¹ Monno, na Ana Bebe nabughe segel aka pittuna, gha'ige karingngi ne sorga dana kira-kira setengah jam mado'ina. ² Monno, zauwa eta pittu malaikat a dede ne arona Mori, monno pittu trompet payada barrada ghidda. ³ Niado, malaikat wede mai monno dede ne altar*, terrege ia pedupaan ammarara; monno barrana ayana mangeda dupa taguna marata oleda tabaya-tabaya ata-ata zingira ne ponnu altar ammarara a ne'ena ne aro takhta netti. ⁴ Monno, mau dupa netti,oleda ne tabaya-tabaya ata-ata zingira,penne ne arou Mori wali limma malaikat netti. ⁵ Niado, malaikat netti nadeke pedupaan monno tau inana monno api ne padekeda wali altar monno tubbage ne ponnu tana; niaka renghewe punni kagurruka na paolena katarraka monno epu. Trompet aullu dukki Trompet akapatana apoghiza ⁶ Ne niawe netti, pittu malaikat aterrena pittu trompet netti apamagana tagu poghi trompetda ghidda. ⁷ Malaikat aullu apoghi trompetna, niaka nadadiwe urra es monno api apakaulana ra'a; monno nalegawe ne ponnu tana, niaka nakarrage sepertouda ponnu tana monno sepertouda hayu-hayu monno nakarrage ngarakua ruta morona. ⁸ Malaikat aka dodana napoghi trompetna, niaka ne'e azama gunung a karrana api atubbage ne'e bonnu dana; monno sepertouda wali bonnu; monno sepertouda wali bonnu najadi ra'a, ⁹ Niaka sepertouda wali makhluk a gha'ina ne bonnudana monno akolena moripa amate, monno sepertouda wali tena papubbukada. ¹⁰ Malaikat katouda poghi trompet, niaka warraka wali langita ia madubbu kalada,wegara zama oborra, monno madubbu netti nadippara sepertouda wali we'e loko monno mata we'e. ¹¹ Ngarana madubbu netti niadona Apsintus. niaka, sepertouda wali ngarakua we'e najadi apsintus monno naluwana ata mate orona we'e netti orona we'e netti narawi mage bana poddu. ¹² Malaikat akapatana poghi trompetna, niaka napaluza sepertouda lodo, sepertouda ghulla, monno sepertouda madubbu naika sepertouda wali ghidda ajadi kapattana, monno sepertouda lodo najadi kapattage monno niakaina ne gede dana. ¹³ Niado, zauwa eta monno renghe a ia keila wikita alera ne tillu-tillu langita, napaneghe monno li'i aki'ina, "lokona,lokona lokonawe ghidda akadanna ne ponnu tana orona punni trompet katoudana malaikat wadde a niapo papoghida."