3

¹ Озьыен, святой вынъёс, инэн ӧтемъёс, учкелэ Иисус Христос шоры, кудӥз Келямын Первосвященникен асьмелэсь сьӧлыкъёсмес усьтыны Со азьын. ² Кудӥз оскымон Солы, Кин келяз Сое, кызьы Моисей, оскымон вал Солэн корказ. ³ Нош Солэн, Моисеен ӵошатоно ке бадӟымгес данэз, озьы ик корка пуктӥсьлэн сӥ-данэз бадӟымгес, коркалэсь.

⁴ Котькыӵе корка пуктэмын кинэн ке, нош Инмар - ваньзэ Пуктӥсь.

⁵ Моисей но ляльчи кадь оскымон улӥз ваньмаз Солэн корказ, ивортон понна, мар азьланяз верамын луоз, ⁶ нош Христос - Солэн корказ Солэн Пиез кадь. Нош Солэн коркаез - асьмеос, пумозяз йыг йыг утимы ке дӥсьтонлыкмес но оскиськонмес, кудъёсыныз ушъяськиськом.

⁷ Соин ик, кызьы вера Святой Дух: "Туннэ, куке кылоды Солэсь кылзэ, ⁸ сюлэмъёстэс эн лекомытэ, вождэс поттон дыръя кадь, пустыняын искушать карон нуналэ, ⁹ кытын искушать каризы Монэ тӥляд атайъёсты, эскерылӥзы Монэ но адӟылӥзы Мынысьтым ужъёсме ньыльдон ар.

¹⁰ Соин ик Мынам воже потӥз со выжы вылэ но шуи:"Соос котьку сюлэмазы йыромо но уг тодо Мынысьтым сюресъёсме, ¹¹ соин ик Мон Аслам вожпотонам кыл сётӥ, соос уз пыре шуыса Мынам каньыллыкам".

¹² Чаклалэ, вынъёсы, тӥ пӧлысь нокинлэн но медам луы лек но оскисьтэм сюлэмыз, тӥледлы улэп Инмарлэсь палэнэ медам кожоно шуыса.

¹³ Нош нуналлы быдэ ог огдэс лӧпкытэ, "туннэ" вераны луэ на бере, тӥ пӧлысь нокин но медам лекомы, сьӧлыкен пӧяськонэн.

¹⁴ Уго асьмеос луимы Христосэн ӵошен тыршисьёс, кутскем улонмес гинэ пумозяз йыг йыг возимы ке,

¹⁵ уго верамын: "Туннэ, ку кылоды Солэсь куаразэ, вождэс поттон дыръя кадь, сюлэмъёстэс эн лекомытэ", ¹⁶ уго куд огез кылэмъёс вожзэс поттӥзы Моисеен Египетысь потэмъёс, озьы ке но ваньмыз ӧз.

¹⁷ Кин вылэ бен Со вожзэ поттӥз ньыльдон ар? Соос вылэ ӧз шат, кинъёс сьӧлык лэсьтӥзы но кудъёсызлэн лыоссы пустыняын кылизы? ¹⁸ Кинъёслы пумит бен Со кыл сётӥз, соос уз пыре шуыса Солэн каньыллыказ, кылскисьтэмъёслы пумит ӧз шат? ¹⁹ Озьыен, ми адӟиськомы, соос оскымтэзы понна пырыны ӧз быгатэ шуыса.