13

¹ Ог огдэсты, вынъёс музэн, яратыса улэ.

² Куноостэс ӟеч пумиталэ, уго куд огез, озьы лэсьтыса, асьсэос но сое валатэк, ангелъёсты куноятӥзы.

³ Тодады возе пытсэт улын пукисьёс сярысь, тӥ но соосын ӵош пукиськоды кадь малпаса, курадӟисьёс сярысь но, уго тӥ асьтэос но мугорын улӥськоды.

⁴ Куспалъёсыныды улонды но чылкыт мед луоз, кусыпъёстэс но саптатэк возе, нош азыса - калгыса ветлӥсьёсты Инмар судить кароз.

⁵ Коньдонэз яратӥсь сямды медам лу, марды вань, соин улыны тырше. Уго Со Ачиз вераз: "Уг но кельты тонэ уг но кушты", ⁶ озьы бере ми кышкатэк вераськом: "Кузё-Инмар мынам юрттӥсе, мон номырлэсь но уг кышка. Мар мыным адями лэсьтоз?"

⁷ Дышетӥсьёстэс тодады возе, кудъёсыз тӥледлы вераллязы Инмарлэсь кылзэ, учке соослэсь улэмзэс но кулэмзэс но, адӟем каре соослэсь осконзэс.

⁸ Иисус Христос ӧз воштӥськы, толон но туннэ но котьку Со сыӵе ик.

⁹ пӧртэм мурт дышетонъёсын эн тунсыкъяське. Ӟеч луоз, асьтэлэсь сюлэмъёстэс юнматӥды ке благодатен, сион-юонъёсын ӧвӧл, уго нокыӵе но пайдазэ ӧз басьтэ сиён-юон сярысь чакласа улисьёс.

¹⁰ Милям вань жертвенникмы, кудӥзлэсь уг быгато скиниялэн служить карисьёсыз сиыны.

¹¹ Пудоослэсь вирзэс сьӧлыкез чылкытатон понна первосвященник пыртэ святилищее, нош пудоослэсь мугорзэс суто улон интылэн палэназ, ¹² озьы ик Иисус но, Аслаз Вирыныз калыкъёсты освятить карон понна, курадӟёнэз чидано луиз городлэн ӟезьы сьӧраз.

¹³ Озьыен, потом Со доры город сьӧры, но Сое ултӥямез выламы басьтом, ¹⁴ малыке шуоно татын асьмелэн ӧвӧл пырак ӵоже улон интымы, нош асьмеос вуоно улонни утчаськом.

¹⁵ Озьыен, Иисус пыртӥ дугдылытэк ушъян-данъян жертва Инмарлы сётом, Солэсь нимзэ данъяса, ымысьтымы потӥсь емыш ваём.

¹⁶ Озьы ик эн вунэтэ ӟеч ужъёс лэсьтыны но матысьёстылы асьтэлэсь ваньбурдэс висъяса сётыны, уго таӵе жертваос Инмарлы ярало.

¹⁷ Кылзӥське черкысь кивалтӥсьёстылэсь но быдэсъялэ соослэсь куронъёссэс, уго соос синзэс кыньылытэк тыршо тӥляд духовной улонды понна, уго тӥляд утиськемды понна кыл кутоно луоз шуыса. Соин ик эн ӝожомытэ соосты, соос мед тӥ понна шумпотыса тыршозы, уго соослэн тыршемзы тӥлед благословение сётэ.

¹⁸ Вӧсяське ми понна, уго ми оскиськом, милям совестьмы чылкыт шуыса, уго ваньмаз тыршиськом шонер лэсьтыны.

¹⁹ Тужгес но курисько мон понна вӧсяськыны, мон мед быгато шуыса ӝоггес дарады бертыны.

²⁰ Тупаса улонлэн но каньылыклэн Инмарез, асьмелэсь Иисус Кузёмес быдӟым Ыжвоӟьмасез кулэмысь улӟытыса ӝутӥсь, пумтэм заветлэн Вирыныз, ²¹ мед дасялоз тӥледды котькыӵе ӟеч ужъёслы, Солэсь волязэ тӥ мед быдэстоды шуыса. Но Со мед лэсьтоз тӥ пушкын Иисус Христос пыртӥ сое, мар Солы ярамон луэ. Дан Солы пумтэм дауръёс ӵоже! Аминь.

²² Курисько тӥледды, вынъёс, мылкыддэс ӝутон понна гожтӥсько тӥлед, тае чиданлыкен лыдӟе. Мон тӥледлы тросс ӧй гожты уг.

²³ Тодэлэ, асьмелэн Тимофей вынмы мозмытэмын, но со ӝоген лыктоз ке, соку мон адӟё тӥледды соин ӵошен.

²⁴ Ӟечкылалэ ваньзэ тӥлесьтыд кивалтӥсьёстэс но вань святойъёсты. Тӥледды ӟечкылало Италияысь оскисьёс .

²⁵ Благодать тӥленыд ваньмыныз. Аминь.