¹ Pae, otchitchi tchi nge matupopi tcha Ambalayau, omukulu vetu kolutu, etchivafha? ² Mokonda Ambalayau vatavelua kovininga viae, é nge waninga ehunga lho kulilemifha, ya ahamaile komiho a Huku. ³ Otchitchi tchi tchipopia ovihonikua? Ambalayau vatavela ku Huku, ya vatchipewa okufuifhapo. ⁴ Pahe eñgua atalavaya, ofheto yoyombongo helaó, tchaka ngonkhunga. ⁵ Pae, inguinha hatavalavhaya, potchikonda tchatcho, atavele ku Iñgua afuifhifhapo omuningi vanavi, ekolelo lhae ulipewa ngokufuapo. ⁶ Ndiaviti nae upopia onkhano kovazhiu eñgua Huku apa okufuifhapo ahamachuka novininga. ⁷ É vatia: ovakanawa ombenha ovivi viaevelua, ya oyopekalo zhakukilua. ⁸ Omukanawa omuzhiu iñgunha Tate Kulu hape opekalo. ⁹ Pae onkhanu endjo ipopiwa pe kombenha vahita moviyumbo, ine nakombe havahite movhiyumbo? Mokonda otue tuapopia: Ekolelo nkhu lhapewa Ambalayau ngo kufuifhapo. ¹⁰ Pae, ongapi elipewa? Otchi Ambalayau nkhu emuviyumbo ine otchi nkhu heyahita? Nku hatchi ahita moviyumbo, ya otchi nkhu heyahita movhiumbu. ¹¹ Ambalayau vatambula otchilikifha tcho kuhita moviyumbo, tcho nkhu otchilimbo kufuifhapo otchekolelo tchi nkhu enatcho kaya tchinkhu heyahita moviyumbo. Otchiwa tcho tchilikifha tcho tchemuilifha hé yaombenha vatavela, ngale pua havahite movhiyumbo. Tcho tchapopia okutia okufuifhapo wekupewa. ¹² Ya nkhe tchapopia okutia Ambalayau wila hé yokuhita moviumbo, kaile pe ovambenha vahita moviumbo. ngotchikuawo vaila ova ombenha vatezha ovikambo ovie ekolelo lha tate yetu Ambalayau nkhu heyatenga okuhita moviyumbo. ¹³ Mokonda nkhu hamotchikonda tchotchitumino onkhanu yapewa Ambalayau nokoyonde wae, onkhanu yokutia ovo nge vaila oyomphinga zho ouye. Motchikonda tchatcho, weipewa mokufuipo kuekolelo. ¹⁴ Mokonda, okutia omba vaka motchitumino oyomphinga, po ekolelo litupu tchi linatcho, ya onkhano kaichilivile. ¹⁵ Mokonda otchitumino tchieta oluyuma, ya pua hepena otchitumino kapena okuhatavela. ¹⁶ Pehunga yatcho, tcho otchekekolelo, opo onkhano iyende pamu nombembua, ya ipewe avahe oyondele ova Ambalayau. Ya oyonde ombo kapena pe ombenha vei otchitumino, nako kunaombenha veli ovomekolelo lha Ambalayau. Mokonda é ohé yetu atuhe, ¹⁷ ngatchi tchahonikua: Ami mbekuilifha he yovanthu ovengi. Ambalayau nkhu ukotchipala tcha Iñguinha Ku nkhu aomeeka, ó Huku, ingu apaka omunhu kuomba vatchua ya uifhana ovipuka imbi havikako, vikaeko. ¹⁸ Ovolho kunovituhi kovikolo viatcho avihe oviae, Ambalayau okuomeekako nawa wapa Huku otchae tcheinha matchikeya, ya aile he yovanthu ovengi ngatchi tchahonikua okutia: Ngatchi matchikaila oyonde woe. ¹⁹ Ambalayau ahamapoyola kekolelo. Ambalayau anongonoka okutia olutu luae muni nkhu nge ketchizhili okuninga oyondele, mokonda nkhu unomanima 100. É nae wanongonuka okutia pehuli lha Chala nkhu nge kapaningi vali oyondele. ²⁰ Pae, mokonda yonkhano ya Huku, Ambalayau hamaka nkhando nomphata. motchikonda tchatcho, akolekua kekolelo, ya apa olupandu ku Huku. ²¹ É nkhu vaka lumuwa ahiliya okutia Huku tchatchili nkhu memuvilikifha tcheinha emuyekelele onkhano. ²² Pae tcho, natcho nkhu wetchipewa okufuifhapo. ²³ Nkhu katchile pe otchiwa kue tchi tchahonikua okutia Huku wemupa okufuifhapo. ²⁴ Natcho tchahonikililua kotchiwa tchetu, mokonda Huku meketututea kokufuifhapo, otue omba tuatavela ku eñgua Yesu atutila, Tate kulu yetu, kuombenha watchua. ²⁵ Eñgua nkhu apewa ovivi vietu ya atutulifhua opo otue tuviuke ngae.