21

¹ Иисус учкыса адӟиз узыръёсты, кудъёсыз ваньбур возённие поно вал асьсэлэсь кузьымъёссэс;

² озьы-ик адӟиз начар палкышномуртэз, солэсь отчы кык лепта коньдон понэмзэ,

³ но шуиз: зэм ик верасько тӥледлы, та начар палкышномурт сётӥз ваньмызлэсь тросгес;

⁴ уго ваньмыз соосыз сётӥзы Инмарлы кузьым асьсэлэн ваньзылэсь, нош со аслэсьтыз ӧжытэзлэсь понӥз ваньзэ, маиз вал сиськыны.

⁵ Ку куд-огъёсыз вераллязы храм сярысь, со пе чебермамын дуно изъёсын но сётэмъёсын, Со шуиз:

⁶ вуозы нуналъёс, куке, мае тӥ адӟиськоды, уз кыль из вылын изэз но; ваньмыз та куашкатэмын луоз.

⁷ Но юазы Солэсь: Дышетӥсь! ку со луоз? но кыӵе пус луоз, ку со быдэсмыны кулэ?

⁸ Иисус шуиз: кышкалэ, тӥледыз медам пӧялэ, уго тросэз лыктозы Мынам нимы улын, вераса, Мон со; но со дыр матын ини: соос сьӧры эн мынэ.

⁹ Куке кылоды ожъёс но бугыръяськонъёс сярысь, эн кышкалэ, уго та ваньмыз луыны кулэ азьло; нош пумыз соку ик уз ву.

¹⁰ Соку шуиз соослы: ӝутскозы калыкъёс калыкъёс вылэ, но царствоос царствооос вылэ;

¹¹ пӧртэм интыосын луозы бадӟым музъем зурканъёс, сьютэм улонъёс, висёнъёс вӧлмозы, кӧшкемыт учыръёс, но инмысь быдӟым пусъёс.

¹² Ваньмыз та азьын тӥледды кутылозы но уйылозы, сётчалозы синагогаосы но тюрьмаосы, но Мынам нимы понна царьёс но кивалтӥсьёс доры нуозы судъёсы;

¹³ та тӥледлы Мон сярысь ивортыны муг сётоз.

¹⁴ Озьыен, эн тырше сюлмады малпаськыны азьласянь, мар вераны,

¹⁵ уго Мон сёто тӥледлы кыл но сыӵе визьнод, кудӥзлы уз быгатэ пумит луыны тӥляд пимитъяськисьёсты.

¹⁶ Тӥлесьтыд куштӥськозы озьы-ик анай-атайёсты, братъёсты, ӵыжы-выжыоты, эшъёсты, но тӥ пӧлысь куд-огдэс виёзы;

¹⁷ вань калыкен адӟемпотостэм луоды Мынам нимы понна,

¹⁸ нош тӥляд йырвылысьтыды одӥг нюжа йырсиды но уз усь,-

¹⁹ асьтэлэн чиданэныды утёды асьтэослэсь лулъёстэс.

²⁰ Ку адӟёды ожгарчиосын котыртэм Иерусалимез, соку тодэ, матын ни солэн куашкан нуналэз:

²¹ соку кин Иудеяын луоз мед пегӟёзы гурезьёсы; кин городын луоз, пот отысь; но кин петпалоз луоз, эн пыр отчы,

²² Уго вуизы пунэмзэ берыктонлэн нуналъёсыз, куке быдэсмоз ваньмыз, мае азьласянь гожтэмын Писаниеын.

²³ Куректон кӧто кышномуртъёслы но нуны нонтӥсьёслы со нналъёсы; уго бадӟым курадӟён луоз музъем вылын но та калык вылэ вожпотон:

²⁴ одӥгъёсыз виемын луозы лэчыт мечъёслэсь, мукетъёссэ пленэ нуозы пӧртэм шаеръёсы; Иерусалим язычникъёсын зӥбет улын луоз, язычникъёслэн дырзы бырытчёзь.

²⁵ Тодметъёс луозы шундыын но толызьын но кизилиос вылын, нош музъем вылын вань калык куалекъялоз но уз тод мар карыны; мореос вылын луозы бугыръяськонъёс но тулкымъёс ӝужыт ӝутӥськылозы;

²⁶ Калыкъёс возьмаса, мар вите дуннеез, йырсазьзэс ыштозы но шокатэк усьылозы, уго ин кужымъёс зуркалозы,

²⁷ соку адӟёзы быдӟым кужымен но данэн пилемъёс вылын лыктӥсь Адямилэсь Пизэ.

²⁸ Куке ваньмыз та ӧдъялоз быдэсмыны, соку шонерске но ӝутэ йыръёстэс, уго матэктӥз ини тиляд мозмонды.

²⁹ Иисус вераз соослы таӵе притча: учке смоковница пу шоры но вань писпуос шоры:

³⁰ куке соослэн пучыоссы бычырало, соку, адӟиськоды, асьтэос тодӥськоды, гужем матын ини.

³¹ Озьы ик тӥ, куке адӟёды верамлэсь быдэсмемзэ, тодэ, Инмарлэн Царствоез матын ини.

³² Зэм ик верасько тӥледлы: ваньмыз бысэсмытчёзь, та выжы уз кошкы;

³³ ин но музъем бырозы, нош Мынам кылъёсы уз быре.

³⁴ Учкелэ, эн пачкатэ асьтэосты трос сиськонэн, курытсэ юонэн но улон-вылон малпанъёсын, со нунал дорады медам вуы шӧдтэк шорысь шуыса,

³⁵ уго со, сете шедем кадь луоз музъем вылын улӥсь вань калыкъёслы;

³⁶ озьыен, сак луэ котькыӵе дырын но вӧсяське, тӥ мед быгатоды кошкыны та лыктӥсь кышкытлыкъёслэсь но Адямилэн Пиез доры лыктыны.

³⁷ Нуназе Со храмын дышетӥз, нош ӝытазе Елеон гурезе кошкылӥз но уйин отын улылӥз.

³⁸ Нош ӵукна вань калык лыктылӥз Со доры храме Сое кылзыны.