KRISTUS SI PANGELAT NIKITA ¹ Oki-oki’ku, eng kapualitan-kapualitan i yi’i neiyku i patikla wia nikouw, rio kouw te’a masiwo en dosa, ta’an sa siesa tou si sumiwo en dosa, nikita ta makapunya siesa tou paelet wia si Ama’, nyi’a i ti’i Yesus Kristus, si adil. ² Wo Nisia nyi’a mouw si pedamean witu e reiy’ sa mina’asa en dosa ta, ta’an reiy’ witu en dosa ta i te, ta’an kangkasi en dosa ne minapekasa eng kaoatan. ³ Wo nyi’i mouw eng kowa’na, kaa nikita kita sumine’u si Empung, nyi’a i ti’i sa wona’ kita kumi’itla em perenta-perenta-Na. ⁴ Seiy i te si limila’: Niaku ku sumine’u Nisia, ta’an si reiy’ maki’itla em perenta-Na, nisia nyi’a mouw siesa tou tumetowo wo witu nisia reiy’la eng kaulitan. ⁵ Ta’an seiy i te si maki’itla e nuwu’-Na, witu sitou i ti’i e nuli-ulit lekepouw e nupus ni Empung; ampit e ni’itu mouw kita mete’ula, kaa nikita kita witu Nisia. ⁶ Seiy i te si lumila’la, kaa nisia si witu Nisia, nisia si waar tumou masuat tanu si Kristus timou mouw. ⁷ Patuari waya i koupus, reiy’ em perenta weru e neiyku i patikla wia nikouw, ta’an i te em perenta ure em bia mouw nikoo wakipe’ ketarena. Em perenta ure i ti’i nyi’a mouw e nuwu’ lininga miouw mola. ⁸ Ta’an em perenta weru kangkasi neiy i patikkula wia nikouw, em pinakaloo’o-loo’o mola ulit witu Nisia wo witu nikouw; karengan eng kareiydeman eng kasuatan mere’i wo en terang ulit en simena’ mouw. ⁹ Seiy i te si lumila’la, kaa nisia si witu en terang, ta’an si mari’iris si patuarina, nisia si witu eng kareiydeman i ka’ayomi en teakan. ¹⁰ Seiy i te si meupusla si patuarina, nisia si minena-ena’ witu en terang, wo witu nisia reiy’la eng kaseipan. ¹¹ Ta’an seiy i te si mari’iris si patuarina, nisia si witu eng kareiydeman wo matou-tou witu eng kareiydeman. Nisia si reiy’ mete’u wisa em pengeanna, karengan eng kareiydeman i ti’i rimapa mola em berenna. ¹² Niaku ku minatik wia nikouw, heiy oki-oki’, karengan en dosamu niampunganola karengan e ngaran-Na. ¹³ Niaku ku minatik wia nikouw, heiy ama’-ama’, karengan nikouw kouw makasine’u mouw Nisia, si wia wakipe’ eng ketarena. Niaku ku minatik wia nikouw, heiy taretumouw o reraa, karengan nikouw kouw kimala mola e lewo’. ¹⁴ Niaku ku minatik wia nikouw, heiy oki-oki’, karengan nikouw kouw sumine’u si Ama’. Niaku ku minatik wia nikouw, heiy ama’-ama’, karengan nikouw kouw sumine’u Nisia, si wia wakipe’ eng ketarena. Niaku ku minatik wia nikouw, heiy taretumouw o reraa, karengan nikouw kouw ente’ wo e nuwu’ ni Empung e minena’ witu nikouw wo nikouw kouw kimala mola e lewo’. ¹⁵ Te’a mouw kouw meupusla eng kaoatan wo sapa em bitu eng goremna, sa sitou si meupusla eng kaoatan, takar meupusla si Ama’ reiy’la witu sitou i ti’i. ¹⁶ Karengan em baya em bia eng gorem eng kaoatan, nyi’a i ti’i eng kepa’aran e le’ona wo eng kepa’aran em beren ma’an eng katingkeiyan em