11

¹ Оскон - кыл сётэмез витён но адӟыны быгатонтэмлы юн оскиськон.

² Вашкалаос осконзы пыр басьтӥзы благословение.

³ Осконэн тодӥськом, дунне кылдытэмын Инмарлэн кылыныз шуыса, озьыен адӟыны быгатоно кылдӥз адӟыны быгатонтэмлэсь.

⁴ Осконэн Авель Инмарлы жертва вайиз, Каинлэсь ӟечгес,- осконэз пыртӥ солы верамын, со шонерлыко шуыса, малыке шуоно Инмар ӟечкыласа басьтӥз солэсь кузьымъёссэ. Осконэн со кулэм бераз но уг дугды верамысь.

⁵ Осконэн Енох ӝутэмын вал, кулонэз адӟытэк, со музъем вылын ӧй ни вал, уго Инмар басьтӥз сое, малыке шуоно со инме ӝутскемезлэсь азьло ик ивор басьтӥз, Инмарлы ярамон луиз шуыса.

⁶ Нош осконтэк Инмарлы яраны уг луы, уго Инмар доры лыктӥсь оскыны кулэ, Со вань шуыса но Сое утчасьёслы дано кузьымъёс сётоз.

⁷ Осконэн Нойлы азьласянь верамын вал со сярысь, мар уг на адӟиськы, но верамлы оскемезъя, аслысьтыз семьязэ утён понна лэсьтӥз ковчег. Соин со дуннеез осудить кариз, но оскон пыртӥ шонерлыклэн наследникез луиз.

⁸ Осконэн Авраам кылзӥськиз ӧтемлэсь, но мынӥз тодмотэм шаере, кудзэ солы басьтоно вал наследстволы. ⁹ Осконэн со интыяськиз мурт музъем вылэ, кудзэ Инмар солы кыл сётӥз, но улӥз шатёръёсын Исаакен но Иаковен, кудъёсыз кылсётэмлэн сонаследникъёсыз луо, ¹⁰ уго со вите вал город, кудӥзлэн архитекторез но строителез луоз Ачиз Инмар.

¹¹ Осконэн Сарралы но, коть со пиналвайыны быгатӥсьтэм но мӧйы ке но вал, Инмар сётӥз кужым Авраамлэсь кидыссэ басьтыны но дырыз вуыса солэн пиналыз вордӥськиз, уго тодэ вал Кылсётӥсь оскымон шуыса. ¹² Соин ик одӥгезлэсь, вылаз ик кулыны вуэм пересьлэсь, вордӥськиз тупыттэм тросс, инмын кизилиос мында, но морелэн ярдураз лыдъяны быгатонтэм луо мында калык.

¹³ Ваньмыз соос кулӥзы осконэн но ӧз басьтэ кылсётэмзэ, нош кыдёкысен гинэ адӟизы, шумпотыса асьсэлы асьсэос вераллязы, соос чужестранецъёс но куноос гинэ музъем вылын, ¹⁴ уго соос, кинъёс озьы верало, возьмато, соос утчало шуыса вордскем интызэс.

¹⁵ Соос малпаськысалзы ке со шаер сярысь, кытысь кошкизы, соку соос быгатысалзы выльысь отчы берытскыны. ¹⁶ Нош соос ӟечез, инмысь шаер сярысь малпаськыса улӥзы, соин ик Инмар возьдаськытэк нималляз Ассэ соослэн Инмаренызы, уго Со соослы дасяз выль город.

¹⁷ Осконэн Авраам, куке сое Инмар эскере вал, ваиз Исаакез жертвае, кудӥз вал солэн одӥг гинэ но кудӥз сярысь солы Инмар кыл сётӥз, ¹⁸ но кудӥз сярысь верамын вал: "Тынад выжыед Исаакын нимаськоз". ¹⁹ Со оске вал, Инмар кужмо кулэмысь улӟытыны шуыса сое, соин ик пизэ берен улэпэн басьтӥз.

²⁰ Вуоноезлы осконэн Исаак Иаковез но Исавез благословить кариз.

