3

¹ Тод, берло дыръёсы вуозы шуыса секыт дыръёс.

² Уго калыкъёс луозы асьсэды гинэ яратӥсезь, коньдон яратӥсесь, быдӟымъяськисесь, вылтӥяськисесь, урод кылын вераськисесь, анай-атайъёссылэсь кылзӥськисьтэмесь, ӟечезлы тау карыны быгатӥсьтэмесь, азэмынэсь, чурыт сюлэмоесь,

³ уръяськонтэмесь, кыл нуллӥсесь, асьсэды киязы кутыны быгатӥсьтэмесь, чурыт сюлэмоесь, ӟечез яратӥсьтэмесь,

⁴ ог-огзэс вузасесь, сюлмаськыны быгатӥсьтэмесь, асьсэлы гинэ оскисесь, Инмарез яратон интые шулдыръяськыса улӥсесь.

⁵ Соос асьсэды Инмарлы оскисъёс кадь возьматыны тыршозы, нош улоназы Инмарлэсь кужымзэ кулэтэм карозы. Таӵе адямиослэсь палдур возиськы.

⁶ Сыӵеос, эшласькыса кадь, коркаосы чуртнасько но калгонние вутто кышномуртъёсты, кудъёсыз пачкатэмын сьӧлыкъёсын но возиськыны уг быгато мугорзылэн мылпотэмъёссылэсь,

⁷ кудъёсыз дугдылытэк дышетско, нош нокызьы но уг быгато зэмлыкез тодыны.

⁸ Кызьы Ианний но Иамврий Моисейлы пумитъяськылӥзы, озьы ик та калык но зэмлыклы пумитъяськэ - соослэн визьзы сураськемын но оскыны быгатонзы ӧвӧл.

⁹ Соос азьлань мыныны уз быгатэ, уго соослэн визьзэс ыштэмзы тодмо луоз ваньмызлы. Озьы вал Ианниен но Иамвриен.

¹⁰ Нош тон мон сьӧры мынӥд дышетонын, улон-вылонын, малпаськонын, осконын, кема чиданын, яратонын, чигиськытэк сылонын,

¹¹ уллянёсын но курадӟёнёсын, кудъёссэ мыным адӟыны кылдӥз Антиохияын, Икониын, Листраын но кудъёссэ мон чидай, но ваньмызлэсь соослэсь Кузё-Инмар монэ мозмытӥз.

¹² Озьы ик ваньмыз, кин тыршоз улыны Иисус Христослы ярамон луыны, уллямын луозы.

¹³ Нош лек адямиос но пӧялляськисьёс урод ужъёсазы азьланьскыса, пӧяськонэ асьсэос сюрозы но мукетъёссэ но сьӧразы кыскозы.

¹⁴ Нош тон марлы дышетэмын вал но мае оскизы тыныд, кыль отын ик. Тодад возь, кин тонэ дышетӥз.

¹⁵ Вылаз ик тон пичи дырысен ик тодӥськод Священной Писаниосты. Соос юрттозы тыныд Иисус Христослы оскон пыртӥ утиськонын золомыны.

¹⁶ Быдэс Писание Инмарэн улӟытэмын но пайда сётэ дышетсконлы, сьӧлыкъёсты шарае поттон понна, тупатон но шонерлыко улонэз валэктон понна.

¹⁷ 17 Инмарлэн адямиез быдэ вуэмын мед луоз, но дась мед луоз шуыса котькыӵе ӟеч ужлы.