¹ Vango Ine kamutchi, okutia otchitumino tchivifha omuzhiu monkhando yapua é enomunhu? Pae ndjipopia kovanthu omba vei ovitumino. ² Mokonda, kotchitumino, omukai omukupua vazhika komuzhiu wae nkhe enomunhu; pae omuzhiu wae ngatchui, é makaka ayowoka kotchitumino tcho lukupo. ³ Pae, é ngakupua nomuzhiu omukuawo nkhe omuzhiu wae enomunhu, é makatiwa vala nomuzhiu heli wae. Pae, omuzhiu wae ngatchui, é makaka ayowoka kotchitumino, okuningea okutia ahamakaila omuvaki pua akakupua nomuzhiu umo vali. ⁴ Pae, vango vange, naonue nkhu muali ovatchue kotchitumino, kolutu lua Clistu, okuningea okutia muhungame kumu, tcho otchi, Oinguinha atutilifhua kuombenha vatchua, tuninge ovipuka imbi vianhita ku Huku. ⁵ Mokonda tchi nkhu tukolutu, oyoholo oyombi, oviokulondolua notchitumino, nkhu viendea momalutuetu tuninge ovipuka imbi mavitutua kokutchua. ⁶ Pae, pahe tuayowoka kotchitumino. Tuatchuea kutcheinha tuli oyonkhuatua, pae tutalavaye ovipuka ovipe ovio koMphepo, ya ahamaile oukulu wotchitumino. ⁷ Otchitchi matukapopia pae? Otchitumino putcho muni opekalo? Pó aye. Pae, ami nge hikeive vali opekalo ahaile mokonda yotchitumino. Mokonda ami nge hiyeiwe okupelela, omokonda yotchitumino tchi tchapopia okutia : Hokapelela. ⁸ Pae opekalo, okuhitilila poluvezhi lhapewa notchizhilika, otcho tchandjetela ovipelelo ovingi. Mokonda ngahakuka otchitumino, nge kakuna opekalo . ⁹ Ami poupe nkhu ndjika henatchitumino, pae otchizhilika tchitcheya ami ehaka mopekalo. ¹⁰ Otchizhilika, tchi nkhu nge tchaeta omunhu, atchipinguluka okutchua kuami. ¹¹ Pae opekalo, yahitilila poluvezhi mokonda yotchizhilika, yankhengelela. Ya mokonda yotchizhilika, yandeka. ¹² Pae, otchitumino tchafuapo, ya otchizhika tchafuapo, tchipouhunga ya otchiwa. ¹³ Pae, tcheinha nkhu eli otchiwa okutia otcho tchandjetea okutchua? po aye. Ya opekalo, okulivikifha ngopekalo pokati katcheinha nkhu eli otchiwa, kuami tchaila okutchua. Tcho, nkhu tchapopia okutia mokonda yotchizhilika opekalo yeliikifha okuila otchivi, okupomuka oheteko. ¹⁴ Mokonda tutchi okutia otchitumino omphepo, ya ami ndjilutu, mbalandefhua ngo mupika kopekalo. ¹⁵ Mokonda ami tchi ndjininga, otchatchili hifhapo. Mokonda tchi mbahanda okuninga, ami hitchiningi; ya tcheinha hihanda ndjitchininga. ¹⁶ Ya okutia ndjininga tcheinha hihanda, ndjitavela kotchitumino, okutia otchitumno otchiwa. ¹⁷ Ya pahe hami vali ndjininga tcho, opekalo indji ika muami. ¹⁸ Pae ndjitchi okutia kuami, tcho otchi, kolutu luange, kakuka ovipuka oviwa, mokonda oholo yokotchiwa ikuami, ya ami hitchihili okutchininga. ¹⁹ Pae otchiwa tchi mbahanda okuninga, hitchiningi, ya otchivi tchi hihandele tcho ndjitchininga. ²⁰ Pae, okutia ndjininga tcheinha hihande okuninga, po ami hami vali mitchiningi, ya opekalo endjii ika muami. ²¹ Mbaifhapo, pae, muami, otchitumino tchokuhanda okuninga tcheinha eli otchiwa, ya otchatchili otchivi tchelizhika muami. ²² Pae, mokati kange, ndjihambukua kotchitumino tcha Huku. ²³ Apehe ami ndjimuna otchitumino tchelikalela molutu luange, imbi vilua notchitumino otchipe momutue wange. Tcho tchimpha kokuila ounkhuatua kotchtumino tchopekalo tchi tchimolutu luange. ²⁴ Ami ndji muzhiu umu ongondi! Oiwa makandjowola kolutu ondu olokutchua? ²⁵ Epandu oku Huku mokonda ya Yesu Clistu Tate Kulu yetu! ngatchi, mokonda, yange ndji talavayea otchitumino tcha Huku nomutue wange, putcho, nolutu ami ndji talavhayea efhimbiko lho pekalo.