¹ Ka nitaray mikasiky gny olan-drozy gny vahoaky laha nijanjy Yaveh.Nahaja reo olo Yaveh ka nanjary neliky.Nisy bolon'i Yaveh nagnoro gnandrozy voho nangalaky gny sasany tamy reo toby tantsisiny tegny. ² Bakeo la nikaiky gnan'i Mosesy reo vahoaky,ka la nangataky tamin'i Yaveh Mosesy,voho nijano gny bolo. ³ Nikaihy hoe Tabera zay toera zay,fotony nirehitsy teo amin-drozy gny bolon'i Yaveh. ⁴ Nanomboky niaraky nivory tami-gny taranak'Israely gny sasany reo hafa firene.Nagniry gny hihina hany soa mare rozy.Voho nanomboky nitagny rozy vahoakin'Israely ka nanao hoe:"Ia ro hagnome hany ho haninay? ⁵ Tiaronay gny fia nihaninay amizao avao tagny Egypta,reo kaokaombra,reo trahaky,reo tongolo raviny,reo tongolo,voho gny tongolo gasy. ⁶ Amizao lasa gny hanintsika,fotony gny jerintsika la mana toy avao." ⁷ Gny mana la manahaky gny voan-drafy.Manahaky gny diti-kazo. ⁸ Nandeha nagnodidy reo olo sady namory gnanizay.Nilisanin-drozy tami-gny famofaza-bary,nilisany tami-gny leo,nampandevezy tagnaty valagny,voho natao mofo mamy.Nitovy tsiro tami-gny soliky olivavaovao zay. ⁹ Lafa nilatsaky teo ami-gny toby gny andony matognaly,la nilatsaky avao koa gny mana. ¹⁰ Nahaja reo olo nitagny tao ami-gny havorohotan-drozy Mosesy'voho gny johary iaby la teo ami-gny filira ho an-tragno bongony.La neloky mare Yaveh,sady diso tagnatrehan'i Mosesy gny fitaraignan-drozy. ¹¹ Hoy Mosesy tamin'i Yaveh hoe:"Nangino Iha ro mampijaly gny mpanomponao?Nangino Iha ro tsy mazoto agnamiko?Namilanjanao gny enta-mazesats'olo reto iaby reto zaho. ¹² Zaho va namoro olo iaby reto?Zaho va niteraky an-drozy ro ivolagnanao hoe :"Trotro an-tratranao eo manahaky gny fitrotroan'ny baba aja rozy?Tokony handay an-drozy agny ami-gny tany nampagnatenanao hamea gny razamben-drozy va zaho? ¹³ Aia ro ahitako hany hamea olo iaby toy?Mitagny agnamiko eto rozy voho misafa hoe:"Ameo hany ho hany rahay! ¹⁴ Zaho raiky avao tsy afaky hilanja reo olo reo.Lako mare ho gnahy re. ¹⁵ Fotony andesinao manahakizay zaho,la vono zaho henanio,laha tea gnahy Iha,voho alao agnamiko gny halaheliko." ¹⁶ Hoy Yaveh tamin'i Mosesy Hoe:"Hagnansedo oloben'Israely fito-polo bakao zaho.Atavo azo antoky fa olobe voho manam-boninahitsy gny gnolo vatany rozyAndeso ami-gny tragno-lay fihaogna rozy mba hisondry hitranga agnaminao. ¹⁷ Hijotso voho hivola agnaminareo agny Zaho.Hangalaky gnilany aminareo fagnahy agnaminao ao Zaho ka hametraky gnanizay amin-drozy.Samby hilanja gnenta-mavesat'ireo vahoaky hisondry agnaminao rozy.Tsy iha raiky avao handay gnan'izay. ¹⁸ Volagno amin'ireo olo reo hoe:'Manokagna tegna nareo,ho fotony nitomagny nareo voho janjin'i Yaveh.Iha nivola hoe: 'Ia ro hagnome hena hohaninay? Soa taminay gny tany Egypta." Nohon'io Yaveh la hagnome hany ho gnanareo,voho hihina an'izay nareo. ¹⁹ Tsy