia-Nisia. ²³ Wo nyi’i mouw em perenta-Na i ti’i: rio kita ma’emanla e ngaran ni Yesus Kristus, si Oki’-Na, wo rio kita me’upusala minatoroan ampit em perenta neiy i weela ni Kristus wia nikita. ²⁴ Seiy i te si maki’itla e reiy’ sa mina’asa em perenta-Na, nisia si minena-ena’ witu si Empung wo si Empung si witu nisia. Wo tuana mouw nikita nu mete’ula, kaa si Empung si witu nikita, nyi’a i ti’i e Roh neiy mouw i karunia-Nala wia nikita.