¹ Nanaro gn'anak'ampelan'i Ziona tambanini-gny rahoni-gny siakiny tao gny Tompo. Nariany baka an-dagnitsy egny tami-gny tany gny famirapiratan'Israely. Tsy nahatiaro gny fipetrahan-tombony Ie tami-gn'androni-gny siakiny. ² Fa nitely ndraiky tsy nana fiferignesa tami-gny tanan'i Jakoba iaby gny Tompo. Tami-gn'androni-gny siakiny ro nandravany gny tana mimandani-gn'anak'ampelan'i Joda; tami-gny baraka ro nagnatotany gny fanjaka ndraiky gny mpanapakiny tami-gny tany. ³ Tami-gny siaky mare ro nanapahany gny tsifan'Israely iaby. Nalany tagnatrehani-gny fahavalony teo gny tagnany havagna. Noroany manahaky gny bolo milebaleba mandrapaky gny raha iaby magnodidy gn'azy i Jakoba. ⁴ Manahaky gny fahavalo ro nagnenjagnany gny liliny tagnamitsika, vonona gny hitifitsy gny an-kavagnany. Nivinonony gny iaby la vatany nankato gn'Azy tami-gny laini-gn'anak'ampelan'i Ziona ao; narotsakiny manahaky gny bolo gny siakiny. ⁵ Nanjary manahaky gny fahavalo gny Tompo. Nateliny i Israely. Nateliny iaby gny lapany iaby. Fa nirinavany gny fiarovany fatratry. Natombony gny fisaona ndraiky gny fitagnia tami-gn'anak'ampelan'i Joda teo. ⁶ Nanimba gny tabernakeliny manahaky gny tragno bongo an-jariday Ie. Nirinavany gny fipetrahani-gny fiangona magnetriketriky ndraiky gny meso ta-Ziona tao i Yaveh, fa nataony tsisidikany tami-gny tsy fagnevany gny siakini-gny mpanjaka ndraiky gny mpisoro. ⁷ Nagnary gny alitarany gny Tompo voho nanda gny fipetrahany masy. Nameany tan-tagnani-gny fahavalo teo gny mandani-gny lapany. Nanandratra hiaky tan-tragnon'i Yaveh, manahaky gny ami-gn'androm-panasa voatodro rozy. ⁸ Nanapa-kevitsy gny hanimba gny mandani-gny tanani-gn'anak'ampelan'i Ziona i Yaveh. Nihenjagniny gny taly famentara voho tsy nitandraky gny tagnany tsy handrava gny manda Ie. Nampitagny gny tovon-tany ndraiky gny manda Ie; niara-niropaky reo. ⁹ Niatonta tami-gny tany gny vavahadiny; naropany ndraiky nivinakiny gny hiliny reo vavahady. Gny mpanjakany ndraiky gny reo andriany la tami-gny firenena, tsy misy sasy gny lalagna tsy nahajerea fahita baka am'i Yaveh gny mpagnambara hafatsy. ¹⁰ Nipetraky tam-pitsigna tami-gny tany gny loholoni-gn'anak'ampelan'i Ziona. Nanoraky lemboky tan-dohany teo rozy voho nanao siky fisaona. Nagnondriky gny lohany tami-gny tany gny tsy mahasaky lahin'i Jerosalema. ¹¹ Pahini-gny ranomaso baka agn'aminy gny masoko; mangotiky gny vavoniko; niraraky tami-gny tany gny ta-gnaiko tao nohoni-gny faharingani-gn'anaky ampelani-gn'oloko, gny hamokorani-gny zaza ndraiky gny zaza ami-gny lalani-gny tana egny. ¹² Hoy rozy ami-gny reniny: "Aia gny vary ndraiky gny divay?" laha mokotsy manahaky gn'olo mafery ami-gny lalani-gny tana egny rozy, niraraky tan-tratrani-gny reniny gn'ain-drozy. ¹³ Ino ro azoko volagny agnaminao, ry anak'ampelan'i Jerosalema? Ami-gny ino iha ro ampitoviziko, mba ahafahako mampiono gnanao, ry anaky ampela tsy mahasaky lahin'i Ziona? Gny ferinao la bavata manahaky gny riaky. Ia ro afaky hagnajanga gnanao? ¹⁴ Fa nahajery fahita diso ndraiky tsy magneva ho gnanao gny mpagnambara hafatsinao. Tsy nagnabaribary gny siakao mba hagnampolia gny hanagnanao rozy, fa nagnomea safa diso ndraiky mamitaky ho gnanao rozy. ¹⁵ Gny iaby mandalo an-dala egny la miteha-tagna gnanao. Misitrisitry ndraiky mihifikifi-doha ami-gn'anak'ampelan'i Jerosalema rozy sady misafa hoe: "Fa tsy intoy va tana nikehin-drozy hoe 'hasoava tonga lafatsy igny,' 'Fifalea ho gnani-tany iaby igny'?" ¹⁶ Manoka-bava ndraiky mandatsa gnanao gny fahavalonao iaby. Manao hehy mandatsa ndraiky mihily vaza rozy sady misafa hoe: "Fa natelinay ie! intoy fotoa fa nilinigninay! Nivelo mba hijery gnani-zay rahay!" ¹⁷ Nataon'i Yaveh ze nikinasany atao. Nagnatanteraky gny safany Ie. Nirinavany tsy nisy fiferignesa iha, fa namea alala gny fahavalo mba hifaly agnaminao eo Ie; nasandratsiny gny tsifani-gny fahavalonao. ¹⁸ Nitaray tami-gny Tompo gny fon-drozy, la gny mandani-gn'anak'ampelan'i Ziona! Arotsaho manahaky gny renirano andro voho haly gny ranomasonao. Ka magnomea fitsahara ho gnani-gny vatanao, fitsahara ho gnani-gny masonao. ¹⁹ Mifohava, mitalahoa ami-gny haly, la ami-gny fiandohani-gny fiambena haly! Araho manahaky gny rano agnatrehani-gny tarehini-gny Tompo eo gny fonao. Asandrato ho gn'Azy gny tagnanao ho gnani-gn'ainy gnanakao mokotsy gny hamosare an-joron-dala eo iaby." ²⁰ Henteo, ry Yaveh, hevero ze nanao gnani-zay fomba zay. Moa va tokony ihina gny naboaky gny sarotrony gn'ampela, la gn'anaky nikinarakarany? Moa va tokony ho vonoy ami-gny fipetraha masini-gny Tompo ao gny mpisoro ndraiky gny mpagnambara hafatsy? ²¹ Samby miroro ami-gny lembokini-gny lala eo gny tanora ndraiky gny antitsy. Tontani-gny meso gny somonjarako ndraiky gny pamarakiko; nivinononao tsy misy kiferignay rozy. ²² Nikinaikinao, manahaky gny nikaihanao gn'olo ho ami-gn'andro firavoaravoa, nagnodidy gn'ahy iaby gny horokoroko, tami-gn'androni-gny siakin'i Yaveh la tsy nisy afaky nilay na tafaboaky velo; ze fa nikinarakarako ndraiky nibeziko, la naringani-gny fahavaloko.