hihina hena agnatiny raik'andro,roe andro,limy andro,folo andro,na roa-polo andro avao nareo,eo fa hihina hany agnatiny vola raiky manontolo mandra-piboahan'zay egny amin'gny lavak'oronareo.Ho halanareo'zay fotony nanda an'i Yaveh,zay eo aminareo nareo.Nitomagny teo agnatrehany nareo.Hoy nareo hoe:" Nagnino rahay ro nagnenga an'i Egypta?"'''' ²¹ Voho hoy Mosesy hoe:"Miaraky amin'gny olo 600.000 zaho,voho hoy iha hoe:'Hagnome hany ho gnazy reo Zaho agnatiny vola raiky. ²² Tokony hagnome reo aondry miaraky amin'gny aosy voho gny aomby va rahay hampifaly an-drozy? Tokony hihaza gny fia iaby ao agnaty ranomasy va rahay mba hampifaly gnan-drozy. ²³ Hoy Yaveh tamin'i Mosesy :" Boribory va gny tagnako? Zao ho jerinao laha to gny safako na tsy to." ²⁴ Niboaky Mosesy voho nivola tamin'ireo vahoaky gny safan'i Yaveh.Namory loholona fito-polo tamin'ireo vahoaky ie voho nandahatsy an-drozy nangnodidy gny labasy. ²⁵ Nijotso baka amin'gny rahona Yaveh voho nivola tamin'i Mosesy.Nangalaky gny Fagnahy sasany ze tao amin'i Mosesy i Yaveh voho nametraky zany teo amin'reo loholona fito-polo.Lafa nipetraky tao amin-drozy gny Fagnahy,la naminany rozy,fe tamin'io fotoa io avao fa tsy nimpoly sasy. ²⁶ Johary roe ro niegny tao amin'gny toby,kinaiky hoeEldada voho Medada.Nipetraky tao amin-drozy avao koa gny Fagnahy.Gny agnaran-drozy la voasoratsy tao amin'gny lisitry,fe tsy niboaky lay rozy.Ndra zay aza,naminany tao amin'gny toby rozy. ²⁷ Nisy lahitovo raiky tao amin'gny toby nilainday voho nivola tamin'i Mosesy hoe:"Eldada voho Medada la maminany ao amin'gny toby." ²⁸ Josoa gnanaky lahin'i Nona,mpiasan'i Mosesy,raiky tamin'ireo johary voafiliny,la nivola tamin'i Mosesy hoe : "Mosesy tompoko,sakagno rozy." ²⁹ Hoy Mosesy taminy hoe: "Saropiaro nohon'ny gnamiko va iha? Magniry zaho laha mba lasa mpaminany iaby gny vahoakin'i Yaveh voho hametraky gny Fagnahy amin-drozy iaby Ie!" ³⁰ Bakeo Mosesy sy reo loholon'Israely nimpoly tao amin'gny toby. ³¹ Bakeo la nisy tsioky bakany amin'i Yaveh voho nanday papeliky baka agnaty ranomasy agny.Nilavo mariniky toby teo reo,teo amin'gny lala raiky andro tagny amin'gny andaniny voho lala raiky andro tagny amin'gny ankilany.Nagnodidy gny toby reo papeliky tokony roe akiho ambonin'gny tany. ³² Sahira reo olo nagnajary reo papeliky tamin'zany andro zany,gny haly iaby,voho gny andro magnaraky.Tsy misy nagnajary papeliky latsaky gny folo homera.Nizaran-drozy naneran'gny toby iaby gny papelika. ³³ Laha mbo teo agnivon'gny hin-drozy gny hany,laha mbo nitsako rozy,la neloky tamin-drozy Yaveh.Namelin'gnolo tamin'gnarety bevata Ie. ³⁴ Nikaihy hoe Kibrota Havata zany toera zany fotony tao ro nandevegnan-drozy gny olo ze nagniry hena mare. ³⁵ Niala bakagny Kibrota Havata reo olo mba ho agny Hazerota zay nijanognan-drozy.