¹ Iaho la olo nahita fahoria tam-banini-gny tsorakazoni-gny siakin'i Yaveh teo. ² Nitinarikiny ndraiky nampandehaniny tami-gny maiiky iaho fa tsy tami-gny mazava. ³ Azo antoky fa namaliky gny tagnany hanohitsy gn'ahy avao Ie, tagnatiny tontolo andro. ⁴ Nataony malazo gny nofotsiko ndraiky gny holitsiko; nitinapakiny gny taolako. ⁵ Nananga fahirano hanohitsy gn'ahy Ie, voho nihodidigniny raha mafaitsy ndraiky raha sarotsy iaho. ⁶ Nametraky gn'ahy tami-gny polasy maiiky tao, manahaky gny fa maty fa ela Ie. ⁷ Nananga manda nagnodidy gn'ahy Ie ka tsy afaky nilay Iaho. Nataony mavefatsy gny rojoko ⁸ voho na la mikaiky mare ndraiky mikaiky lomba aza Iaho, la ampitsignini-gny fivavako. ⁹ Nibahagnany tami-gny manda vita tami-gny vato voapaiky gny lalako; nataony ho meloky gny lalako. ¹⁰ Manahaky gny bera miamby hanafiky gn'ahy tampoky Ie, liona ami-gny fietahany ao; ¹¹ Naviony gny lalako nataony niavaky tana iaho. ¹² Nagnenja gny liliny Ie voho nametraky gn'ahy manahaky gny kendrini-gny ana-diliny. ¹³ Nandefa gny voako tami-gny reo ana-diliny tami-gny fipetrahani-zay tao Ie. ¹⁴ Lasa tahirim-pihehea ho gnani-gn'oloko iaby iaho, rahani-gny fandatsan-drozy tontolo andro. ¹⁵ Nantsehiny fangilia iaho voho nitineriny hino raha mahafaty. ¹⁶ Nitinorotorony tami-gny tsila-bato gny hiko; natosikiny tagnaty lemboky tao iaho. ¹⁷ Nala tami-gny fiadagna gny fagnahiko; halignoko gny atao hoe hafalea. ¹⁸ Ka la hoy iaho hoe: "Levo gny faharetako voho manahaky gnani-zay koa gny fagnantenako am'i Yaveh." ¹⁹ Tiarovo gny fahoriako ndraiky gny riorioko, gny raha mahafaty ndraiky gny raha mangily. ²⁰ Tiaroko avao zay voho mitagnondriky agnaiko ao iaho. ²¹ Fa tiaroko zay ka la mana fagnantena iaho. ²² Gny hatea tsy miovan'i Yaveh la tsy misy fiegnenany voho tsy misy fiafarany gny fiferegnesam-pony, ²³ vaovao isaky marandray reo; bavata gny fatokianao. ²⁴ "Yaveh ro lovako," hoy iaho, noho zay la hagnantegna gn'Azy iaho. ²⁵ Yaveh la soa ho gnany ze miamby gn'Azy, ho gnany ze mila gn'Azy. ²⁶ Soa gny miamby am-pitsigna gny fandomban'i Yaveh. ²⁷ Soa ho gnan'olo gny handesany gny zioga tami-gny fahatanorany. ²⁸ Ao ie hipetraky raiky am-pitsigna, lafa apetraky agnaminy eo zay. ²⁹ Ao ie hametraky gny vavany ami-gny lemboky egny__vasa hisy gny fagnantena. ³⁰ Ao ie hagnomea gny fignfignany gnany ze namango gn'azy, voho ao ho antsiky fahafaham-baraka ie. ³¹ Fa tsy handa gn'antsika zisiky amparany gny Tompo, ³² fa na la mahavy alahelo aza Ie, la hana fiferegnesam-po araky gny hamaro gny hateany tsy mivaliky. ³³ Fotony tsy mampahory gn'am-pony ao na mampijaly gn'anak'olombelo Ie. ³⁴ Gny magnitsakitsaky gny