¹ Duru we aring du arahama ni utahang tahang ni o mating omi noo du ni dei ni olo atena mimihi. ² Duuin e Timotius mi tenengel ba Lahatala omangsing duru ni ahowo i o lap hoo i noo kwaa i aramating med wa i atinoo omdumi med du ei du mi tenengel kreyeng oin Injil Kristus du om mi. ³ Duuin e nami noo didi nami o dang awee ei wa aring susu karang towong dumi duuin e iring di na du ahol wed du piring aring na du muyang. ⁴ Duuin e nami ni yara hama-hama we aring susu karang. Du ubang tei mangsing-mangsing wedee nadu uil-uil ma tara hama aring na i ahol du ara. ⁵ Duuin duru we dumi du naadanang yaha na ahowo duuin e i o atinoo du i a ahol, na boros haai nami ba nami ma kuaata ei du i om adiming duuin e nama ruki du anoo nanudang duuin e. ⁶ Duru ei lewe Timotius ei yaboro ni olap hoo moin o bang mi hoo mating paa noo itihoo i o atinoo ahol ohodana. I na onoo we taroong anoo mani ohodana, ni omdu pi woi hama-hama mong wedee niring di ni woi ahol ni om ma. ⁷ Aring duru we tenangel bala om susukarang towong om mi du i ei oatinoo du puin ni om anoo dumi taawara. ⁸ Wed do mi ni weseng wedee i tahol kuwaa oin Tuhan om mi. ⁹ Wedee mahene yaha otorooin pi med Lahatala ene puin yanoo teleng mana oin noo hama towong ba i ohodanaa oin Lahatala opongadang mi dupuin ei ereeng i ara hama. ¹⁰ Dilele diluwu abulu-abulu ni a om mi dupuin e ni woi niara taloil na ana-aana u taroong kurung araboo taroo duru we wa oatinoo ohodana du pi utaroo ang anoo ana. ¹¹ Wed do mi timing Lahatala duru med Yesus, pi Tuhan. ya niatang puin ni ye abulu mi puin yo lap ma. ¹² Wedee Tuhan Ei i noo weseng abowo med i ukarang ei yaha towong pirinu nu med beng towong ara hama. Duuin didi med pi barapi tara hama mong wedee naba ni araleleng puin wa i ohodana duuin. ¹³ Duuin ei i om a noo du mi oyaha madang madulung ma horong Lahatala med timing opongadang mi puin wa pi Tuhan Yesus med anoo mi med o nami madulung towong arahama-hama puin ahoo om ma om du mi.