4
1
Соин ик, куке вань на луонлык пырыны Солэн шутэтсконаз Солэн сётэм кылыз пыртӥ, кышкаса улом, тӥ пӧлысь нокин но медам беромы шуыса,
2
уго соослы но озьы ик, асьмелы кадь ик Ӟеч Ивор верамын. Нош кылэм ивор соослы пайда ӧз сёты, малыке шуоно кылзӥськисьёс ӧз кизертэ сое осконазы.
3
Нош ми, оскимы но Солэн шутэтсконаз пыримы. Кызьы шуиз Инмар: "Мон Аслам вожпотонам кыл сётӥ, соос уз пыре шуыса Мынам шутэтсконам", коть Солэн ужъёсыз быдэстэмын ке но вал музъем кылдытэм дырысен.
4
Уго сизьыметӥ нунал сярысь кытын ке гожтэмын тазьы:" Инмар Аслаз ужъёсызлэсь сизьыметӥ нуналаз шутэтскиз".
5
Тани татын но: "Уз пыре Мынам каньыллыкам".
6
Озьыен, куд огезлы кылдоз бере пырыны Солэн каньыллыказ, нош соослы, кудъёсызлы азьло Ӟеч Ивор верамын вал, ӧз пыре отчы кылзӥськымтэзы понна,
7
соку Со нош ик нимысьтыз нунал тупатӥз, "туннэ", но тросс дыр ортчем бере, вера Давид пыртӥ, кызьы вылӥын верамын:"Туннэ, куке кылоды Солэсь кылзэ, сюлэмъёстэс эн лекомытэ".
8
Иисус Навин пыртысал ке соосты каньыллыке, собере верамын ӧй луысал мукетыз нунал сярысь.
9
Соин ик Инмарлэн калыкезлы субботаез утён кыле на.
10
Соин ик кин пыриз Солэн каньыллыказ, со шутэтске аслаз ужъёсызлэсь, кызьы Инмар шутэтске Аслаз ужъёсызлэсь.
11
Озьыен, тыршомы пырыны Солэн шутэтсконаз, кылзӥськымтэос шоры учкыса нокин но медам кылзӥськисьтэм луы шуыса.
12
Уго Инмарлэн кылыз улэп но тыршись, со лэчытгес котькыӵе кык ласянь ик шэрем мечлесь, со пыре адямиос пушкы люкытозяз лулэз духлэсь, суставъёсты вимъёслэсь, мылпотэмъёсты но сюлэмысь потэм малпанъёсты судить каре.
13
Нокыӵе но кылдытэм уз быгаты ватскыны Солэсь, ваньмыз голик но усьтэмын Солэн син азяз - Со азьын кыл кутоно луоз.
14
Озьыен, асьмеослэн вань бере быдӟым Первосвященникмы, Кудӥз тубиз инлэсь вылӥегес, Иисус, Инмарлэн Пиез, юн возиськом асьмелэн осконмылы, кудзэ исповедовать кариськом.
15
Малыке шуоно асьмелэн Первосвященникмы быгатоз валаны милесьтым лябъёсмес, Кудӥз, асьмеос кадь ик испытать каремын вал, нош сьӧлыкъёстэк.
16
Соин ик сэзь лыктомы благодатьлэн престол азяз, Инмар мед милемлы сётоз шуыса милость но Солэсь басьтыны благодать дырыз дыръя юрттонлы.