¹ Tana niantsiky olo tami-zay igny la mipetraky raiky ami-zao. Lasa manahaky gny mpanday vata ie, na la firenena nahery aza. Ie ro mpanjaka ampela tami-gny firenena reo, fe nitinery tami-gny fagnandevoza androany. ² Mitagny ndraiky midradradradra ie ami-gny haly, voho manakotsy gny fignafignany gny renomasony. tsy nisy tami-gny reo tea gn'azy mba nampiono gn'azy. Nivaliky agnaminy gny namany iaby. Lasa fahavalony rozy. ³ tafarani-gny fahantra ndraiky fahoria, la nalefa ho sesitany i Joda. Mivelo ami-gny firenena reo ie voho tsy mahita fitsahara. Gny mpagnenjiky gn'azy iaby la nanahatratra gn'azy tami-gny fahakivia. ⁴ Misaona gny lalan'i Ziona fotony tsy misy na raiky aza avy ami-gny reo lolo voatondro. Lao gny vavahady iaby. Mifoay gny mpisorony. Malahelo mare gny tsy mahasaky lahy voho ie la agnaini-gny fahoria ao tanteraky. ⁵ Lasa tompony gny reo fahavalony; nimaro gny reo fahavalony. Nampahorian'i Yaveh ie noho gny reo fahotany maro. Gn'anany maliniky reo la lasa babo ami-gny fahavalony agny. ⁶ Niala tami-gn'anakampelan'i Ziona gny hasoan-tarehy. Lasa manahaky gny serfa tsy mahajery akata gn'anak'andriany reo, voho mandeha tsy hery agnatrehani-gny mpagnenjiky gn'azy rozy. ⁷ Ami-gn'androm-pahoriany ndraiky tsy hanagnany fialofa, la ahatiaro gny hanagnany lafo vily iaby nanagnany tami-gn'androny fa ela i Jerosalema. Lafa tonta tan-tagnani-gny fahavalony reo teo gn'olony, la tsy nisy nagnampy gn'azy. Nahajery gnan-drozy gny fahavalony voho nihehy tami-gny faharavany. ⁸ Nanota bavata Jorosalema, noho zay, la nalam-baraka manahaky gny raha maloto ie. Gny iaby nagnomea voninahitsy gn'azy la manao tsisidikany gn'azy ami-zao zisiky nahajerean-drozy gny fitanjahany. Mifoay ie voho miezaky miodiky. ⁹ Lasa naloto tam-banny zipony tao ie. Tsy nametsevetsy gny ho aviny ie. Namparihy gny fiantontany. Tsy nisy na ia na ia nagnahery gn'azy. Nitaray ie hoe: "Henteo gny fahoriako, ry Yaveh, fa nanjary maro la vatany maro gny fahavalo. ¹⁰ Nametraky gny tagnany tami-gny hanagna lafo vily reo iaby gny fahavalo. Fa nahajery gny firenena nilitsy tami-gny fipetraha masy tao ie, na la fa nibaikoanao tsy hilitsy ami-gny polasini-gny fiangonanao ao aza rozy. ¹¹ Mifoay iaby gn'olony iaby reo la nila mofo rozy. Natakalo mofo gny hanagna lafo vily mba hagnampoly gn'ain-drozy. Henteo ry Yaveh, ka diniho iaho, fotony lasa raha fahatany iaho. ¹² Tsy misy dikany agnaminareo va, nareo iaby ze mandalo? Henteo ka ao ho jerinareo laha misy alahelon'olo manahaky gny alahelo misy agnamiko, liany zay nampijalean'i Yaveh gn'ahy tami-gn'androni-gny hasiahani-gny siakany. ¹³ Baka ami-gn'agnabo agny ro nandefasany gny bolo tami-gny taolako, voho nahazo gn'azy zay. Namelatsy harato ho gnani-gny tomboko Ie voho nagnampoly gn'ahy. Nataony lao ndraiky reraky avao iaho. ¹⁴ Gny ziogany reo fandikan-dalako la narohiny niaraky tami-gny alalani-gny tagnany. Nampifandrambesy voho napetraky tan-tsoroko teo reo. Nandavo gny heriko ie. Nameani-gny Tompo ho an-tagnan-drozy eo iaho, ka tsy tafatsanga. ¹⁵ Nampisamboaravoara gny johary maheriko nandrova gn'ahy gny Tompo. Fa nikaiky gny fiangona hanohitsy gn'ahy ie mba hamotiky gny johariko matanjaky. Nagnitsakitsaky gn'anak'ampela tsy mahasaky lahin'i Joda tami-gny famiazam-boaloboky tao gny Tompo. ¹⁶ Mitagny iaho noho gny raha reo. Gny masoko, mitsororoky ami-gny masoko gny rano fotony lavitsy gn'ahy gny mpagnahery tokony hampiakatsy gny fiaignako. Lao gn'anako reo fotony naharesy gny fahavalo. ¹⁷ Namelatsy gny tagnany i Ziona; tsy nisy na ia na ia nagnahery gn'azy. Nibaiko i Yaveh fa ze magnodidy gnan'i Jakoba la tokony ho fahavalony. Raha maloto amin-drozy i Jerosalema. ¹⁸ Marina i Yaveh, fa iaho ro nialy hanohitsy gny liliny. Mijanjingna, nareo ry olo iaby, voho henteo gny alaheloko. Lasa babo gny tsy mahasaky lahiko ndraiky gn'olo maheriko. ¹⁹ Mikaiky gnani-reo namako iaho, nefa namitaky gn'ahy rozy. maty tan-tana tao gny mpisoroko ndraiky gny loholoko, laha nila hany hagnampoly gn'ainy rozy. ²⁰ Ingo, ry Yaveh, fa agnainy fahoria ao iaho, voho mangotiky gny vavoniko, torotoro agnaiko ao gny foko, fotony la vatany nialy vatany iaho. Ambaliky egny, la nampahory gny gnany regny meso, tsy misy hafa- tsy fahafateza an-tragno ao. ²¹ Nahaja gny fitaraignako rozy, fe tsy nisy nagnahery gn'ahy. Nahaja gny fahoriako gny fahavaloko iaby voho falifaly rozy fa vitanao zay. Fa nanday gn'andro nampagnantenainao Iha; voho ao rozy ho lasa hanahaky gn'ahy ami-zao. ²² Ao gny haratian-drozy iaby ho avy agnatrehanao eo. Ataovo manahaky gny nanovanao gn'ahy noho gny fahotako iaby rozy. Maro gny fitaraignako ka mokotsy gny foko.