2
1
Давидлэн псаломез. Малы калыкъёс бугыръясько но выжыос малпасько укылтэм ужъёс лэсьтыны?
2
Музъем царьёс ӝутӥсько но кивалтӥсьёс ӵошен люкасько, Кузё-Инмар но Солэн Помазанникез пумитэ:
3
" Соослэсь жыльыоссэс пазьгом, соослэсь дурэмзэс зӥрпалтом"
4
Инмын улӥсь соосты серектэ, Кузё-Инмар соосты возьытэ вуттэ.
5
Вералоз соослы Аслаз вожпотоназ но Аслаз йыркуреныз вуттоз соосты кышкытэ:
6
"Мынэсьтым Царьме Мон помазать кари Мынам святой Сион гурезям.
7
Кузё-Инмарлэсь верало волязэ. Со шуиз Мыным: "Тон Пие Мынам. Тонэ Мон туннэ вордӥськытӥ.
8
Кур Мынысьтым, но сёто Мон Тыныд наследствое калыкъёсты но пумысеныз пумозяз музъемез но.
9
Горшечниклэсь сосудзэ музэн, кортлэсь бодыен, соосты Тон быдтод но пазьгод”.
10
Озьыен, визьматске, царьёс! Воштӥське, музъем вылысь судьяос!
11
Тыршелэ Кузё-Инмарлы кышкаса но куалекъяса шум потэлэ.
12
Кылзӥське Пилэсь, эн поттэлэ Солэсь вожпотонзэ, малыке шуоно тӥ медам бырелэ сюрес вылады, уго Солэн ӝоген улӟёз вожпотонэз. Шудоесь ваньмыз, Солы оскиськисьёс.