¹ Tiarovo, ry Yaveh, ze nahazo gn'anay, henteo ndraiky vetsevetseo gny barakanay. ² Nafalo ho gnani-gny vahiny gny lovanay; gny tragnonay ho gani-gny firenena hafa. ³ Lasa kamboty rahay, kamboty ray, voho gny reninay la manahaky gny mpanday vata. ⁴ Tsy maintsy mandoa volafoty ho gnani-gny rano hinominay rahay, voho tsy maintsy mandoa volafoty vo mahazo gny hatanay. ⁵ Gny magnenjiky gn'anay la mariny afaranay; mokotsy rahay voho tsy mahajery fitsahara. ⁶ Fa nanolo-bata ho gnan'i Egypta ndraiky Asyriana rahay mba ahazoa hany sahaza. ⁷ Nanota gny razambenay, voho tsy eo sasy rozy, voho rahay ro mitratra gny helon-drozy. ⁸ Gny andevo ro manjaka agnaminay eo, voho tsy misy hagnafaky gn'anay an-tagnan-drozy eo. ⁹ Manao soro gn'ainay rahay vo mahazo gny mofonay, nohoni-gny meso agn'efitsy agny. ¹⁰ Niha-ma manahaky fata gny holitsay nohoni-gny siaky milebaleba. ¹¹ Voarava gn'ampela ta-Ziona tao, ndraiky gny tsy mahasaky lahy tami-gny tanan'i Joda. ¹² Nahanto tami-gny tagnany avao gn'andriandahy, voho tsy nameam-boninahitsy gny loholo. ¹³ Nitinery hikosoky vary tami-gny fikoseham-bary gny pamaraky, voho gny zaza johary la mivembe milanja hazo. ¹⁴ Niala tami-gny vavahadini-gny tana gny loholo, voho nagnenga gny raha magnenon-drozy gny pamaraky. ¹⁵ Nijano gny hafaleam-ponay voho niova ho fisaona gny tsindrakay. ¹⁶ Nilatsaky baka an-dohanay egny gny sabakam-boninahitsy; loza ho gn'anay, fotony nanota rahay! ¹⁷ Noho zay la lasa narary gny fonay, voho lasa pahina gny masonay, noho gny raha reo la lasa pahina gny masonay, ¹⁸ Fotony gny vohits'i Ziona nitoka petraky, misy amboahaolo mikarenjy agnamin-drozy eo. ¹⁹ Fa Iha, ry Yaveh, la manjaka zisiky amparany, voho Iha la hipetraky ami-gny seza fipetrahanao zisiky ami-gny taranaky afara milimby. ²⁰ Nagnino rahay ro halignonao zisiky amparany? Nagnino Iha ro mahafoy gn'anay tagnatiny andro maro? ²¹ Ampoliano ag'Agnaminao rahay, ry Yaveh, la himpoly. Avaozo manahaky gny taloha gn'andronay__ ²² laha tsy hoe fa niolavinao tanteraky rahay voho la vatany masiaky agn'aminay Iha.