2

¹ Озьы кылдытэмын вал ин, музъем но ваньмыз, мар соос вылын но соос пушкын.

² Инмар быдэстӥз Аслысьтыз ужъёссэ сизьыметӥ нуналозь. Кузё-Инмар шутэтскиз сизьыметӥ нуналэ аслаз ужъёсызлэсь.

³ Инмар благословить кариз сизьыметӥ нуналэз но висъяз сое мукет нуналъёслэсь, уго та нуналэ Кузё-Инмар шутэтскиз Аслаз ужъёсызлэсь.

⁴ Тани кызьы лэсьтэмын вал ин но музъем. Кузё-Инмар музъемез но инез кылдытыкуз,

⁵ музъем вылын ӧй на вал нокыӵе но куакъёс но вож турын-куаръёс, уго Кузё-Инмар куазез ӧз на зорытылы, ӧй на вал адями, кудӥз гырысал но кизьысал,

⁶ бус гинэ ӝутӥськылӥз музъемысь но коттылӥз-пылатылӥз вань музъемез.

⁷ Соку кылдытӥз Кузё-Инмар сюйысь адямиез, пельтӥз солэн ымныраз улонлэсь шоканзэ, но адями луиз лул-мугор.

⁸ Собере Кузё-Инмар мерттӥз сад Едемын, кудӥз шунды ӝужан палан. Отчы со кылдытэм адямиез интыяз.

⁹ Кузё-Инмар музъемысь кылдытӥз пӧртэм писпуосты, учкыны чебересь но сётэм емышъёссы сиыны но ческытэсь, на садлэн шор вадесказ пуктӥз улон писпу но ӟечез но уродэз тодон писпу.

¹⁰ Едемысь садэз коттон-пылатон понна бызе вал шур, отӥяз ньыль шори висъяськыса.

¹¹ Нырысетӥ шурез нимало - Фисон. Со котыртэ Хавилалэсь быдэс музъемзэ, кудаз вань зарни.

¹² Со музъемын зарни туж чылкыт. Отын озь ик вань ческыт зыно сир, кудзэ нимало бдолах, но оникс - дуно из.

¹³ Кыкетӥ шурлэн нимыз - Гихон. Со котыртэ быдэс Куш музъемез.

¹⁴ Куинетӥ музъемлэн нимыз - Хиддекель. Ассирия азетӥ со бызе. Ньылетӥ шур - Ефрат.

¹⁵ Кузё-Инмар басьтӥз адямиез но интыяз сое Едемысь садэ, касӥз сое садэз гырыны-кизьыны но возьманы.

¹⁶ Кузё-Инмар валэктыса вераз адямилы: " Котькыӵе писпуысь емышсэ сиыны яра,

¹⁷ нош ӟечез но уродэз тодон писпуысь сиыны уг яра, уго со нуналэ, ку тон шӧмтод солэсь, кулод".

¹⁸ Соку шуиз Кузё-Инмар: " Адямилы огняз улыны ӟеч ӧвӧл. Кылдытом солы юлтош, ачиз кадь ик".

¹⁹ Кузё-Инмар музъемысь кылдытӥз вань кыр пӧйшуръёсты но вань инмысь тылобурдоосты но ваиз соосты адями доры, адӟыны, кызьы со соосты нималоз. Но кызьы адями нимаз котькыӵе лулоосты, озь ик соос нимаськизы.

²⁰ Адями котькыӵе лулоослы ним сётӥз, инмысь тылобурдоослы но кыр пӧйшуръёслы, но соос пӧлын ӧй вал адямилы ярамон юлтош.

²¹ Кузё-Инмар адямиез изьытӥз. Изьыкуз Инмар адямилэсь басьтӥз одӥг урдлызэ но соку ик пытсаз со интызэ мугорын.

²² Адямилэсь басьтэм урдлыысь, Кузё-Инмар кылдытӥз кышномуртэз но ваиз сое адями доры.

²³ Собере шуиз адями: " Талэн лыосыз кылдэмын мынам лыосылэсь, талэн мугорыз кылдэмын мынам мугорылэсь. Со луоз мынам кышное, уго басьтэмын мынысьтым.

²⁴ Соин ик кельтоз адями аслысьтыз атайзэ но анайзэ но лякиськоз аслаз кышноез борды, но луозы одӥг мугор".

²⁵ Адам но солэн кышноез голикесь ке но вал, соос ӧз возьдаськылэ солэсь.