2

¹ Соин ик асьмеос тужгес но сак луыны кулэ кылэммылы, уго усёнэ медам шедёно вал.

² Уго кыл, кудӥз ивортэмын вал ангелъёс пыртӥ, кужмо, но котькыӵе урод ужъёслы но кылзӥськымтэослы сётэмын вал пунэмен берыктон, ³ нош кызьы асьмеос мозмыны быгатомы, таӵе бадӟым утӥськонэз кулэтэм карыса, кудӥз нырысь ивортэмын вал Кузё-Инмарен но асьмеос пушкын юнматэмын вал Солэсь кылэмъёсын. ⁴ Но Ачиз Инмарлэн юнматэменыз тодметъёсын но паймымон ужъёсын, но пӧртэм кужымъёсын но Солэн воляезъя сётэм Святой Духлэн даръёсыныз?

⁵ Уго ангелъёслы ӧз сёты Инмар дуннеез, кудӥз сярысь асьмеос вераськом, ⁶ нош кин-ке кытын-ке вераз:" Кин со сыӵе адями, кудзэ Тон тодад ваиськод? Яке кин со сыӵе адямилэн пиез, кудӥз доры Тон ветлӥськод?

⁷ Тон ӧжытлы гинэ улӥегес пуктӥд сое ангелъёс азьын, Тон сое данлыкен но сиё-данэн венчать карид, но пуктӥд сое кузёен Тынад киосыныд лэсьтэм ужъёсыд вылэ, ⁸ но ваньзэ солэн пыд улаз нюртӥд". Нош Тон ваньзэ солы подчинить карид ке, соку ӧд кельты номыр но солы подчинить карымтэзэ. Нош ми али ум на адӟиське, ваньмыз солы подчинятся кариське шуыса, ⁹ нош адӟиськомы Иисусэз, Кудӥз кӧняке улӥегес пуктэмын ангелъёс азьын, Кудӥз кулонэз адӟиз но со понна Солы сётэмын вал данлэн но сиё-данлэн венецез. Инмарлэн благодатезъя Солы кулон чидано луиз вань калыкъёс понна.

¹⁰ Инмар, Кудӥз луэ ваньзэ кылдытӥсь но Кудӥзлэн ваньмыз, Кудӥзлэн троссэ пиоссэ ваемез потэ Аслаз даназ, соин ик Со, Иисусэз кураӟёнъёс пыртӥ поттыса, лэсьтӥз Сое калыкъёсты утиськонэ валтӥсен.

¹¹ Уго Со но, Кин освящать каре, но соос но, кинэ освящать каро, ваньмыз одӥг Атайлэсь, соин ик Солы соосты вынъёс шуыны возьыт ӧвӧл, тазьы вера: ¹² "Тынысьтыд нимдэ Мынам вынъёсылы иворто, черкын Тонэ данъяса кырӟало".

¹³ Эшшо но:"Мон Со вылэ оскиськыса уло". Эшшо но:"Тани Мон, но Монэным пиналъёсы, кудъёссэ сётӥз Мыным Инмар".

¹⁴ Нош пиналъёс вирен но мугорен герӟяськемын бере, соку Со но луиз сыӵе ик, кыӵе та калык, Аслаз кулэменыз быдтон понна кужымзэ солэсь, кин кузёяське кулон-быронэн, кудӥз дьявол, ¹⁵ но мозмытыны соосты, кинъёс кулонлэсь кышкаса улоназылэн пумозяз рабъёс вал.

¹⁶ Уго Со ӧз лыкты ангеллэн мугораз, нош лыктӥз Авраамлэн выжыезлэн мугораз. ¹⁷ Малыке шуоно Со луыны кулэ вал ваньмаз вынъёс кадь ик, милосердной луон понна но осконо первосвященник луыны Инмарлэн ужаз но помиловать карыны калыкъёсслэсь сьӧлыкъёссэс.

¹⁸ 18 Уго, кызьы Со Ачиз, искусить каремын вал, соку Со но быгатоз юрттыны соослы, кинъёс искушениеын.