¹ Ami ndjipopia otchatchili ku Clistu; ami hikembe. Oyondunge zhange zhininga oumbangi naami, ko Mphepo endji Yafuapo, ² okutia ndjino luyuma noyogembia embi hazhipu mombungo yange. ³ Pae ami mbahande ami lumu okuila omupopiwa navi nokuyapuka ku Clistu konkhenda yovango vange, omba veli omapanga ange kulutu. ⁴ Ovo ovachilalita. Tchanhemba kuwo okutchitua, ouhamba, oupanga, okuhita motchitumino, okulikuambelea Huku, ya noyonkhano. ⁵ Otchawo ovohe ku kuatuka Clistu kolutu, putcho Huku kuwo avehe, Ngaile omupopiwa nawa té komena. Amém. ⁶ Ya hakutia pamu ondaka yaHuku yapoma. Pae hawo avehe ovoko Ichilaeli vatuka koIchilaeli. ⁷ Nongotchikuawo, havo avehe omba vatuka ku Ambalayau veli otchatchili oyonde vae. Ya, mokonda ya Ichaki, mavakatiwa oyonde vatuka kowe. ⁸ Tcho otchi, oyonde wo kulutu hayonde va HUku. Ya oyonde wo nkhano vahawa konthuko. ⁹ Pae endji ondaka yonkhano: Kouye ombono Ami mikeya, ya Shala makapewa onde umu. ¹⁰ Ya hatcho pé, tchimu vali otchi Lembeka akuata eyumu lha tate yetu Ichaki. ¹¹ Ya noyonde nkhu kaveyayomukua, ya nkhu kaveninga otchipuka tchimu otchiwa, pamu notchivi ( okuningea okutia oholo ya Huku okuendea kokupambangula Kuae atchikakako, ahatchile mokonda yovipuka, atchile mokonda ya Inguinha aifhana), ¹² tcho vetchihelua okutia: Omunene makatalavayela ondele. ¹³ Ngatcho tchahonikua: Ami mbande Chakó ya Echau himuhanda. ¹⁴ Otchitchi tchi matupopi pae? Kuno okuhaka pouhunga kotchivei tcha Huku? Aye! ¹⁵ Pae Huku apopi ku Moichechi: Ami mikaninga okhenda naiñgua Ami mbahanda okuningea onkhenda, ya mikaninga oluembia naiñgua Ami mbahanda okuningea oluembia. ¹⁶ Pae, tcho katchinakua naiñgua ahanda, pamu naiñgua alumbuka, oHuku pé, eno onkhenda. ¹⁷ Pae ovihonikua ku Falawo viatia: Putcho lumu mbekukulamifha, opó Ami ndjivilikifhe kuowe oyonkhono Zhange, ya opó Ena Lhange lipopiwe otchilongo tchatcho atchihe. ¹⁸ Pae, Huku uno onkhenga yaiñgua É ahanda, ya utatamifha iñgua É ahanda. ¹⁹ Pae, owe mukanthia: Palatchi nkhe É ekulupa ayumba komunthu? Pae oiwa enekolefho koholo Yae? ²⁰ Potcho, omuzhiu oweiwa mutavele ngatcho Huku? Otchitchi tchi nge matchipopia onthata kuinguinha eitunga: Palatchi Owe wandinga ngatcho? ²¹ Okutia omutungi kafhuepo kokumama onthata aninge otchima tcho kukuatela ovipuka oviwa, pamu otchima tchokukualua novengi? ²² Ya okutia Huku okuhanda okuvikilikifha oluyuma Luae okuningea okutia oyonkhono Zhae zhiwe, wakuatefha nombili onene ovima violuyuma, okulongelea okutungululua? ²³ ya kutia É nkhu ngeivifha oulombe woumbala Wae kovima vionkhenda, É koumbala alongelie polutenga , ²⁴ ombo yatcho otue, ombenha nae aifana, ahmaile pé owachundeu, nokovipunde? ²⁵ Ngatchi É apopia ku Ocheiya: Ami mikaifhana ombunga yange, indjinha nkhu aheli ombunga yange, okuila ovahandua, ombenha nkhu heli ovahandua. ²⁶ Ya kutia potchivei pueinha nkhu papopiwawo: Onue kamumbunga yange, kó owo mavakaifhanua okutia: Yonde wa Huku omba muno munhu. ²⁷ Ichaiya wapopia okunhempefha ko Ichilaeli: Ngaele pua otchifue tchoyonde wa Ichilaeli okuila ngeheke liomelunga, makukaka otchihupe tchi matchikayowolua, ²⁸ pae Tate Kulu makaninga ondaka Yae kohi yatcho aihe, ondjanga ya okuhulifhapo. ²⁹ Ya, ngatchi Ichaiya apopile: Okutia Tate Kulu yotchimbiola nkhu ngehetuyeka okhi yokuhatavela, nge tuakaka ngovachondoma ya ngetuaila ngovangomola. ³⁰ Otchitchi matukapopia pae? Okutia ovipunde, imbi nkhu havichukie nouhunga, mavakamuna ouhunga, ouhunga kekolelo; ³¹ ya ova Ichilaeli, omba nkhu vachuka notchitumin tchehunga, ahamavetchimuno. ³² Aye palatchi? Mokonda owo kavechukue nekolelo, nkhu vehulilua novinga. owo veliputala kewe lhokuputalua, ³³ ngatchi tchahonikua: Aami ingo mipaka ko Chiyau ewe limu lhokuliputalua, onkhamba imu oyokutua kopekalo. Inguinha makatavela kulio kaka talalekua.