4

¹ Озьыен, тӥледыз сюлворыса курисько: Инмар азьын но милям Иисус Христос Кузёмы азьын, Кудӥз судить кароз улэпъёссэ но кулэмъёссэ, куке Со выльысь лыктоз но царь кадь кивалтоз.

² Инмар кылэз калыкъёслы иворты, дась лу котьку, аслад дырыд шоры учкытэк, усьтыны, возьматыны но пумитъяськыны шонертэмлы, астэ кияд возьыса, ӟеч дышетӥсь кадь, валэкты калыкъёслы.

³ Уго вуозы сыӵе дыръёс, куке шонер дышетонэз кылэмзы уз пот, нош асьсэлы быръёзы сыӵе дышетӥсьёсты, кудъёсыз вераськозы соослы ярамон кылъёсын.

⁴ Зэмлыкез дугдозы кылзэмысь но берытскозы шонертэм малпам дышетонъёслы.

⁵ Нош тон сак лу ваньмызлы, курадӟёнъёсты чида, Ӟеч Иворез ивортон уждэ умой быдэсты.

⁶ Мынам улонэ дась ини алтарь вылын жертва кадь, но мынам та дуннеысь кошкон дыры вуиз ни.

⁷ Ожмаськи мон умой, аслэсьтым сюрэсме ортчи но осконме ути,

⁸ нош табере дасяське мыным шонерлыклэн венецез, кудзэ сётоз мыным шонерлыко Судья Кузё-Инмар, лыктон нуналаз. Но мыным гинэ ӧвӧл, нош соослы но, кин чидатэк вите Солэсь лыктонзэ.

⁹ Тыршы лыктыны мон доры ӝоггес,

¹⁰ уго Димас кельтӥз монэ, яратыса туала улонэз, но Фессалоникае кошкиз, Крискент- Галатияе, Тит- Далматияе. Монэным кылиз одӥг Лука.

¹¹ Басьты сьӧрад Маркез но ӵошен лыктэ мон доры, уго со мыным кулэ служениеын.

¹² Тихикез мон келяй Ефесе.

¹³ Мон Троадаын Карплэн дораз плащме кельтӥ, куке мон доры мынод, сьӧрад басьты сое, но, нырысь ик, кулэсь книгаосты но басьтыны эн вунэты.

¹⁴ Ыргон дурись Александр мыным туж трос уродзэ лэсьтӥз. Кузё-Инмар мед пунэмзэ берыктоз солы солэн ужъёсызъя.

¹⁵ Нош тон солэсь палдурскы, уго со туж зол пумитъяськиз милям дышетонмылы.

¹⁶ Монэ нырысетӥзэ судить карыку мон дорын нокин но ӧй вал, ваньмыз монэ кельтӥзы. Инмар мед простить кароз монэ кельтэмъёсты!

¹⁷ Нош Кузё-Инмар лыктӥз мон доры но юнматӥз но утиз левъёслы сиыны монэ куштэмлэсь, но юрттӥз мон мед быгато шуыса язычникъёслы ивортыны Ӟеч Иворез.

¹⁸ Но утёз монэ Кузё-Инмар котькыӵе уродлэсь но возёз Аслаз Инмысь Царствоезлы, Солы пумтэм дауръёс ӵоже дан. Аминь.

¹⁹ Салам вера Прискиллалы но Акилалы но Онисифорлэн семьяезлы.

²⁰ Ераст кылиз Коринфын. ВисисьТрофимез мон кельтӥ Ефесэ.

²¹ Мон доры лыктыны тыршы тол вуытчёзь. Тыныд салам верало Еввул, Пуд, Лин, Клавдия но ваньмыз братъёс.

²² Кузёмы Иисус Христос мед луоз тынад духеныд. Благодать тӥледын. Аминь.