¹ Entalo giva waina n'okulwana kuva waina mu imwe? Ti muunu, mu kwegomba kwanyu okulwana mu bitundu byanyu? ² Mwegomba so mubula: mwita, era mwegomba, awo temusobola kufuna: mulwana era mutabaala; mubula kubanga temusaba. ³ Musaba ne mutaweebwa, kubanga musaba kubbiibi; kaisi mubikolesye okwegomba kwanyu. ⁴ Imwe abakali abenzi temumaite ng'omukwanu gw'ensi niibwo bulabe bwa Katonda? Kale, omuntu yenayena bw'ataka okubba omukwanu gw'ensi yeefuula mulabe wa Katonda. ⁵ Oba mulowooza ng'ekyawandiikiibwe kitumula bwereere? Omwoyo gwe yatyamisirye mu ife gwegomba okuleeta eiyali? ⁶ Naye yeeyongera okugaba ekisa. Kyekiva kitumula nti Katonda alwana n'ab'amalala, naye abawombeefu abawa ekisa. ⁷ Kale mujeemulukukirenga Katonda; naye mulwanenga no Setaani, yeena yabairukanga. ⁸ Musembererenga Katonda, yeena yabasembereranga imwe. Munaabenga mu ngalo, abalina ebibbiibi; era mutukulyenga emyoyo gyanyu, imwe abalina emeeme eibiri. ⁹ Munakuwale, mukubbe ebiwoobe, mukunge: okuseka kwanyu kufuuke ebiwoobe, n'eisaayu lifuuke okunakuwala. ¹⁰ Mwetoowazenga mu maiso ga Mukama waisu, yeena alibagulumizia. ¹¹ Temutumulaganangaku kubbiibi, ab'oluganda. Atumula kubbiibi ku w'oluganda, obba asalira omusango ow'oluganda, atumula okubbiibi ku mateeka, era asalira musango mateeka: naye bw'osalira omusango amateeka, nga toli mukozi wa mateeka, wabula omusali w'omusango. ¹² Eyateekerewo amateeka era omusali w'omusango ali mumu, oyo asoboka okulokola n'okuzikirizia, naye iwe asalira omusango mwinawo niiwe ani? ¹³ Kale imwe abatumula nti Atyanu oba izo twayaba mu kibuga gundi; tulimalayo omwaka gumu tulitunda tuliviisia amagoba: ¹⁴ naye nga temutegeera bye izo Obulamu bwanyu buli nga kiki? Muli lufu, oluboneka akaseera akatono, kaisi ne luwaawo: ¹⁵ we mwanditumuliire nti Mukama waisu bw’ataka tuliba balamu, era tulikola tuti oba tuti. ¹⁶ Naye atyanu mwenyumirizja mu kwekulumbazia kwanyu: okwenyumirizia kwonakwona okuli kutyo kubbiibi. ¹⁷ Kale amanya okukola kusa n'atakola, niikyo ekibbiibi eri oyo.