4

¹ Адам изьиз Ева кышноеныз, секытэн луиз но солэсь Каин вордӥськиз. Со шуиз: " Кузё-Инмарлэн юрттэменыз мон пинал ваи".

² Собере солэсь вордӥськиз на Авель. Авель вал ыжвозьмась, нош солэн Каин братэз бусыез гырылӥз-кизьылӥз.

³ Одӥг пол Каин бусыаз будэтэм емышезлэсь люкетсэ ваиз Кузё-Инмарлы кузьым,

⁴ нош Авель нырысетӥ вордӥськем ыжъёсызлэсь уката но ӟеч, быгыт но кӧй люкетъёссэ висъяса ваиз. Кузё-Инмарлы яраз Авельлэн кузьымез но Со умоен лыдъяз солэсь сётэмзэ,

⁵ нош Каинэз но солэсь ваемзэ ярамонэн ӧз лыдъя. Каин зол йыркуръяськиз, ымныраз лекез потӥз.

⁶ Кузё-Инмар шуиз Каинлы: " Малы тон йыркуръяськиськод? Малы ымнырыд лекомемын?

⁷ Тон уд шат ӝутӥськы йырдэ, куке ӟечсэ лэсьтӥськод? Нош лэсьтӥськод ке уродзэ, соку ӧс азяд сьӧлык кылле. Со ӧте тонэ дораз, нош тон вормыны кулэ сое".

⁸ Одӥг пол Каин шуиз аслаз Авель братэзлы: " Ойдо бусые ветлом". Куке соос бусыын вал, Каин шӧдымтэ шорысь ожалскиз Авель братэз вылэ но вииз сое.

⁹ Кузё-Инмар юаз Каинлэсь: " Кытын тынад Авель братэд?" Со шуиз: " Уг тодӥськы. Мон сое возьманы шат кулэ?"

¹⁰ Кузё-Инмар шуиз: " Мар тон лэсьтӥд? Сюй вылэ братэдлэн кичкем вирыз вазиське Мыным музъем пушкысь.

¹¹ Тонэныд вием братэдлэн вирыз пыӵаз музъем пушкы, табере тон каргамын музъемен.

¹² Куке тон музъемез гырод-кизёд, со уз ни сёт тыныд тросс емышсэ. Тон уллямын луод котькытысь но уз ни луы тынад одӥг интыын улонниед".

¹³ Каин шуиз Кузё-Инмарлы: " Тон мыным чиданы луонтэм курадӟён сётӥськод.

¹⁴ Тон улляськод монэ музъем вылысь, озьы ик улляськод Дорысьтыд но, монэ уйылозы но калгыса ветло музъем вылтӥ, но виёз монэ котькудӥз, кин пумиталоз".

¹⁵ Кузё-Инмар шуиз солы: " Озьы уз лу. Котькудӥзлы, кин виоз Каинэз, сизьым полы тросгес пунэмен берытскоз". Кузё-Инмар Каин вылэ пуктӥз пус, кин-ке соин пумиськем бераз, медам виы шуыса.

¹⁶ Каин кошкиз Кузё-Инмар дорысь но Нод музъем вылэ интыяськиз, кудӥз Едемлен шунды ӝужан палаз.

¹⁷ Каин изьиз кышноеныз. Со кӧто луиз но солэсь Енох вордӥськиз. Каин город пуктӥз но нимаз пиезлэн нимыныз - Енох.

¹⁸ Енохлэсь вордӥськиз Ирад. Ирадлэсь вордӥськиз Мехиаель. Мехиаельлэсь вордӥськиз Мафусал. Мафусаллэсь вордӥськиз Ламех.

¹⁹ Ламех кык кышно басьтӥз. Нырысетӥезлэн нимыз Ада, кыкетӥезлэн - Цилла.

²⁰ Адалэсь вордӥськиз Иавал. Со атайзы луиз пудо вордӥсьёслэн, кудъёсыз шатёръёсын уло.

²¹ Солэн Иувал нимо братэз атайзы вал арфаен но флейтаен шудӥсьёслэн.

²² Циллалэсь вордӥськиз на Тувалкаин, кудӥз ыргонлэсь но кортлэсь ожтӥрлык дурись луиз.Тувалкаинлэн сестраез вал Ноема.

²³ Ламех шуиз кышноосызлы: " Ада но Цилла! Ламехлэн кышноосыз, кылзэ монэ! Кылзӥське мынам верамелы. Мон адямиез виысал, со монэ ранить карысал ке, но егит пиез, со шуккысал ке монэ.

²⁴ Каин понна пунэмзэ берыктэмын луоз сизьым пол, нош Ламех понна сизьымдонэз сизьым пол уноятыса".

²⁵ Адам одӥг пол кышноеныз изиз на. Солэсь вордӥськиз пи но солы Сиф ним сётӥз, уго со шуиз: " Инмар сётӥз мыным Авель интые, кудзэ Каин вииз, микет пинал".

²⁶ Сифлэн но пиез вордӥськиз, солы со Енос ним сётӥз. Со дырысен Кузё-Инмарлэн нимызлы йыбырттыны кутскизы