¹ Nivola tamin'i Mosesy voho Arona i Yaveh. Hoy ie hoee: ² " Zao ro fomba,fomba zay agninako ananareo: Safagno gny olon'Israely fa tokony handay aomby vavy kely mena soa eo aminareo rozy,sady mbo tsy nasia enta. 3 Ameo an'i Eleazara mpisoro gny aomby vavy kely. Handay zany agny amonton'gny toby ie,sady hisy olo hamono zany eo agnatrehany. ⁴ Hangalaky kelikely amin'gny lion'zany amin'gny tagnany Eleazara mpisoro voho hamitsiky impito eo nagnatrehany gny tragno-lay fihaona. ⁵ Gny mpisoro hafa la hagnoro gny aomby vavy kely eo amasony. Hagnoro gny hakeliny,gny nofony,voho gny liony miaraky amin'gny tainy ie. ⁶ Ao gny mpisoro hangalaky hazo sedera,hysopa,noho volon'aondry mena,sady hanorak'Zay eo agnivon'gny aomby vavy kely mirehitsy. ⁷ Bakeo la tsy maintsy manao gny salony voho mandro amin'gny rano ie. Sady mba ho afaky handeha eo an-toby,ze hipetrarany maloto zisiky hahariva gnandro ie. ⁸ Ze nagnoro aomby vavy kely la hanasa gny sorony amin'gny rano sady handro amin'gny rano. Hipetraky maloto zisiky hariva ie. ⁹ Gny olo zay malio la hagnajary reo lavenokin'gnaomby vavy kely voho hametraky zany eo amin'gny toera-malio amonton'gny toby. La hohajary hoa'gny fiaraha-monin'gny olon'Israely reo lavenoky reo. Hagnafangaro reo lavenoky amin'gny rano fagnadiova amin'gny fahota rozy,fotony gny lavenoky la bak'amin'gny fagnomeza noho gny ota. ¹⁰ Ze nagnajary gny lavenokin'gnaomby vavy kely la hanasa gny salony. Hipetraky maloto zisiky hariva ie. Zany la ho fomba maharitsy ho an'gnolon'Israely voho an'reo vahiny mipetraky miaraky amin-drozy. ¹¹ Ndra ia ndra ia gny mikasiky fatin'olo la haloto agnatiny fito andro. ¹² Zay olo zay la tsy maintsy magnalio gny vatany amin'gnandro fahatelo voho amin'gnandro fahafito. La halio ie. Fa laha tsy magnalio gny vatany amin'gnandro fahatelo ie,la tsy halio ie amin'gnandro fahafito. ¹³ Ndra ia ndra ia mikasiky fatin'olo,gny vatan'gny olo zay fa maty,sady tsy magnalio gny vatany_ zay olo zay la mandoto gny tabernakelin'i Yaveh. Zay olo zay la ho holany eo amin'Israely fotony tsy nambole tamin'gny rano ho an'gny fahalotoa. Hipetraky maloto ie,la hipetraky aminy gny fahalotoany. ¹⁴ Zao no fomba laha misy olo maty ao an-day. Ze nandeha iaby ao amin'gny lay noho ze fa tao iaby amin'gny lay la haloto agnatiny fito andro. ¹⁵ Gny fipetraha ndraha iaby tsy misy fognony la haloto. ¹⁶ Manahak'zay koa,ndra ia ndra ia agny amonto agny ka mitsapa olo ze mati-meso,na fatin'olon-kafa,na taolan'olo,na lolo-zay olo zay la haloto agnatiny fito andro. ¹⁷ Atavo ho gnanolo maloto zao: Mangala lavenoky bak'amin'gny fagnomeza horoa nohon'gny ota sady afangaroe ao agnatiny siny miaraky amin'gny rano reo. ¹⁸ Hangalaky hysopa gnolo ze malio,hampijobo zany ao agnty rano,ka hamboly zany eo amin'gny lay,eo amin'gny fipetrahan-draha iaby ao agnatin'gny lay amin'reo olo ze eo,sady amin'ze nitsapa gny taola iaby,ze voavano,ze maty,na gny lolo. ¹⁹ Amin'gnandro fahatelo voho amin'gnandro fahafito,gny olo malio la hamboly zany amin'gnolo maloto. Amin'gnandro fahafito gny olo maloto la hagnalio gny vatany. Hanasa gny salony voho handro amin'gny rano ie. Hangnalio ie amin'gny hariva. ²⁰ Fa ze mipetraky maloto iaby,ze mando tsy hagnalio gny vatany__ Zay olo zay la ho lany eo amin'gny fiaraha-monina,nohon'gny fandotoany gny fipetraha masin'i Yaveh. Tsy nambole tamin'gny rano ho an'gny falotoa,hipetraky maloto ie. ²¹ Ho fomba mitohy reo toe-draha reo zany. Ze mamboly gny ranon'gny falotoa la hanasa gny salony. Zay mitsapa gny ranon'gny falotoa la haloto zisiky hariva. ²² Ndra ino ndra ino kasihin'olo maloto la haloto zany. Gny olo ze mikasiky zany la haloto zisiky hariva."