gadra iaby an-tany etoy, ³⁵ gny manda gny to ho gnani-gn'olo agnatrehani-gn'Agnabo mare, ³⁶ gny manda gny to ho gnani-gn'olo raiky__la tsy ekeni-gny Tompo gny raha manahaky gnani-zay! ³⁷ Ia ro nivola ka niseho zay, laha tsy hoe nagnenky gnani-zay Yaveh? ³⁸ Moa tsy avy ami-gny vavani-gn'agnabo igny mare va ro hiaviani-reo loza ndraiky gny soa? ³⁹ Manahoa ro hitaraignani-gn'olo velo iaby? Manahoa ro ahafahani-gn'olo mitaray mombani-gny sazini-reo fahotany? ⁴⁰ Andeha tsika handiniky gny lalantsika voho hitsapa gnan-drozy, andeha tsika himpoly am'i Yaveh agny. ⁴¹ Andeha tsika hanandratsy gny fontsika ndraiky gny tagnantsika amin-Dranagnahary an-dagnitsy agny hoe: ⁴² "Nanditsy ndraiky nialy rahay, voho tsy nagnafaky heloky Iha. ⁴³ Nandrakotsy gny vatanao tami-gny siaky Iha voho nagnenjiky gnanay, namono Iha voho tsy naferignay. ⁴⁴ Nandrakotsy gny vatanao tami-gny raho Iha mba tsy hisy vavaka afaky ho tafilitsy. ⁴⁵ Nataonao manahaky gny lo maloto ndraiky niolavy tami-gny firenena teo rahay. ⁴⁶ Magnozo gnanay gny fahavalonay iaby, ⁴⁷ Avy tagnaminay gny havaka ndraiky gny fandriky, gny faharava ndraiky fahapoteha. ⁴⁸ Mitsororoky ranomaso gny masoko fotony rava gn'oloko. ⁴⁹ Handatsaky ranomaso tsy misy fiegnena, tsy misy fihatoa gny masoko, ⁵⁰ zisiky hagnenteany ambany ka ahajery baka an-dagnitsy egny Yaveh. ⁵¹ Miteraky alahelo ho gn'ahy gny masoko nohoni-gn'anak'ampelani-gny tanako iaby. ⁵² nihinazani-gny favaloko manahaky gny voro iaho; nihinazan-drozy tami-gny tsy misy antony iaho. ⁵³ Natorakin-drozy tagnaty lavaky iaho voho nitinorakin-drozy vato, ⁵⁴ voho nirinaraky rano gny lohako. Hoy iaho hoe: "ho maty iaho!" ⁵⁵ Nikaiky gn'agnaranao, baka ami-gny halalikini-gny lavaky ao iaho, ry Yaveh. ⁵⁶ Janjinao gny feoko lafa nisafa iaho hoe: "Ka manampy gny sofinao ami-gny kaiky lombako." ⁵⁷ Nagnariniky Iha tami-gn'andro nikaihako gn'Anao; hoy iha hoe: "Ka mavaka." ⁵⁸ Tompo o, nagnaro gn'aliko Iha, nagnavotsy gn'aiko Iha! ⁵⁹ Ry Yaveh, jerinao gny raty nataon-drozy tagnamiko; tsarao gn'aliko. ⁶⁰ Jerinao gny tsy fagnasian-drozy dikany, gny teti-draty iaby nataon-drozy tagnamiko__ ⁶¹ janjinao gny latsan-drozy, Yaveh, ndraiky tetikin-drozy iaby tagnamiko. ⁶² Gny sognini-gny ze mitsanga manohitsy gn'ahy, ndraiky gny fiampangan-drozy, la niavy tagnaty tontolo andro. ⁶³ Henteo gny fomba fipetran-drozy ndraiky fitsanganan-drozy bakeo; mandatsa gn'ahy ami-gny hiran-drozy rozy. ⁶⁴ Valio araky ze nataon-drozy rozy, Yaveh. ⁶⁵ Hataonao tsy megnatsy gny fon-drozy! Ho amin-drozy eo gny fagnamelohanao! ⁶⁶ Magnenjiky gnan-drozy an-kasiaha Iha voho mamotiky gnan-drozy ambanini-gny lagnitsy ao, Yaveh!