7

¹ Уго Мелхиседек, Салимлэн Царез, Вылӥысь Инмарлэн священникез, со, кин Авраамез пумитаз, царьёсты ожын вормыса бертыкуз, но благословить кариз сое, ² кудӥзлы Авраам сётӥз ваньмызлэсь дасетӥ люкетсэ, кудӥзлэсь нимзэ валаны луэ, нырысь ик, шонерлыклэн царез, нош собере Салималэн царез - тупаса улонлэн царез шуыны луоз, ³ анай-атайзэ но ӵыжы-выжыоссэ но нокин но уг тоды, нокин но уг тоды, ку со вордӥськиз но ку кулӥз, со Инмарлэн Пиез кадь но пумтэм даурёс ӵоже священникен кыле.

⁴ Учкелэ, макем быдӟым со, кинлы патриарх Авраам сётӥз дасетӥ люкетсэ ожын киултэм ӟечезлэсь ваньбурез пӧлысь. ⁵ Левийлэн пиосыз, кудъёсыз священникъёс, законъя басьтыны быгато дасэтӥ люкетсэ калыкъёслэсь, асьсэлэсь вынъёссылэсь, коть соос но ке Авраамлэн выжыосыз луо.

⁶ Нош Мелхиседек, Левийлэн выжыысьтыз но ке ӧвӧл, Авраамлэсь сётэм дасэтӥ люкетсэ басьтӥз но благословить кариз Инмарлэсь кыл сётэм адямизэ. ⁷ Нокыӵе но пумит кыл вератэк, покчиез благословение басьтэ бадӟымезлэсь.

⁸ Татын дасэтӥ люкетсэ люкало кулоно адямиос, нош отын - Со, Кудӥз сярысь верамын, Со улэп шуыса.

⁹ Вераны луоз ачиз Левий но, кудӥз дасэтӥ люкетсэ басьтэ, Авраам пыртӥ дасэтӥ люкетсэ сётӥз: ¹⁰ уго Левий вордӥськымтэ на вал, но Авраам атаезлэн пушказ вал, ку сое пумитаз Мелхиседек.

¹¹ Соин ик, совершенство быдэстэмын ке луысал левитъёслэн священствозы пыртӥ, - уго закон сётэмын вал калыклы соослэн священник луэмзылэн инъетэз вылын, - соку малы кулэ на вал, мед луоз шуыса мукетыз Мелхиседек чинэн священник, нош Ааронлэн чинэзъя ӧвӧл?

¹² Уго куке воштӥське священство, соку закон но воштӥськыны кулэ.

¹³ Уго Со, Кин сярысь ми али вераськомы, мукет выжыысь, кудӥзлы нокин но служить ӧз кары жертвенник дорын.

¹⁴ Уго тодмо, асьмелэн Кузё-Инмармы Иудалэн выжыысьтыз потэмын, кудӥзлэн выжыысьтыз священникъёс сярысь Моисей номыр но ӧз вера.

¹⁵ Эшшо но валамон, потӥз мукетыз Священник, Кудӥз, Мелхиседеклы тупа. ¹⁶ Со мугорлэн законъя священник ӧз луы, нош бырисьтэм улонлэн кужыменыз. ¹⁷ Уго ивортэмын:"Мелхиседек чинэн Тон священник луод пумтэм дауръёс ӵоже"

¹⁸ Азьло заповедез кулэтэм карэмын, солэн ляб но пайдатэм луэменыз, ¹⁹ уго закон номырез но ӧз вутты совершенной луонниозь, нош ӟечгес оскиськон сётӥське, кудӥныз асьмеос Инмарлы матэ лыктӥськомы.

²⁰ Но та кыл сётэмын вал бере, ²¹ уго соос кыл сётонтэк священникъёс луизы, нош Таиз кыл сётэмен, уго Со сярысь верамын:"Кузё-Инмар кыл сётӥз, но кыл сётэмезлэсь ӧз куштӥськы: Тон пумтэм дауръёсы Мелхиседек чинэн Священник луод",- ²² озьыен ӟечгес заветлэн юнматӥсез Иисус луиз.

²³ Со священникъёс тросс вал, уго кулон уг сёты вал огнязы кыльыны, ²⁴ нош Таиз, пумтэм дауръёслы кыле, но Солэн священствоез но пумтэм дауръёс ӵоже, ²⁵ соин ик Со быгатэ утьыны соосты, кинъёс Со пыртӥ Инмар доры лыкто, малыке шуоно Со котьку улэп но котьку дур басьтэ соослы.

²⁶ Соин ик таӵе ик асьмелэн Первосвященникмы: святой, лякыт, изъянтэк, сьӧлык лэсьтӥсьёслэсь висъямын но инлэсь вылые ӝутэмын, ²⁷ Кудӥзлы, кызьы лэсьто мукетъёсыз первосвященникъёс, котькуд нунал ӝертва сётыны кулэ ӧвӧл, нырысь асьсэлэн сьӧлыксы понна, собере калыкъёслэн сьӧлыкъёссы понна, уго Со лэсьтӥз таэ одӥг пол, Асьсэ Ачиз жертвае вайыса. ²⁸ Уго закон пуктэ первосвященникен адямиосты асьсэлэн лябъёсынызы, но кыл сётэм, закон бере, пуктӥз Пизэ, Кудӥз пумтэм дауръёс ӵоже совершенной.