¹ Kale imwe abagaiga, mukunge mulire olw'ennaku egiizaa ku lwanyu. ² Obugaiga bwanyu buvundire, n'ebyambalo byanyu biriiriibwe enyenje. ³ Ezaabu yanyu ne feeza gitalagire; n'obutalage bwagyo bulibba mujulizi gye muli, bulirya omubiri gwanyu ng'omusyo. Mwakuŋaanyirye ebintu mu naku egy'enkomerero. ⁴ Bona, empeera y'abakozi abaakungula enimiro gy'anyu, gye mulyazaamaanya, ekunga: n'ebiwoobe by'abo abakungula byayingiire mu matu ga Mukama Ow'eigye. ⁵ Mwesanyusya ku nsi, ne muwoomerwa ebinyumu; mwegeizerye mu myoyo gyanyu nga ku lunaku olw'okubbaaga ebya sava. ⁶ Mwasalire omusango okusinga omutuukirivu, ne mumwita; naye tabawakanyirye. ⁷ Kale, ab'oluganda, mugumiinkirizenga okutuusia okwiza kwa Mukama waisu. Bona, omulimi alindirira ebibala eby'ensi eby'omuwendo omungi, abigumiinkiriza, okutuusia emaizi ageidumbi na g'eitogo. ⁸ Era mweena mugumiinkirizenga; munywezenga emyoyo gyanyu: kubanga okwiza kwa Mukama waisu kuli kumpi. ⁹ Temwemulugunyanga, ab'oluganda, mwenka na mwenka, muleke okusalirwa omusango: bona, omusali w'emisango ayemereire ku lwigi. ¹⁰ Mutwale ekyokuboneraku, ab'oluganda, eky'okubonyaabonyezebwa n'okugumiinkiriza, banabbi abatumulanga mu liuna lya Mukama. ¹¹ Bona, tubeeta bo mukisa abaagumiinkirizanga: mwawuliire okugumiikiriza kwa Yobu, era mwaboine Mukama ku nkomerero bw'akola nga Mukama we kisa kingi n'okusaasira. ¹² Naye okusinga byonabyona, bagande bange temulayiranga waire eigulu, waire ensi, waire ekirayiro ekindi kyonakyona naye ekigambo kyanyu niiwo awo kibbenga niiwo awo, n'ekigambo kyanyu ti niiwo awo kibbenga ti niiwo awo; muleke okugwa mu musango. ¹³ Waliwo mu imwe omuntu ali okubbiibi? asabenga. Waliwo asanyuka? ayembenga eby'okutendereza Katonda. ¹⁴ Waliwo mu imwe omuntu alwaire? ayetenga abakaire b'ekanisa; bamusabirenga, nga bamusiigaku amafuta mu liina lya Mukama waisu: ¹⁵ n'okusaba kw'okwikirirya kulirokola omulwaire, no Mukama waisu alimuyimusya: era oba nga yakolere ebibbiibi birimutoolebwaku. ¹⁶ Kale mwatuliraganenga ebibbiibi byanyu mwenka na mwenka, musabiraganenga, kaisi muwone. Okusaba kw'omuntu omutuukirivu kusobola inu mu kukola kwakwo. ¹⁷ Eriya yabbaire muntu eyakwatiibwe byonabyona nga ife, n'asaba inu amaizi ereke okutonya; amaizi n'egatatonya ku nsi emyaka esatu n'emyezi mukaaga. ¹⁸ N'asaba ate; eigulu ne litonyesya amaizi, ensi n'emelya ebibala byayo. ¹⁹ Bagande bange, omuntu yenayena mu imwe bw'akyamanga okuva mu mazima, omuntu n'amala amukyusya, ²⁰ ategeerenga ng'akyusya alina ebibbiibi mu bukyamu obw'engira ye alirokola obulamu mu kufa, era aliboneka ku bibbiibi bingi.