²¹ Оскыса Иаков, кулыкуз, Иосифлэсь кыксэ ик пизэ благословить кариз но боды бордаз пыкиськыса Инмарлы йыбырттӥз.

²² Осконэн Иосиф, кулыкуз, тодаз ваиз Израиль пиослэсь Египетысь потэмзэс но завещание лэсьтӥз аслаз лыосыз сярысь.

²³ осконэн Моисейлэн анай-атайёсыз ватыса возизы сое куинь толэзь вордскемез бере, соос адӟизы уго, пиналзы мусо шуыса, но ӧз кышкалэ царьлэн косэмезлэсь.

²⁴ Осконэн Моисей, быдэ вуэмез бере, фараонлэн нылызлэн пиеныз нимаськемлэсь куштӥськиз, ²⁵ нош ортчись сьӧлыко шулдыръяськон ужъёсты палэнэ карыса, быръйиз Инмарлэн калыкеныз курадӟёнэз, ²⁶ но ултӥянэз, Христос музэн, лыдъяз бадӟым узырлыкен, Египетлэн узырлыкезлэсь, малыке шуоно со кыл сётэм кузьым сярысь малпаса улӥз.

²⁷ Осконэн со Египетэз кельтӥз, царьлэн вожпотонэзлэсь кышкатэк, уго, Адӟёнтэмез адӟыса кадь, юн вал. ²⁸ Осконэн со Пасха но вир пазян лэсьтӥз, бытдӥсь медам йӧтскылы шуыса соослэн нырысь вордскемъёссэс. ²⁹ Осконэн соос кӧс сюй вылтӥ кадь потӥзы Горд мореез, - египтянъёс но соослэсь адӟем карыса, выжыны ӧдъязы но ваньмыз выйылӥзы.

³⁰ Осконэн усӥзы Иерихонлэн стенаосыз, соос котыртӥ сизьым нунал котыръяськем бере. ³¹ Осконэн калгись кышномурт Раав юрттӥз разведчикъёслы но быттэмын ӧй вал кылзӥськисьтэм калыкъёсын ӵош.

³² Эшшо мар верано на? Мынам дыры уз тырмы, вераны Гедеон, Варак, Самсон но Иеффай, Давид, Самуил но мукет пророкъёс сярысь, ³³ кудъёсыз осконэн вормылӥзы царствоосты, шонерлык лэсьтылӥзы, Инмарлэсь кылсётэмзэ басьтылӥзы, левъёслэсь ымъёссэс пытсаллязы, ³⁴ тыллэсь кужымзэ буйгатылӥзы, палэнскыны быгатылӥзы лэчыт мечлэсь, ляблэсь юнмаллязы, батыръяськыса ожмаськылӥзы, тушмонъёслэсь полкъёссэс пегӟённие вуттылӥзы, ³⁵ кышномуртъёслэн ӵыжы выжыоссы улӟыса султылӥзы, нош мукетъёссэ курадӟытылӥзы но мозмон ӧз басьтэлэ, ӟечсэ гес улӟыса султонэз басьтон понна.

³⁶ Мукетъёсыз ортчизы ултӥянэз но ӝугонэз но, озьы ик жыльыен думыса пытсэн улэ куштонэз но. ³⁷ Соосты изъёсын зӥръяса виылӥзы, мугорзэс пилаен шори вандылӥзы, пытать карылӥзы, мечен виылӥзы. Соос дӥсясяллязы ыжъёлэсь но кечъёслэсь кузэс, начар улонэз, пачкатонэз, курадӟытонэз чидаса улӥзы

³⁸ Соос, кинъёслы быдэс дунне сылымон ӧй вал, ватскыса ветлӥзы гурезьёстӥ но пустыняостӥ, пещораостӥ но нюк-гопъёстӥ. ³⁹ Но ваньмыз таос, тодмо вал вань калыклы асьсэлэн осконэнызы, но соос ӧз басьтэ сое, мар соослы Инмар кыл сётӥз вал, ⁴⁰ уго Инмар чаклаз соослы марке но ӟечсэ гес, асьменым ӵош гинэ соос совершённоесь мед луозы шуыса.