¹ Ary gny olon'Israely,gny vondro manontolo,la nandeha agn'efitsy gny Zina tamin'gny volana voalohany;nijano tao kadesy rozy. Tagny Miriana no maty voho nalevy. ² Tsy nisy rano ho an'gny vondrona,noho niaraky nivory hagnohitsy an'i Mosesy voho Arona rozy. ³ Nitaray tamin'i Mosesy gn'olo. Hoy rozy hoee: Soa mare laha maty manahaky gny Israelita namanay maty teo agntrehan'i Yaveh rahahay! ⁴ Nagnino gny fivondronan'i Yaveh no nandesinao mba ho maty aty amin'ty efitsy ity,la rahay voho biby harenay? ⁵ Nagnino iha no nampiakatsy anay niboaby bak'any Egypta nanday anay amin'ity toera mandigny ity? Ingo tsy misy voa,aviavy,voaloboky,na gnampongaben-dagnitsy eto,sady tsy rano hino. ⁶ Sady nienga teo agnatrehan'gny fivondrona i Mosesy voho Arona. Nilitsy teo amin'gny filira amin'gny tsagno lay fihaonan-drozy voho nihohoky sady niseho tamin-drozy tao gny famirapiratsin'gny voninahits'i Yaveh. ⁷ Nivola tamin'i Mosesy i Yaveh voho nanao hoee: ⁸ " Alao gny tehy voho avorio gny fivondrona,iha,voho Arona rahalahinao. Mivolagna amin'gny vatolampy eo amason-drozy,sady magninamba hiboiboiky rano zany. Hamokatsy rano ho gnandrozy bakao amin'gny vatolampy iha,sady tsy maintsy ameanao gny fivondrona voho reo biby fihare mba hinomy zany." ⁹ Nirambesin'i Mosesy bakeo agnatrehan'i Yaveh gny tehy,araky gny nagninan'i Yaveh gnazy mba hatao. ¹⁰ La namory gny olo teo agnatrehan'gny vatolampy i Mosesy voho Arona. Hoy i Mosesy tamin-drozy: "Amizao minjigna,nareo mpitoko. Tsy maintsy hampiboaky rano bak'amin'ty vatolampy ty ho gnanaoreo va rahay? ¹¹ La nananga gny tagnany i Mosesy voho nanango gnindroa gny vatolampy tamin'gny tehy,ka rano be ro niboaky. Nino gny fivondrona,voho reo biby fihary. ¹² La hoy Yaveh tamin'i Mosesy voho Arona: " Fotony tsy natoky na nagnome voninahitsy Ahy ho masy teo amason'gnolon'Israely nareo,la tsy handay gny fiangona agny amin'gny tany ze fa nameako an-drozy nareo." ¹³ Ty toera ty la kehinareo hoe ranon'i Meriba fotony gny olon'Israely la nisamaly tamin'i Yaveh teo,sady naneho gny vatany tamin-drozy ho masy ie. ¹⁴ Nagniraky mpanday hafatsy bakao kadesy ho agny amin'gny mpanjakan'i Edoma i Mosesy: Zao gny safagnin'Israely rahalahinao: Haiko gny aly sarotsy zay fa nahazo anay. ¹⁵ Hainao fa nijotso tagny Egypta reo razanay sady nipetraky tao Egypta naharitsy ela. Nanday anay tamin'gny fahasiahany voho reo razanay avao koa reo Egyptiana. ¹⁶ Lafa nikaiky mare an'i Yaveh rahay,la nahaja feo ie ka nandefa anjely voho nanday anay niboaky bakao Egypta. Ingo,aty Kadesy rahay,tana raiky eto amin'gny faritsy gny taninao. ¹⁷ Mangataky aminao aho mba hagnenganao anay handalo eo amin'gny tabinao. Tsy handalo amin'gny baibo na tanim-boaloboky,na hino gny rano amin'reo lava-dranonao rahay. Handeha egny amin'gny lalamben'gny mpanjaka rahay. Tsy hivio hagnavana na hagnavia rahay traky hiavianay egny amin'gny sisin-taninao." ¹⁸ F a gny mpanjakan'i Edoma namaly gnazy hoee: " Tsy mahazo mandalo eto nareo. Laha mandalo nareo,la ho avy miaraky amin'gny mesa hanafiky anareo zaho." ¹⁹ Sady gny olon' Israely nanao taminy hoe: " Mamakivaky gny lalam-be rahay. Laha mino gny ronono rahay na gny biby fiharinay,la honeranay zany. Engao avao rahay mba handeha antomboky,fa tsy anao raha hafa." ²⁰ Fa namaly gny mpanjakan'i Edoma hoe: " Tsy mahazo mandalo nareo. " Ka avy namango an'Israely gny mpanjakan'i Edoma niaraky tamin'gny tagna maherin'reo miaramila maro. ²¹ Nanda gny hagnenga gny Israely hiampita teo amin'gny sisitanin-drozy gny mpanjakan'i Edoma. Noho zay,la nandeha tamin'gny tanin'i Edoma gny Israely. ²² Ka nenga tao Kadesy gny olo. Gny olon'Israely,gny fivondrona manontolo,nandeha an-tendrombohitsy Hora. ²³ Nivola tamin'i Mosesy voho Arona tao an-tendrobohitsy Hora i Yaveh,eo amin'gny sisitanin'i Edoma. Hoy ie: ²⁴ Tsy maintsy hampisondrea amin'gny olony i Arona,fa tsy hilitsy amin'gny tany ze fa nameako gny olon'Israely ie. Zany la fa samy nitoko nagnohitsy gny safako tao amin'gny ranon'i Meriba nareo. ²⁵ Alao i Arona voho Eleazara gnanany lahy,sady andeso miakatsy agny an-tendrombohitsy Hora rozy. ²⁶ Alao amin'i Arona reo salotsy fisorona ka ampanaovy an'i Eleazara gnanay. Tsy maintsy ho maty Arona noho hampisondrea amin'gny olony agny." ²⁷ Nanao ze nagninan'i Yaveh i Mosesy. Niakatsy tagny an-tendrombohitsy Hora teo amason'gny fivondrona iaby rozy. ²⁸ Nalan'i Mosesy gny salony fisoronan'i Arona Sady nampanaoviny an'i Eleazara anakin-drozy. Maty teo an-tampon-tendrombohitra i Arona. sady nijotso i Mosesy voho Eleazara. ²⁹ Lafa jeriny vandrona iaby fa maty i Arona,la nihojy an'i Arona agnatiny gny telopolo andro gny firenena manontolo.