10

¹ Вуоно закон ӟечлыкъёслэн вужерзы гинэ луэ, нош ачиз быдэсак зэмлык уг луы. Ноку но уг быгаты лэсьтыны совершённой соосты, кинъёс арысь аре ваё одӥг кадь жертваос. ² Озьы ке ӧй луысал, соку жертва ваемысь дугдысалзы, уго жертва ваисьёс, одӥг пол чылкытатӥськем беразы, сьӧлыкъёссы сярысь ӧй ни сюлмаськысалзы.

³ Нош жертва котькуд аре тодаз вайытэ сьӧлык лэсьтэм сярысь, ⁴ малыке шуоно ошпиослэн но куакечъёслэн вирзы нокызьы но сьӧлыкъёсты быдтыны уг быгаты.

⁵ Соин ик дуннее пырыкуз Христос вера:" Жертваез но кузьым сётонэз Тон кулэ ӧд кар, нош мугор дасяд Мыным. ⁶ Тылын сутон жертваос но, сьӧлык лэсьтэм понна жертваос Тыныд ярантэмесь.

⁷ Соку Мон шуи: Тани, Мон лыктӥсько, кызьы гожтэмын книгаын Мон сярысь - быдэстыны Тынэсьтыд волядэ, Инмаре". ⁸ Нырысь Со вера:" жертваосты но, кузьымъёсты но, жертвасутонъёсты но, сьӧлык лэсьтэм понна но жертваосты, кудъёсыз законъя ваемын, Тон кулэ ӧд кары, но соос Тонэ шум уг потто". ⁹ Собере Со вера: "Тани, Мон мынӥсько быдэстыны Тынэсьтыд волядэ Инмаре". Со воштэ нырысетӥзэ, кыктэтӥзэ юнматон понна.

¹⁰ Инмарлэсь волязэ быдэстэменыз, ми освятится кариськимы Иисус Христослэсь мугорзэ одӥг пол жертвае ваемен.

¹¹ Котькудӥз священник нуналлы быдэ служение лэсьтэ но тросс пол вае одӥг кадь жертваосты, кудъёсыз ноку но уг быгато быдтыны сьӧлыкъёсты.

¹² Нош Со одӥг жертва ваиз сьӧлык понна но пыраклы пуксиз Инмарлэн бур палаз, ¹³ со дырысен Со возьма, ку Солэсь тушмонъёссэ понозы Солэн пыд азяз.

¹⁴ Уго Со одӥг пол жертва ваеменыз пыраклы лэсьтӥз освятить каремъёсты совершённоесь.

¹⁵ Та сярысь асьмелы ивортэ Святой Дух но, вераса: ¹⁶ "Тани завет, кудзэ юнмато соосын со нуналъёс бере, вера Кузё-Инмар: Мон поно Аслэсьтым законъёсме соослэн сюлэмазы но соослэн малпанъёсазы гожто ¹⁷ но соослэсь сьӧлыкъёссэс но йыружъёссэс тодам уг ни вай".

¹⁸ Нош кытын сьӧлыкъёс простить каремын, отын кулэ ӧвӧл соос понна жертва ваёнъёс.

¹⁹ Озьыен, вынъёс, асьмеослэн вань бере дӥсьтонмы пырыны святилищее Иисус Христослэн Вирыз пыртӥ, выль но улэп сюресэтӥ, ²⁰ кудзэ Со выльысь усьтӥз асьмелы завеса пыртӥ - Аслаз мугорыз пыртӥ. ²¹ Асьмелэн вань быдӟым Священникмы Инмарлэн коркаез вылын,

²² соку ойдолэ лыктылом чылкыт сюлэмын, тырмыт осконэн, вир пазяса сюзяломы сюлэмъёсмес, ваньмызлэсь уродэзлэсь мар вал сюлэм пушкамы но, миськыса мугормес дун вуэн, ²³ палэнэ кожылытэк, тыршом возиськыны оскиськыса улон борды,уго Кыл Сётӥсь оскымон.

²⁴ Ойдолэ ог огмылы сак кариськыса улом, мылкыдмес ӝутыса яратонлы но ӟеч ужъёслы, ²⁵ ум кельтэ асьмелэсь собранниосмес, кызьы дышизы куд огез, нош тужгес тыршомы мылкыдмес ог огмылэсь ӝутыны, адӟыса, Инмарлэн нуналызлэсь матэктэмзэ.

²⁶ Уго ми, басьтыса шонерлыклэсь валанзэ, сьӧлык лэсьтӥськомы ке асьмелэн мылпотэмъя, соку со сьӧлыкъёсты жертва уз ни искупить кар. ²⁷ Соку асьмелы кыле на возьманы гинэ кышкыт судэз но тыллэсь вожпотонзэ, кудӥз дась ньылыны Инмарлы пумитъяськисьёсты.

²⁸ Моисейлэсь законзэ палэнтӥсез, кык яке куинь свидетельёс азьын, жалятэк виё ке вал, ²⁹ кызьы тӥ малпаськоды, макем секыт вӧсь карон вите сое, кин ӵыжа Инмарлэсь Пизэ но уг лыдъя Заветлэсь освятить карем Вирзэ святыняен, но благодатьлэсь Духсэ ултӥя?

³⁰ Ми тодӥськом Сое, Кин шуиз: "Пунэмзэ берыктон, Мон киын, Мон пунэмзэ берыкто, шуэ Кузё-Инмар". Эшшо но:"Кузё-Инмар судить кароз Аслэсьтыз калыксэ".

³¹ Кышкыт улэп Инмарлэн ки улаз шэдьыны!

³² Тодады вае нырысетӥ нуналъёстэс, куке тӥ дышетон басьтыса, курадӟёнъёсты адӟыса сылыны быгатӥды быдӟым нюръяськонын, ³³ асьтэос ултӥянъёс но пачкатонъёс пӧлын, мукетъёсызлы серемес луыса, юрттылӥды соослы, кинъёс адӟё сыӵе ик курадӟёнъёс.

³⁴ Уго тӥ висъялляды мынэсьтым курадӟёнме мон пытсэт улын пукыкум, нош тӥлесьтыд ваньбурдэс лушкакузы но тӥ шумпотонэн пумитады, тодыса, тӥляд вань шуыса инмын ӟечгес но бырисьтэм ваньбурды.

³⁵ Озьыен, эн кельтэ асьтэлэсь сэзь луондэс, кудзэ вите быдӟым кузьым.

³⁶ Тӥледлы кулэ чидан, Инмарлэсь волязэ быдэстыса, басьтыны кыл сётэмез, ³⁷ уго эшшо ӧжыт гинэ, туж ӧжыт гинэ, но Лыктӥсь лыктоз, уз мога.

³⁸ Шонерлыко адями осконэн улэп луоз, нош кин шонскоз, со Мынам лулылы ярантэм луоз. ³⁹ Нош ми ӧвӧл соос пӧлысь, кин шонаське но кулонние мынэ, нош ми лулмы мозмон понна осконын сылӥськомы.