1

¹ Нырысь ик Инмар кылдытӥз инез но музъемез.

² Музъем вал тусбуйтэм но тырттэм, мур вуос вылын вал пеймыт. Инмарлэн Духез лоба вал ву вылын.

³ Инмар шуиз: "Мед луоз югыт", - но югыт кылдӥз.

⁴ Инмар адӟиз югыт ӟеч шуыса, соку Инмар висъяз югытэз пеймытлэсь.

⁵ Инмар нимаз югытэз нуналэн, нош пеймытэз - уйен. Сыӵе вал нырысетӥ нуналлэн ӝытэз но ӵукнаез.

⁶ Собере шуиз Инмар: " Мед луоз бадӟым инбуколы тупась тырттэм инты, кудӥз висъялоз вуез кык люкетлы".

⁷ Озьы ик луиз. Инмар кылдытӥз бадӟым инбуколы тупась тырттэм инты, но со вылысь вуез висъяз музъем вылысь вулэсь, кудӥз со улын.

⁸ Инмар нимаз со бадӟым инбуколы тупась тырттэм интыез, "инэн". Сыӵе вал кыкетӥ нуналлэн ӝытэз но ӵукнаез.

⁹ Собере Инмар шуиз: " Мед ву, кудӥз ин улын, люкаськоз одӥг интые, но мед кылдоз музъем". Озьы ик луиз.

¹⁰ Инмар сюез музъем шуыса нимаз, нош вуосты, кудъёсыз валче люкаськизы, "мореосын". Но адӟиӟиз Инмар, кылдытэмез ӟеч шуыса.

¹¹ Собере шуиз Инмар: " Музъем вылын мед кылдозы пӧртэм будосъёс: турын-куаръёс но емыш сётӥсь писпуос, соослэн луозы кидысъёссы но отысь кылдозы ачизэс кадь ик будосъёс". Озьы ик луиз.

¹² Музъем вылын кылдӥзы пӧртэм будосъёс. Котькуд пӧртэм турын-куарлэн будыны кутскиз аслаз кидысэз, но котькыӵе писпу сётыны кутскиз емыш, кудӥзлэн пушказ кидысэз вал. Но адӟиӟиз Инмар, кылдытэмез ӟеч шуыса.

¹³ Сыӵе вал куиньетӥ нуналлэн ӝытэз но ӵукнаез.

¹⁴ Собере шуиз Инмар: " Инмын мед луозы пӧртэм югдытӥсьёс. Соос висъялозы нуналэз уйлэсь но соосъя валаны луоз дыръёсты, нуналъёсты, но аръёсты.

¹⁵ Соос озьы ик мед музъемез югыттозы". Озьы ик луиз.

¹⁶ Инмар кылдытӥз кык бадӟым югдыттӥсьёсты. Бадӟымез - шунды, кылдытэмын вал нуналэн кивалтыны, нош пичиез -толызь, кылдытэмын вал уйен кивалтыны. Озьы ик Со кизилиосты кылдытӥз.

¹⁷ Инмар интыяз соосты инме, соос музъемез мед югдытозы шуыса,

¹⁸ нуналэн но уен кивалтон понна но висъяны югытэз пеймытлэсь. Но адӟиӟиз Инмар, кылдытэмез ӟеч шуыса.

¹⁹ Сыӵе вал ньылетӥ нуналлэн ӝытэз но ӵукнаез.

²⁰ Собере шуиз Инмар: " Вуос мед тырмозы Монэнын кылдытэм пӧртэм лулоосын, но инмын мед лобалозы тылобурдоос".

²¹ Инмар кылдытӥз бадӟым чёрыгъёсты но озьы ик мукет лулоосты, кудъёсыз уло вуосын но соослэсь вордӥсько асьсэос кадь ик макеос. Озьы ик Со кылдытӥз вань тылобурдоосты, кудъёсыз асьсэос кадь ик пи потто. Но адӟиӟиз Инмар, кылдытэмез ӟеч шуыса.

²² Инмар благословить кариз соосты, вераса: "Мед вордӥськозы тӥлесьтыд уно тӥ кадьёс ик, но тырмытозы мореосты, но мед тылобурдоос пи поттозы но уноялозы музъем вылын".

²³ Сыӵе вал витетӥ нуналлэн ӝытэз но ӵукнаез.

²⁴ Собере Инмар шуиз: " Мед музъем вылэ кылдозы трос пӧртэм лулоос: гурт пудоос, няш кыскиськыса ветлӥстёс, кыр пӧйшуръёс. Ваньмызлэсь соослэсь мед вордӥськозы соос кадесь ик лулоос". Озьы ик луиз.

²⁵ Инмар кылдытӥз вань кыр пӧйшуръёсты, гурт пудоживотъёсты но ваньзэ музъем вылтӥ няш кыстӥськыса ветлӥсьёсты. Ваньмызлэсь соослэсь вордӥськылӥзы асьсэос кадесь ик лулоос. Но адӟиӟиз Инмар, кылдытэмез ӟеч шуыса.

²⁶ Собере шуиз Инмар: "Ойдолэ кылдытом адямиез, кудӥз Асьмеос кадь ик луоз. Мед соос кивалтозы мореысь чёрыгъёсын, инмысь тылобурдоосын, гурт пудоосын, кыр пӧйшуръёсын но вань няш кыстӥськыса музъем вылтӥ ветлӥсьёсын но вань музъемен".

²⁷ Озьы Инмар Аслаз образэзлы тупась адямиез кылдытӥз, кылдытӥз сое Инмарлэн образэзъя, кылдытӥз соосты: пиосмуртэз но кышномуртэз.

²⁸ Инмар благословить кариз соосты, вераса: "Трос пинал вае, но нылпиосты мед вӧлмозы быдэс музъем вылэ но улозы отын но кузёяськозы мореысь чёрыгъёсын, инмысь тылобурдоосын но котькыӵе лулоосын, музъем вылтӥ няш кыстӥськыса ветлӥсьёсын".

²⁹ Но шуиз Инмар: " Мон сётӥ тӥлед турын-куаръёсты, кудъёсыз кидыс сёто, но вань писпуосты, кудъёсыз емыш сёто. Ваньзэ соослэсь сётэмзэс тӥ сиыны быгатоды.

³⁰ Вань вож турын-куаръёсты Мон сётӥ сиыны кыр пӧйшуръёслы, гурт пудоослы, тылобурдоослы, котькыӵе музъем вылтӥ няш кыстӥськыса ветлӥсьёслы, ваньмызлы, кинлэн луллэн шоканэз". Озьы ик луиз.

³¹ Но адӟиз Инмар: ваньмыз, мае Со кылдытӥз, туж ӟеч вал. Сыӵе вал куатет нуналлэн ӝытэз но ӵукнаез.