2

¹ Озьыен, пие мынам, юнматскы благодатьын, кудӥз Иисус Христос пушкын.

² Мае тон мынысьтым трос калыкъёс азьын кылылӥд, вера оскымон адямиослы, кудъёсыз дышетыны быгатозы мукетъёссэ но.

³ Озьыен, Иисус Христослэн ӟеч ожмаськисез кадь, шугсекытъёсты чида.

⁴ Нокыӵе ожгарчи но уг тыршы лэсьтыны аслысьтыз улон-вылон ужъёссэ, куке со кивалтӥсьёлэсь косэмзэс быдэсъя.

⁵ Нош кин ке правилоосъя уг ке ӵошатскы, со ваньзэсты азьпалтӥз ке но вормисен уз лыдъялэ но кузьым уз сётэ.

⁶ Музъем вылын вазь ӵукнаысен бер ӝытозь ужасьлы, ваньмызлэсь азьло ик сётыны кулэ будэтэм емышлэсь люкетсэ.

⁷ Вала мынысьтым веранме. Кузё-Инмар мед сётоз ваньзэ валан.

⁸ Тодад возь, асьмелэсь Иисус Христос Кузёмес, Кудӥз Давидлэн выжыысьтыз, кулэмысь улӟыса султӥз. Кудӥз сярысь мон проповедовать карылӥ,

⁹ со Ӟеч Иворэз ивортэме понна мон курадӟисько, но преступникез кадь жыльыен думылэмын, нош Инмарлэсь кылзэ нокызьы но жыльыен думылыны уз луы.

¹⁰ Соин ик мон Инмарлэн быръемъёсыз понна чидасько, соос но Иисус Христосэн утемын мед луозы шуыса данлык мед басьтозы.

¹¹ Шонер верамын: « Ми Соин валче кулӥмы ке, соку Соин ик улӟём,

¹² чидам ке, Соин ик царствовать каром, Солэсь куштӥським ке, соку Со но милесьтым куштӥськоз,

¹³ ми оскымонэсь ӧвӧл ке Инмарлы, нош Со оскымон кыле, уго Со уг быгаты Аслысьтыз Ачиз куштӥськыны».

¹⁴ Кузё-Инмар азьын эн вожвылъяське шуыса тодазы вайыты но валэкты. Уго керетонъёс пайда уг сёто, нош кылзӥсьёслы изъян гинэ кылдыто.

¹⁵ Инмар азьын тыршы ярамон но ӟеч ужась луыны, кудӥз шонер ивортэ зэмлыклэсь кылзэ.

¹⁶ Нош токма вераськонъёслэсь палэнскы, малыке шуоно, кин пыриське сыӵе супыльтонъёсы, соос азинско бесчестиын,

¹⁷ но соослэн супыльтэмзы вӧлске опухоль кадь. Озьы лэсьто Имений но Филит.

¹⁸ кудъёсыз зэмлыклэсь палдурскизы, верало, кулэмысь улӟыса султон вал ни пе, озьы вераськеменызы куд ог адямиослэсь осконзэс куашкато.

¹⁹ Нош Инмарлэн юн инъетэз сылэ, таӵе печатез луыса: «Кузё-Инмар Аслысьтызъёссэ тодэ» но « Шонертэмлэсь мед палдурскоз со, кин вера, Христослы оскемзэ”.

²⁰ Бадӟым коркан зарнилэсь но азвесьлэсь сяна, вань на пулэсь но, гордсюйлэсь но посудаос. Одӥгез сиё-дано, нош мукетыз ог шоры ужъёслы гинэ лэсьтэмын.

²¹ Соин ик, ин чылкыт луоз котькыӵе пожлэсь, со чылкыт посуда кадь Кузёезлы ярамон но дась котькыӵе ӟеч ужъёслы.

²² Пегӟы егит мылпотэмъёслэсь, но тыршы шонерлыко, осконэн, яратонэн, тупаса улыны ваньмыныз, кин Кузё-Инмарлы чылкыт сюлэмын вазиське.

²³ Шонерлыкез тодэмзы потӥсьтэм адямиослэн визьтэм юанъёссылы валэктон эн сёт, уго вожвылъяськонъёс кылдозы.

²⁴ Кузёлэн рабез кулэ ӧвӧл вожвылъяськыны, нош со ваньмызлы ӟечен вазьылыны кулэ, быгатыны кулэ дышетыны, чидась луыны,

²⁵ востэмлыкен валэктыны тыныд пумитъяськисьёсты: уз-а сёт соослы Инмар зэмлыкез тодон понна покаяться кариськон,

²⁶ соос но мед чакласькозы но мозмытскозы шуыса дьяволлэн выысьтыз, кудаз кутэмын вал солэн воляеныз.