¹ Pae, okuviukifha kekolelo, tunobembua na Huku motchikonda tcha Tate Kulu Yesu Clistu. ² Mokonda Yae, mombembua indjo tuatakamifha. Tualemueamu kokukevela ku Huku etupa komena, okukevela ku matukaka koumbala wa Huku. ³ Hatcho pe, napo tulemueni nokoyohali zhetu, okuiva okutia mohali kukeya okukoleka; ⁴ mokukoleka kukeya okutavela kuetu; ya okutavela kuetu kukeya okukevela komena. ⁵ Okukevela kakuviluka, mokonda otchihando tcha Huku tchivuyulua moyombungo zhetu okukuatelelea Komphepo endji Yafuapo endji tuapewa. ⁶ Mokonda, tchi nkhenkhu tuapoyola, Clistu watchua motchikonda tchomuningi vanavi potchizho tchiwa. ⁷ Mokonda pokukola kuatcho kutupu ingu nge atchuila potchikonda tcha ingu afuapo; tcho, otchi umu okulihaka okutchua pokotchikonda munthu umu omuwa. ⁸ Pae Huku wavilikifha otchihando tchae muni kotue, mokonda Clistu watchua motchikonda tchetu, pua nkhu tuli oyondinga vivi. ⁹ Unene vali pahe tuafuifhuapo komulai Wae, É metuyowola koluyuma lua Huku. ¹⁰ Mokonda pua, nkhutuli ovita, Huku wetuzhile mokonda yokutchua kuonde Yae, unene vali pahe etuninga oupanga matukayowolua mokonda munhu Wae. ¹¹ Hatcho pe, tchimu tualemuea ku Huku mokonda ya Tate Kulu yetu, mokonda Yae tuatambula oupanga umbo. ¹² Mokonda, yomuzhiu umu opekalo yahita mouye, ngotchi kuawo okutchua kuahita mouye mokonda yopekalo. Ya okutchua kuawayalea movanthu vatcho avehe, mokonda vapengefha. ¹³ Mokonda hinde notchitumino, opekalo nkhu imouye, pae opekalo kaipakueko tchi hakuna otchitumino. ¹⁴ Pae, okutchua okutuatuako kuafhimbika na Andau té Ku Moichexi, nakombenha oyopekalo zhawo havafhefhe kokupengefha kua Andau, otchetli otchifhefha tchanguinha nkhu mekeya. ¹⁵ Pae nangotcho, ounongo wotchali hatcho ngo kupengefha. Mokonda, okutia avehe vatchuila motchikonda tchokupengefha kuaumu, unene vali ombembua ya Huku nounongo muwa kombembua yo muzhiu umu pé, Yesu Clistu, vakakefhua kovengi. ¹⁶ Mokonda ounongo hatcho ngo tchituwo tcho yopekalo zho muzhiu umu. Mokonda kotchivei tchimu, okukoyefha kuokungula kueya mokonda yokupengefha okuomuzhiu umu pé; ya kotchivei tchimu, ounongo votchali weya tchi papita ovipuka ovingi ovivi, kokufuifhapo. ¹⁷ Mokonda, okutia okutchua makutumine omukonda yaumu pé, tchingi vali ombenha vatambula otchingi tchotchali ya nounongo vokufuifhapo makukako momunhu mokonda yaumu pé, Yesu Clistu. ¹⁸ Pae, ngatchi ovanthu vatcho avehe vakunguka motchivi tchimu, okufuifhapo kovanthu vatcho avehe kuezhila motchikonda tcha Yesu Clistu. ¹⁹ Mokonda, yokatombo kamunthu umu, avehe vakaeleapo ovaningi vanavi, ngotchikuawo, mokonda yokutavela kua umu, ovengi mavakafuifhifhapo. ²⁰ Ya pae otchitumino tchahita okutia otchivi tchikake. Pae, pueinha opekalo yeliwamãkana, otchali natcho tchiliwamãkana vali unene. ²¹ Tchaningua okutia, ngatchi opekalo yatumina okutchua, notchali natcho ngatchitumine, mokonda tcho kokufuifhapo, komunhu ombo haupu mokonda ya Yesu Clistu, Tate Kulu Yetu.