9

¹ Нырысетӥ заветын валэктэмын вал Инмарлы служить карон сярысь но музъем вылын пуктэм святилище сярысь, ² уго нырысетӥ скиния лэсьтэмын вал тазьы: отын вал святильник но ӵектэм няньёсын ӝӧк, кудӥз нимаське вал "святой" инты.

³ Кыкэтӥ завеса сьӧрын вал "Святойлэсь но святой" нимаськись скиния, ⁴ кудаз вал: зарни кадильница, но заветлэн ковчегез, кудӥз котькуд ласянь зарниен шобыртэмын, но со пушкын маннаен зарни сосуд, но Ааронлэн сяськаяськем бодыез, но заветлэн скрижалиосыз, ⁵ Ковчег вылын - данлэн херувимъёсыз, соос бурдъёсынызы шобыртылӥзы заветлэн ковчегезлэсь пытсэтсэ, нош али та сярысь пыр-поч вераны кулэ ӧвӧл.

⁶ Тазьы лэсьтэм бере, нырысетӥ скинияе котькыӵе нуналэ, Инмарлы служить карыны, пырылӥзы священникъёс,

⁷ нош кыктэтӥяз - одӥг пол араз, первосвященник гинэ, но котьку вирен, кудзэ со вайылӥз ачиз понна но калыклэн тодытэк лэсьтэм сьӧлыкъёсыз понна.

⁸ Таин Святой Дух возьматэ, усьтымтэ на шуыса святилищее сюрес, куке вань на нырысетӥ скиния.

⁹ Та - туала дырлэн образэз, кудаз кузьымъёс но жертва вайёнъёс, уг быгато соосты ваисьёслэсь совестьсэс совершённой лэсьтыны. ¹⁰ Та, сиён - юон но пӧртэм пыласьконъёс сярысь мугорлэн быдэсъянъёсыз юнматэмын вал тупатон дыр вуытчёзь.

¹¹ Нош Христос, азьланяз луоно ӟечлыкъёслэн Первосвященникез, лыктӥз скинияен, кудӥз бадӟымгес но совершённойгес, но киын ӧвӧл лэсьтэмын, озьыен та дуннелэн со уг луы. ¹² Со святилищее ошпиослэн но куакечъёслэн виренызы ӧз пыры, нош Аслаз Вирыныз одӥг пол пырӥз, но пумтэм дауръёслы ваиз мозмытон.

¹³ Нош ошпиослэн но куакечъёслэн вирзы но ветыллэн сутэм пенез мугор вылэ пазьгыса саптаськемъёсты святой каре ке, но сётэ ке соослы чылкыт мугор, ¹⁴ соку Христослэн Вирыз, Кудӥз Вечной Духен ваиз Асьсэ Инмарлы, изъянтэм жертваез кадь, сюзялоз асьмелэсь совестьмес быронэ нуись ужъёслэсь, улэп Инмарлы служить карон понна!

¹⁵ Соин ик Со - выль заветлэн Посредникез, Аслаз кулонэныз, нырысетӥ заветын лэсьтэм йыружъёсты искупить кариз, пумтэм дауръёс ӵоже наследник луыны отемъёс мед басьтозы шуыса кыл сётэмез.

¹⁶ Уго кинлы гожтэмын завещание, завещать карем солэн луэ соку гинэ, ку кулэ завещание гожтӥсь, ¹⁷ соин ик завещание гожтӥсь кулымтэ на ке, завещаниелэн нокыӵе но кужымез ӧвӧл.

¹⁸ Тӥни малы нырысетӥ завет виртэк юнматэмын ӧй вал,

¹⁹ уго Моисей, калык азьын законлэсь вань заповедьёссэ вераса, басьтӥз ошпиослэсь но куакечъёслэсь вирзэс но вуэн сураса, льӧль-горд ыжгонэн но иссоп будосэ веттылыса пазьгиз книгаез но вань калыкез, ²⁰ вераса:"Тани заветлэн вирыз, кудӥз сярысь тӥледлы Инмар заповедь сётӥз вал".

²¹ Со озьы ик вирен пазяз скинияез но Инмарлы служить карон ваньзэ посудаосты.

²² Законъя ваньмыз ик вирэн чылкытаське но вир кисьтытэк уг луы прощение.

²³ Озьыен, инмысь кадь лэсьтэмъёс, чылкытамын луыны кулэ та жертваосын, нош ачиз инмысез - соослэсь ӟечгес.

²⁴ Соин ик Христос ӧз пыры киын лэсьтэм святилищее, кудӥз тупа зэмосэзлы, нош инэ пыриз, али ик Инмарлэн ымныр азяз султыны асьмеос понна. ²⁵ Со инэ ӧз пыры, тросс пол вайыны Ассэ жертвае, кызьы первосвященникъёс муртлэн вирыныз котькуд аре пыро святилищее, ²⁶ озьы луысал ке, Солы дунне кылдон дырысен тросс пол курадӟёно луысал, нош Со одӥг пол, вакытъёслэн пумаз, лыктӥз Аслаз жертваеныз быдтыны сьӧлыкез.

²⁷ Кызьы адями одӥг пол кулыны кулэ но со бере суд азьн султыны,

²⁸ озьы ик Христос но, басьтӥз тросэзлэсь сӧлыкъёссэс, одӥг пол вайыса Ассэ жертвае, но Со уз лыкты ни кыктэтӥзэ сьӧлыкъёсты вылаз басьтыны, нош мозмытыны лыктоз Сое витӥсьёсты.