12

¹ Соин ик ми но, сокем тросс адӟисьёсын котыртэмъёсс, зӥртомы вылысьтымы котькыӵе зибетъёсты но милемды ӵемтаськытӥсь сьӧлыкез, но чиданэн бызьыса ортчёмы асьмелы сётэм нюръяськонэз, ² учкыса, осконэз Ӧдъясьезлы но Быдэсъясьезлы, Иисус Христос шоры, Кудӥз, шумпотон интые, кортӵогамын вал, ултӥям шоры учкытэк, пуксиз Инмарлэн престолэзлэн бур палаз.

³ Малпалэ Со сярысь, Кин чидаз ултӥянъёс сьӧлык лэсьтӥсьёслэсь, тӥ медам катьтэмме, но медам лябомы тӥляд лулды шуыса.

⁴ Тӥ вир потытчёз ӧд на ожмаське сьӧлыкен нюръяськонын ⁵ но вунэтӥды буйгатонэз, кудӥз тӥледлы ӵектэмын, пиослы кадь:"Пие мынам! Эн кулэтэм кар Кузё-Инмарлэсь наказаниоссэ, йырдэ улэ эн лэзь, куке Со шараялоз тонэ, ⁶ уго кинэ Кузё-Инмар яратэ, сое ик наказать каре, жуге котькудзэ, кинэ пиеныз лыдъя".

⁷ Тӥледды наказать каро ке, соку Инмар тӥледды пиоссэ кадь жуге. Вань шат пиос, кудъёссэ атайзы наказать уг кар?

⁸ Нош тӥледды наказать ӧз ке карылэ, кызьы вань пиосты наказать каро, соку тӥ - пиос ӧвӧл, нош октосъёс.

⁹ Ми кышкаськомы ке музъем вылысь атайъёсмылэсь, наказать карэмзылэсь, соку уката но кулэ ӧвӧл шат кылзӥськыны духъёслэн Атайзылэсь, улон понна?

¹⁰ Мугоръя атайъёсмы асьмеды ас тодэмзыя вакчи дырлы гинэ наказать карылӥзы, нош Со - асьмелы пайда вайён понна, Солэн святой улоназ асьмеос но мед пыриськыны быгатомы шуыса.

¹¹ Ми ум яратӥське, куке асьмеосты наказать каро, милэмлы со куректон сётэ, нош бӧрысь наказаниосын дышетскемъёслы вае шонерлыклэсь каньыл емышсэ.

¹² Озьыен, юнматэ лябӟем киостэс но жадем пыдесъёстэс ¹³ ветлон сюресъёстэс шонертэ, чутӥсь медам палэнэ вамышты, нош эшшо но ӟечгес - мед катьяськоз.

¹⁴ Тырше ваньмыныз тупаса, сьӧлык лэсьтытэк но святой улонэн улыны, уго озьы лэсьтытэк нокин но уз адӟы Кузё - Инмарез.

¹⁵ Учкелэ, кинке тӥ пӧлысь медам ышты Инмарлэсь благодатьсэ, кыӵеке кылдэм курыт выжы, медам изъян лэсьты, но тросэз медам соин саптаське.

¹⁶ Тӥ пӧлын медам лу нокыӵе но азись - калгись яке чылкыттэм мурт, Исав кадь, кудӥз одӥг сиён понна гинэ куштӥськиз аслаз нырысь вордскемезлэсь.

¹⁷ Тӥ тодӥськоды уго, кызьы со собере атаезлэсь вите вал благословить каремзэ, нош палэнтэмын вал, уго атаез ӧз ни сёты солы благословение, коть бӧрдыса ке но куриз.

¹⁸ Тӥ гурезь доры ӧд матэктэ, кудӥз борды йӧтскыны луэ, но кудӥз тылын ӝуа, пеймыт доры но, тём пеймыт доры но, сильтӧл доры но, ¹⁹ гумы куара доры но ивортӥсь куара доры но, кудзэ кылзӥськисьёс курылӥзы, медам ни ивортэмын луы шуыса одӥг кыл но, ²⁰ малыке шуоно соос чиданы ӧз быгатэ сое, мае соослы косэмын вал лэсьтыны:" Пӧйшур но йӧтскылӥз ке гурезь борды, йзъёсын зиръямын луоз".

²¹ Та адӟён сокем кышкыт вал, соин ик Моисей но шуиз:"Мон кышкасько но куалекъясько".

²² Нош тӥ матэктӥды Синай гурезь доры, улэп Инмарлэн городэз доры, инмысь Иерусалим доры, трослэсь но тросс ангелъёс доры, ²³ черклэн нырысетӥосыз борды, кудъёсыз инмын гожтэмын, шулдыръяськонлэн кенешаз, Инмар доры, кудӥз ваньмызлэн судьяез, шонерлыклэн духъёсыз доры, кудъёсыз совершенноесь,

²⁴ выль заветлэн Посредникез - Иисус доры но пазян Вир доры, кудӥз вера, ӟечгес шуыса Авельлэн вирызлэсь.

²⁵ Учкелэ нош, эн пытсалэ пельдэс, куке Верась вера. Нош соос, кылзӥськымтэзы понна музъем вылын верасьлэсь, наказаниелэсь палдурскыны ӧз быгатэ, соку асьмеос уката но ум быгатэ пегӟыны, палэнским ке инмын Верасьлэсь, ²⁶ Кинлэн куараез азьло зуркатӥз музъемез, но Кудӥз али сыӵе кыл сётӥз: "Эшшо одӥг пол музъемез гинэ уг зуркаты, нош инэз но зуркатоз".

²⁷ "Эшшо одӥг пол" шуэм кылъёс возьмато, ваньмыз кылдытэмъёс, быдтэмын луозы, уго соосты зуркатыны луэ, зуркатыны быгатымтэос гинэ мед кылёзы шуыса.

²⁸ Озьыен, асьмеос, зуркатыны быгатонтэм царствоез басьтыса, благодатез возёмы, кудӥныз Инмарлы ярамон луыса гажаса но кышкаса тыршомы, ²⁹ уго асьмелэн Инмармы - ваньзэ ньылӥсь тыл.