6

¹ Музъем вылын калыкъёс трос но трос ватсаськизы но соослэн нылъёссы вордӥськылӥзы,

² но, адӟыса адямиослэн нылъёссылэсь чеберзэс, Инмарлэн пиосыз асьсэлы кельшисьёссэ кышно вайылӥзы.

³ Но шуиз Кузё-Инмар: " Мынам Духелы калыкъёс пумтэм дауръёс ӵоже пумитъяськыны кулэ ӧвӧл, уго соос - мугор, та дырысен соослэн улонзы сю кызь ар луоз".

⁴ Куке Инмарлэн пиосыз кӧланы кутскизы адямиослэн нылъёсыныз, соослэсь вордӥськыны кутскизы бадӟым адямиос. Соос кужмоесь но тодмоесь вал вашкала дауръёсысен.

⁵ Но адӟиз Инмар, адямиослэсь музъем вылын лек луэмзэс, но соослэн сюлмазы вань малпанъёссы лекесь шуыса.

⁶ Кузё-Инмар жаляз, адямиез кылдытӥз шуыса но ӝожен тырмиз Солэн сюлмыз.

⁷ Но шуиз Кузё-Инмар: " Мон быдто музъем вылысь вань калыкез, кудъёссэ кылдытӥ. Озьы ик вань пӧйшуръёсты но пудоживотъёсты, няш ветлӥсьёсты но тылобурдоосты. Нокудзы но соос уз кыле музъем вылэ, уго Мон жалясько, соосты кылдытӥ шуыса".

⁸ Одӥг Ной гинэ Кузё-Инмарлы ярамон вал.

⁹ Тани Нойлэн улон-вылонэз: Ной вал котьку шонер лэсьтӥсь адями. Нокин но музъем вылын со дырын улӥсьёс сое уг быгато вал янгыше уськытыны.

¹⁰ Ной ветлӥз Инмар азьын. Солэн куинь пиез вордӥськиз: Сим, Хам но Иафет.

¹¹ Музъем вылын улӥсьёс Инмар азьын азылӥзы но калыкъёс туж лекесь луизы.

¹² Кузё-Инмар адӟиз, кыӵе юрӟым луиз музъем, уго котькуд мугорлэн сюресэз азон-калгон но урод сярысь малпан гинэ вал.

¹³ Но шуиз Инмар Нойлы: " Мон быдто вань калыкъёсты, уго калыкъёс ог огзылы урод ужъёс гинэ лэсьто. Соин ик Мон быдто соосты но музъемез но.

¹⁴ Лэсьты аслыд гофер писпуысь ковчег. Сое висъетъёсын висъя. Сирен зыра солэсь пушсэ но педпалзэ но.

¹⁵ Лэсьты сое тазьы: кузьдалаез куиньсю гырпум, пасьталаез витьтон гырпум, ӝуждалаез куамын гырпум.

¹⁶ Ковчеглэн вылӥяз гырпум пасьта пась кельты, урдэсказ ӧс лэсьты. Куинь этажъем мед луоз.

¹⁷ Мон музъемез ву улэ выйто, ин улысь быдтэмын луоз ваньмыз лулоез. Ваньмыз музъем вылысь кулоз.

¹⁸ Нош Мон тонэныд кыл куто: тон но тынад кышноед, пиналъёсыд но соослэн кышнооссы ковчеге пыроды.

¹⁹ Озьы ик ковчеге пырты вань лулоосты - айызэ но мессэ но, соос но мед луло кылёзы шуыса.

²⁰ Мед ваньмыз айыез но месэз но тон доры пырозы ӵошен: тылобурдоос одӥг кадьёсыз, пудоживотъёс но пӧйшуръёс одӥг кадьёсыз, музъем вылтӥ няш ветлӥсьёс одӥг кадьёсыз.

²¹ Нош тон басьты пӧртэм сиён-юон аслыд но лулоослы но. Но пон сое ковчегад".

²² Но лэсьтӥз Ной ваньзэ озьы, кызьы Инмар косӥз сое.