¹ Fa lasa maloto gny volamena; endrey gny fiovani-gny volamena malio mare! Gny vato masy la niparitaky tan-tsisin-dala tegny iaby. ² Gn'anaky lafo vilin'i Ziona la magneva gny lanjan-drozy ami-gny volamena malio, fa ami-zao rozy la tsy magneva noho gny siny tanimanga, asa-tagnani-gny mpanefy tanimanga rozy! ³ Na gny amboahaolo aza magnomea gny tratrany mba hampinonoa gnani-gn'anany, nefa gn'anak'ampelani-gn'oloko la fa lasa loza be, manahaky gny ostritsa ami-gny tany efitsy agny ⁴ Gny lalani-gny zaza minono la mirekitsy ami-gny lagnilagniny noho gny hetaheta; mangataky hany gny zaza, fe tsy misy ho gnan-drozy. ⁵ Gny nihina hany lafo vily ami-zao la mosare an-dala egny, gny nibeazy nisiky akanjo volomparasy, la miroro ami-gny fako misavoa egny ami-zao. ⁶ Gny fandilova gn'anak'ampelani-gn'oloko la bavata noho gnan'i Sodoma, fa nirinava tagnatini-gny fotoa boribory zay voho tsy nisy nanandra-tagna maba hagnampy gn'azy. ⁷ Gny mpitariky gn'azy la nalio mare noho gny haran-driaky, gny vatan-drozy la manahaky gny safira. ⁸ Gn'endrikin-drozy ami-zao la maiiky noho gny molaly; tsy hay an-dala egny rozy. Gny holitsin-drozy la nirekitsy tami-gny taolan-drozy teo; ka lasa maiiky manahaky gny hazo zay. ⁹ Gny nivinono tami-gny meso la sambatsy mare noho gny matini-gny mosary, ze osa, nilefogny tami-gny tsy fahampiani-gny vokatsy baka an-tonda agny. ¹⁰ Gny tagnani-gn'ampela malemy fagnahy la fa niketriky gn'anany avao; lasa hanin-drozy tagnatini-gny fotoa nandrava gn'anak'ampelani-gn'oloko rozy. ¹¹ Nanoro gny siakiny iaby i Yaveh; nandrotsaky gny helony masiaky Ie. Nandrehitsy bolo ta-Ziona tao mba handevogna gny fiorenany Ie. ¹² Tsy nino gny mpanjakani-gny tany, voho tsy nino gn'oloni-zao tontolo zao, fa afaky nilitsy tami-gny vavahadin'i Jerosalema gny fahavalo na mpanohitsy. ¹³ Nisy zay noho gny fahotani-gny mpangnambara hafatsy ndraiky gny helokini-gny mpisoron-drozy fa nandatsaky gny lioni-gny to tagnivon-drozy tao. ¹⁴ Nivezivezy, goa, tami-gny lala tegny rozy. La vatany voaloto mare tami-zay lio zay rozy ka tsy nisy nenga hikasiky gn'akanjon-drozy. ¹⁵ "Mienga! ry Loto!" hoy gny kiakini-gn'olo tamin-drozy. "Mienga! Mienga! Ka mikasiky!" Ka la nivezivezy rozy; hoy gny vahoaky tami-gny reo firenena teo hoe: "Tsy mahazo mijano eto sasy rozy." ¹⁶ Yaveh mintsy ro nagnaparitaky gnan-drozy; tsy nijery gnan-drozy sasy Ie. Tsy magnomea voninahitsy gny mpisoro rozy, voho tsy nanoro sitraky tami-gny loholo. ¹⁷ Pahina gny masonay, miamby vasoky hagnampy gn'anay; baka ami-gny tilikambo fiambenanay ro nijereanay gny firenena tsy afaky nandomba gn'anay. ¹⁸ Nagnaraky gny lianay rozy, tsy afaky nandeha tami-gny lalanay rahay. Mariny gny fiafaranay voho voaisa gn'andronay, fa ho avy gny fiafaranay. ¹⁹ Gny mpagnenjiky gn'anay la malaky lia noho gny papango an-dagnitsy egny. Nagnenjiky gn'anay tam-bohitsy tegny rozy voho nanao otriky ho gn'anay tan-tany efitsy tagny. ²⁰ Gny fofognay ami-gny vavoronay eo la__gny voahosots'i Yaveh igny__Ie voasambotsy tan-davakin-drozy tao igny; nivinola igny hoe: "Ambanini-gn'alokiny ao ro ahavelo gn'anay ami-gny firenena iaby." ²¹ Mifalea ndraiky miravoravoa, ry gnanak'ampelan'i Edoma, iha ze mipetraky ami-gny tanin'i Oza. Fa ho gn'anao avao koa ro handrosoa gny kapoaky; ho mamo iha voho hampitanjaky gny vatanao. ²² Ry gn'anak'ampelan'i Ziona, fa hifara gny fandilova gn'anao, tsy hagnitatsy gny sesitaninao Ie. Kanefa ry gn'anak'ampelan'i Edoma, handilo Ie; hanaro gny fahotanao ie.