8

¹ Верамлэн пуштросэз тани: асьмелэн вань сыӵе Первосвященникмы, Кудӥз Быдӟымлыклэн престолэзлэн бур палаз пуксиз, ² - святойлэсь но святой интыын, зэмос скинияын Со Служитель луэ, кудзэ адями ӧз пукты, нош Кузё-Инмар.

³ Котькыӵе первосвященник жертваосты но кузьымъёсты вайыны кулэ, соин ик Таизлэн но Первосвященниклэн луыны кулэ мае сётыны.

⁴ Со музъем вылэ ик кыльысал ке, соку ӧй луысал первосвященникен, уго вань сыӵе священникъёс, законъя кузьымъёс ваисьёс, ⁵ кудъёсыз служить каро скинияын, кудӥз луэ вужерез но тупа инмысь скиниялы, кызьы Моисеез косэмын вал скиния пуктыны кутскыкуз:"Учкы, лэсьты ваньзэ озьы,тыныд гурезьын возьматемезлы тупась,".

⁶ Нош табере Иисуслы сётэмын уката но вылӥлыко служение, Со луиз Выль Заветлэн Инмарен но калыкъёс вискын Посредникеныз, трослы вылӥын вужезлэсь сӥзёнлэсь.

⁷ Уго нырысетӥ закон ярамон ке луысал, соку кулэ ӧвӧл мукетыз.

⁸ Нош пророк, соосты пыкылыса, вера:"Тани, вуо нуналъёс,- вера Кузё-Инмар,- куке Мон Израильлэн но Иудалэн выжыеныз юнмато выль кыл сётон, ⁹ сыӵе кылсётон со уз луы, кудзэ Мон соослэн атайъёсынызы юнматӥ, куке соосты китӥзы кутӥ, поттыны соосты египет музъем вылысь, уго соос ӧз быдэстэ сойзэ Мынысьтым кыл сётэмме, но Мон берытски соос дорысь,- вера Кузё-Инмар". ¹⁰ "Тани кыл сётэм, кудзэ Мон юнмато Израильлэн выжыеныз со нуналъёс бере,- вера Кузё-Инмар,- Мон поно Мынысьтым законъёсме соослэн малпанъёсазы но гожто соослэн сюлэм вылазы, но луо соослэн Инмаренызы, нош соос луозы Мынам калыке.

¹¹ Но уз ни дышеты нокин но аслысьтыз матысьсэ но вынзэ но, вераса:"Тод Кузё-Инмарез",- уго ваньмыз, покчиысен кутскыса бадӟымозь, тодозы Монэ, ¹² уго Мон простить каро соослэсь урод ужъёссэс но тодам уг ни вай соослэсь сьӧлыкъёссэс". ¹³ Вераса "выль", Со шуз нырысетӥзэ вуж, нош вужмисез но мӧйымысез быроннилы матын.