patou-touan, reiy’ mouw asal waki si Ama’, ta’an i te e waki kaoatan. ¹⁷ Wo eng kaoatan i yi’i eng kasuatan mere’i ampit eng kepa’aranna, ta’an sitou si matuanala eng kepa’aran ni Empung si minena-ena’ matou-tou eng keure-urena. ¹⁸ Oki-oki’ku, e nedo i yi’i nyi’a mouw e nedo kesampetan, wo en tanu lininga miouw mola, siesa tou antikristus si laa meiy, en teakan se timo’orouw kelaker se antikristus. Ni’itu mouw eng kowa’na, kaa e nedo i yi’i e nuli-ulit nyi’a mouw e nedo kesampetan. ¹⁹ Memang nisea se asal witu e nelet ta, ta’an nisea se reiy’ kasa uli-ulit neiy i kaghorem witu nikita; karengan sa sea maka uli-ulit neiy i kaghorem witu nikita, tantu nisea se minena-ena’ mewali-wali ampit nikita. Ta’an eng kapualitan i ti’i e minamuali, rio mamuali pakaloo’o-loo’ola, kaa e reiy’ em baya nisea se kasa uli-ulit neiy i kaghorem witu nikita. ²⁰ Ta’an nikouw kouw minaka’ato mola em peisu’an waki Si Kudus, wo ampit en tuana nikouw nu waya kouw minete’u mola nyi’a. ²¹ Niaku ku minatikla wia nikoo, reiy’ karengan nikouw kouw reiy’ mete’ula eng kaulitan, ta’an awes tare nikouw kouw minete’ula nyi’a wo karengan nikouw kangkasi kouw minete’ula, kaa reiy’la en towo e nasal waki kaulitan. ²² Seiy ku’a re’en si tumetowo i ti’i? Reiy’ ku’a nisia si makelong kaa si Yesus nyi’a mouw si Kristus? Nisia i ti’i nyi’a mouw si antikristus, nyi’a i ti’i nisia si makelong le’os si Ama’ ka’apa tu’u si Oki’. ²³ Karengan seiy i te si makelong si Oki’, nisia kangkasi si reiy’ makapunya si Ama’. Seiy i te si maaku si Oki’, nisia kangkasi si makapunya si Ama’. ²⁴ Wo nikouw, sapa e lininga miouw mola waki ketarena, ni’itu e lewo’ sa reiy’ minena-ena’ witu nikouw. Sa sapa e lininga miouw mola waki ketarena i ti’i e minena-ena’ witu nikouw, takar nikouw kouw laa mena-ena’ witu si Oki’ wo witu si Ama’. ²⁵ Wo nyi’i mouw en ta’ar neiy mouw i ta’ar-Nala nuesa wia nikita, nyi’a i ti’i em patou-touan kekal. ²⁶ Em baya ni’itu ni’i patikku wia nikoo, nyi’a i ti’i en tanume se tou-tou mame’inakut meseseipla nikouw. ²⁷ Karengan witu eng gorem en tou miouw minena-ena’ wawean em peisu’an sinungkul miouw mola waki-Nisia. Kaa ni’itu reiy’ perlu kouw turu’un ne tou walina. Ta’an tanu eng kumura em peisu’an-Na en timuru’ nikouw tanume e reiy’ sa mina’asa wo’o sapa – wo en teturu’anna i ti’i e nulit, reiy’ towo – wo tanu eng kumura Nisia eng ketareanna nu timuru’ mola nikouw, tuana mouw satorona kouw minena-ena’ witu Nisia. OKI-OKI NI EMPUNG ²⁸ Takar en teakan, ee oki-oki’ku, mena’ mouw witu si Kristus, rio sakawisa Sia mapaloo’o-loo’ola en tou-Na, nikita kita maka’ato eng kaberanian ma’eman wo te’a mouw meirang wia Nisia witu e nendo ke’e eiy-Na. ²⁹ Sa wona’ kouw mete’u, kaa Nisia nyi’a mouw si ulit, nikouw kouw lewo’ sa reiy’ mete’u kangkasi, kaa susur tou, si masiwo eng kaulitan, si timoumi waki-Nisia.