20
1
Одӥг нуналэ, куке Со храмын дышетэ вал но Ӟеч Ивор вера вал, дораз первосвященникъёс но книжникъёс но старейшинаос лыктӥзы,
2
но шуизы Иисуслы: вера милем кыӵе властен Тон тае лэсьтӥськод, яке кин Тыныд сётэ со властез?
3
Со шуиз соослы пумитазы: Мон тӥлесьтыд одӥгез сярысь юало, но вералэ Мыным:
4
Иоаннлэн крещениез инмысь-а вал, яке калыкъёслэсьё?
5
Соос ог огенызы вераськылӥзы: шуим ке: " инмысь ", соку шуоз: " малы тӥ ӧд оске солы?"
6
Нош шуим ке: " калыкъёслэсь ", соку вань калык изен милемды зӥръялозы, уго оско, Иоанн пророк шуыса.
7
Соку соос иисуслы шуизы: ум тодӥське кытысь.
8
Иисус шуиз соослы: Мон но тӥледлы уг вера, кыӵе властен тае лэсьтӥсько.
9
Но Со вераны кутскиз притча: одӥг адями виноград сад мерттэм но сётэм сое виноград будэтӥсьёслы, но кошкем кема дырлы.
10
Дыр вуэм бере виноград будэтӥсьёсыз доры рабзэ келям, соос солы мед сётозы шуыса виноградникысьтыз емышсэ; нош виноград будэтӥсьёс, жугиллям рабзэ, но номыр сётытэк келяльлям.
11
Эшшо одӥг рабзэ келям на; нош соос тайзэ но, жугиллям, куаретӥллям но номыр сётытэк келяльлям.
12
Эшшо куньметӥ рабзэ келям на; нош соос тайзэ но, ранить карытчёзь жугиллям, но ульляльлям.
13
Соку шуэм виноградниклэн кузёез: " мар мыным лэсьтыны? Келяло аслысьтым яратоно пиме; оло, сое адӟыса, возьдаськозы ".
14
Нош сое адӟыса, виноград будэтӥсьёс ог огенызы вераськылӥльлям: " та наследник; ойдо виём сое, соку солэн наследствоез асьмеослэн луоз ".
15
Поттӥзы сое виноград садысь но виизы. Мар бен лэсьтоз соосын виноград садлэн кузёез?
16
Лыктоз но виылоз со виноград будэтӥсьёсты, но сётоз виноград садэз мукетъёсызлы. Кылзӥськисьёс шуизы: ноку но озьы уз луы!
17
Нош Иисус, соос шоры учкыса, шуиз: мар луэ та гожтэм: " из, кудзэ строительёс кулэтэм каризы, инъетлэн сэрегезлэн валтӥсь изэз луоз "?
18
Котькудӥз, кин усёз со из вылэ, пальккиськоз, но кин вылэ со усёз, сое нелькоз(пачкатоз).
19
Та дыре первосвященникъёс но книжникъёс муг утчазы, кутыны Сое, нош калыклэсь кышказы, уго валазы, та притчаез Со соос сярысь вераз шуыса.
20
Но, Соэ эскерыса, келязы урод адямиосты, кудъёсыз асьсэды ӟечлыкоен лыдъяны тыршыса, малпазы кутыны Сое кыӵе-ке кылын но собере сётыны кивалтӥсьёслы нош соос Римлэн пуктэм кивалтӥсезлы судить карыны.
21
Соос юазы Иисуслэсь: Дышетӥсь! ми тодӥськом, Тон вераськод но дышетӥськод шонер но Тон нокинлы но уд пыриськиськы, нош шонерак но валамон возьматӥськод Инмарлэсь сюрессэ;
22
кесарьлы налог сётыны кулэ, яке ӧвӧл?
23
Нош Со, соослэсь мискыльзэс валаса, шуиз: малы Тӥ монэ эскериськоды?
24
Возьматэ Мыным динарий: кинлэн со вылын тусбуйыз но гожтэмез? Соос шуизы: кесарьлэн.
25
Со шуиз соослы: озьыен, сётэ кесарьлы кесарьлэсьсэ, нош Инмарлы Инмарлэсьсэ.
26
Калык азьын соос ӧз быгатэ Сое кылын кутыны. Солэн верамызлы паймыса, соос чус улӥзы.
27
Иисус доры лыктӥзы саддукейёс ( соос кулэмысь улӟыса султэмез ӧвӧлэн лыдъяло вылэм ) но Солэсь юазы:
28
Дышетӥсь! Моисей гожтӥз милем, кинлэн-ке кулӥз ке кышнояськем братэз, но со кулоз пинал вайытэк, соку солэн братэз солэсь пал кылем куспалзэ кышно басьтыны кулэ но братэзлэсь выжызэ азьланьтыны кулэ.
29
Сизьым братъёс вылӥллям, нырысетӥез кышнояськыса, пинал вайытэк кулэм;
30
пал кышномуртэн кыкэтӥез куспалъяськем, но соиз но пинал вайытэк кулэм;
31
пал кышномуртэн куиньметӥез куспалъяськем, озьы сизьымез ик, кулӥллямзы, пинал кельтытэк;
32
бӧрысь кышномкрт но кулэм;
33
кудӥзлы соос пӧлысь кулэмысь улӟыса султон дыръя кышномур кышноен луоз, уго со сизьым муртлэн кышноез вал?
34
Иисус шуиз соослы пумитазы: та даурлэн нылпиосыз бызё но кышно вайё;
35
Нош соос, кинъёс лыдъямын луозы ярамонэсь быронтэм Даурын улонлы но кулэмысь улӟыса султонлы, уз но кышнояське, уз но бызе,
36
уз но кулэ ни, уго соос ангелъёсын одӥг радын но улӟыса султонлэн пиоссы луыса, Инмарлэн нылпиосыныз луо.
37
Нош кулэмъёслэн улӟыса султэмзы сярысь вера ачиз Моисей ӝуась тёрновник сярысь веракуз, куке Кузё-Инмарез шуэ Авраамлэн, Исааклэн, Иаковлэн Инмареныз.
38
Инмар кулэмъёслэн Инмаренызы уг луы, нош улэпъёслэн Инмарзы луэ, уго Солэн ваньмыз улэпесь.
39
Та верамезлы куд-огез книжникъёс шуизы: Дышетӥсь! Тон ӟеч верад.
40
Соос ӧз ни дӥсьтэ Солэсь юалляськыны номыр сярысь но. Нош Со шуиз соослы:
41
кызьы верало, Христос Давидлэн Пиез,
42
куке ачиз Давид псаломъёслэн книгаязы вера: " вераз Кузё-Инмар мынам Кузё-Инмарелы: пук Мон вӧзын бур палаз,
43
Тынэсьтыд тушмонъёстэ Тынад пыд азяд куштытозям "?
44
Озьыен, Давид Сое Кузё-Инмар шуэ; кызьы бен соку Со солы пи луэ?
45
Куке кылзэ вал вань калык, Со шуиз Аслаз дышетскисьёсызлы:
46
сак луэ книжникъёслэсь, кудъёсыз ярато ветлыны кузь дӥсьёсын но ярато ӟечбуръяськыны кенешъёсын, пукыны нырысетӥ интыосын синагогаосын но юон-шулдыръяськонъёсын,
47
кудъёсыз пал кышноослэн ваньбурзы вӧзын уло но чеберъяськыса кема вӧсясько; соосты бадӟым суд вите.