¹ Pae, pahe kutupu vali okunguka kuombenha weku Yesu Clistu. ² Mokonda otchitumino tcho Mphepo oyomunhu ku Yesu Clistu tchandjowola kotchitumino tcho pekalo ya nokokutchua. ³ Pae tcheinha otchitumino nkhu hamatchitchizhili okuninga, mokonda nkhu tchapoyola mokonda yolutu, Huku vetchininga. É watuma Ondeyae muni otchifhefha tcho molutu onduino oluvi, tchile ofheto yopekalo, ya É wangula opekalo kolutu. ⁴ É wetchiningea okunaminina otchitumino tchivilikifhue motue omba tuendeamu, opo hatuende kolutu, tuende Komphepo. ⁵ Ombenha vaka kolutu takamifhemi novipuka viokolutu, ya ombenha vaka Komphepo, vakae movipuka ovio Mphepo. ⁶ Mokonda okututa kolutu okutchua, ya okututa Komphepo omunhu nombebua; ⁷ mokonda okututa kolutu ovita ku Huku, mokonda kakufue kotchitimino tcha Huku, ya nge kavilifha. ⁸ Ombenha ve kolutu nge kavaningi oholo ya Huku. ⁹ Pae, kamukolutu, muko Mphepo, aele pua Omphepo ya Huku ika monue. Ya umu ngahaningi Omphepo ya Clistu, kafue Mue. ¹⁰ Okutia Clistu umonue, olutu luatchua kopekalo, ya Omphepo inomunhu pouhunga. ¹¹ Pua Omphepo ya Inguinha atutilifha Yesu kuomba vatchua ika monue, É engu atutilifha Clistu kuomba vatchua nae makapawo omunhu konue ovatchue mokonda Yomphepo Yae, endji ika monue. ¹² Pae, vango vange, tuvalevali hawo kolutu, kokutia tukaeo kolutu. ¹³ Mokonda, ngamuombe kolutu, mamukatchua; ya, Komphepo ngamuleke ovituwo vio kulutu mamukakako. ¹⁴ Mokonda ombenha vandekua noMphepo yaHuku, ombo oyonde vaHuku. ¹⁵ Mokonda kamutambulile omphepo youpika mouhumbe vali, ya muatambula ompheo yokutchitua, putcho tuifhana okutia: Abba, Tate! ¹⁶ Omphepo yatcho muni ininga oumbangi nompheo yetu kutia tuyonde va Huku. ¹⁷ Okutia tuyondele, tuyonphinga, tuyomphinga zha Huku, ya tuyomphinga na Clistu, okutia tuamuna ohali Nae tuningeni okutia naotue tuhumbue pamu Nae. ¹⁸ Mokonda ndjituta okutia ohali youye ombu omupe kaitokale okuhetekua nouhamba ombu matukavilikifhua. ¹⁹ Mokonda omutemo voholo wouye okuvelela okuvilikifhua koyonde vaHuku. ²⁰ Mokonda ouye vavilulua, hakoholoyawo muni, okoholo inguinha euvilula, kekevelelo . ²¹ okungie okutia ouye watcho uyowoke moupika nomokukelengua vanhembe keyowo oyoumbala woyonde va Huku. ²² Mokonda tutchi okutia ouye auhe uyiyima ya utea oyongembia zhokuyomuka napahe. ²³ Hakutchope, naotue, omba poupe tuno ovipuka Oyomphepo okupakuako naotue muni tuyiyimea mokati, monkhando yapua matukevele okutia Huku etchininge tuele oyondewae , etuhukulule lumu okufhuapo. ²⁴ Mokonda pokukevela tuyowolua. Pae tchi tukevela tchiningue, nkhe katchiyamunua, pae tchi tukevela okutia tchimunike, napahe katchiyamunua, pae ongapi tchikevelua tchi tchamunua kaya? ²⁵ Ya ngatuvele tcheinha hatuyamuno, nombili matuvele. ²⁶ Ngotchikuawo, Omphepo nayo ituvatela kokupoyola kuetu. Mokonda katutchi tchi nge matulikuambele, ya Omphepo yatcho muni ikumbeako otue kokuyiyima ku nge hama kukolovoka. ²⁷ É ulola oyongungo , uí oyondunge zho Mphepo mokonda É ukumbeako kuombenha vafuapo, koholo ya Huku. ²⁸ Tutchi okutia ovipuka avihe vitalavayea pamu otchiwa tcha ombenha vahole Huku, kuombenha vaifhanua koholo Yae. ²⁹ Mokonda, ombenha nkhuveiwe kaya, Wevepaka vaele otchifhefha tcho Ndeyae, opó Aile otchiveli pokati kovangu vae. ³⁰ Ombenha vapakuako, nawo eveifhana. Ombenha aifhana, ombo nowo Evehungike. Ombenha ahungika, nawo evehambukifha. ³¹ Otchitchi nani nge hamatchipopiwa kovipuka embeo? Kutia Huku ukotue, oiwa nge makaila otchita naotue? ³² É ingu hatengele Ondeyae muni, ya Aandje otue atuhe, ongapi nge Hemekutupa ovipukaviatcho avihe? ³³ Oiwa nge makaeta otchininamikila kovahopua va Huku? O Huku pé ahungika. ³⁴ Oiwa mekemungula? Clistu é atchua potchikonda tchetu, ya otchinene vali kutcho nkhe vatutila. É okokulimioko kua Huku, nae utukumbiako. ³⁵ Oiwa nge meketuyapulula kotchihando tcha Clistu? ohali, ovituhi, okulewa, ondjala, ouhepi, ine okutchua? ³⁶ Ngatchi tchahonikua: MokondaYoe, tuavatchue ovitenha viatcho avihe. Tuahetekua poyontchui potchevei tchapua zhilekelua. ³⁷ Kovipuka embio avihe, tuvapikululi mokonda ya Inguinha etuhanda. ³⁸ Pae mbafuapo okutia petupu vali ngeaile okutchua, ngaile omunhu, ngaile oyondju, ngaile ouhona, ngaile ovipuka ovipe, ngaile imbi mavikeyako, ngaaile oyonkhono, ³⁹ ngaile oulala, ngaile kohi unene, ngaile otchipuka tcheinha tchaningua nge katchindjifha kotchihando tcha Huku, tchi tchiku Yesu Clistu Tate Kulu Yetu.